開心復活節之...復活繼續買 (2012年4月7日 - 9日)

Mr.T去咗Birmingham 做野已一段時間，
暫時每個weekend 梅花間竹咁一個星期我過去佢度;
一個星期佢返上來Glasgow~

周圍去雖然好好玩，
但係舟車勞動坦白講都幾攰......
所以一定要有d野作為我既動力 + 支柱，
最大動力 + 支柱緊係Mr.T 啦!
不過可以周圍shopping 都佔咗好重要既位置!!

最近成日走來走去，
而且Mr.T打算安排我遲吓搬埋過去，
睇來我周圍走既日子仍然會持續一段時間!
索性開多個分類"孖T橫行英倫"，
就讓我買勻全英國吧~~~~~~

4月7日我到咗Manchester 後就轉車去Stoke On Trent，
除咗因為Mr.T 其中一間office 喺Stoke On Trent 之外，
Stoke On Trent 仲係英國最有名既陶瓷生產地，
好多英國出名瓷器品牌都係喺依度製造，  
而我最鍾意既骨瓷名牌Wedgwood 廠房亦係位於此地!
今次打算趁復活節weekend 去參觀Wedgwood Visitor Centre，
之後興奮地去裡面既Wedgwood outlet 出血!!



星期六下午到咗Stoke，但Mr.T office 仲有手尾要做未走得，
見有部份店仲有個零鐘先關門，
於是我周圍逛吓~
原本入去Wilkinson 只打算買紙巾，
點知比我發現樓上好正既廚具部......

花花焗爐手套，唸都唔洗唸就放落購物籃;

想買個鋼既mixing bowl 好耐，
不過一係大細唔啱心水;
一係個底有防滑矽膠(我唔鍾意!)，
依個大細啱啱好又無膠底，而且仲好鬼平!

最近FB見好多人玩依枝野，咁啱又比我見到，我又買返枝玩吓!

正當我非常enjoy 尋寶ing，Mr.T走上來捉人......
加上我當時好肚餓，暫時就此收手啦! 

第二日4月8日Easter Sunday，
本來打算照原定計劃造訪Wedgwood Visitor Centre~
點知上網check 地址時發現......
Easter Sunday 唔開!!!!!!!! 
晴天霹靂~~~~~~~~~
於是我地臨時轉戰Manchester......

不過當我地到咗Manchester，
再發現除咗餐廳開門之外，成個市中心死城一個!
沮喪地同Mr.T大擦一頓自助餐(下篇同大家分享~),
來填補我一日連續受咗2次打激既shopping 心靈!! 

食完一頓豐富既自助餐，
去Manchester 既Chinatown 打咗個白鴿轉，
發現都係我地中國人最勤力!
曼城唐人街無論餐廳超市都有開門......

曼城既中超有好多台灣食品~ 一場來到，當然要有返d"渣拿"!

逢初一十五食花齋既我之前買過依隻香菇粉，
就快食哂但之前買既Glasgow 中超無再入貨買唔返，
本來唸住要上網訂，咁啱又比我喺曼城中超見到~
不過佢地竟然轉咗新配方 - 由之前全素變咗奶素! 

唯有轉買同一牌子既全素蔬菜味精~

順便試吓依隻鰹魚精;

又順便試吓依隻炸醬;

再順便試埋依隻日式沙拉醬~

既然Manchester 乜都無開門，
唐人街之後我地就打道回府返Stoke On Trent~
可能當日我受既打激太大，購物意慾仍然好旺盛!
途中經過一間有開門既波蘭食品小店.......

pasta 都要買一包!

依隻cream fix 據聞會令打出來既忌廉形態穩定唔易溶......喎!
我仲未試! 不過之前喺網上睇過資料知道點用，
特別買2包來試吓~

第三日4月9日Easter Monday，

是日Mr.T 要返office 做野，
陪我食完lunch，我就周圍閒逛~

不過原來Easter Monday 有好多店都仍然唔開! 
就算開既都會早收工......

睇來喺英國聖誕、新年、復活節依咋大時大節都係唔多適宜shopping!!
但經我最後努力總算有唔錯既收穫......

Stoke 間TK Maxx d貨唔錯，而且間格幾好行~

燒雞架

迷你桃紅saucepan

辣辣雞翼汁

檸檬芥醬

行完TK Maxx 走去對面正大減價既Primark......

依件灰色褸著上身又貼身又暖，而且超級超級抵!

I mean 係咁抵 - £3! 

之後再去多次Wilkinson......

買埋同花花焗爐手套一set 既花花tea towel~

仲買咗2個新咕臣芯...... 

用來配上星期買既減價抵到爛花花咕臣套，靚! 由於大部份店都早收工，為把握時間每間店唔可以行太耐，幾乎都只係匆匆立吓眼......不過反正老公office 喺Stoke，我大把機會再返來!
我仲要去Wedgwood outlet 嘛!! 
今次就當係探吓路啦~

星期二4月10日清晨3am 終於同Mr.T 一齊返到Glasgow，
一瞓醒撐大眼就收到網上訂咗大半個月既鴨仔防塵塞!

由3月20日等到4月10日，真係等到我頸都長咗幾呎!

好鍾意好鍾意~~~~~ 等咁耐都係值得既!
 

好可愛啊! 

不過同時我發現無耐前喺倫敦買既紅玫瑰防塵塞失咗蹤......
唔通佢有預感鴨仔會殺到來黯然退出!?!??? 

仲有喎..........

尋日4月11日出版既Cake Decorating Vol.4~
今次送星星印模 + 糖花tool!

早幾日託V姨丈幫我喺香港買既彩繪蛋糕卷2，
估唔到V姨丈咁快手就幫我買到，仲寄緊過來!
希望快d會收到本書啦~ 

原來......買吓少少買吓又少少......收穫都好豐富啊!