1月下旬的一人午餐 + 二人晚餐 (附食譜)

話咁快2013年已經過咗一個月嘞!
依一個月來成日覺得好忙，
其實我都唔知忙乜野，
只係覺得每日起身無停手整依樣攪果樣，
到有時間坐低抖吓上吓網時已經天黑，
時間好似越來越唔見洗咁........


不過我覺得係好事啊!
因為感覺"忙"得開心，生活過得好充實~
(雖然唔知自己忙緊乜野......哈哈~~~ )

因為"覺得忙"，
所以無咩時間張羅三餸一湯~
不過過幾日就農曆新年，
計劃緊到時煮餐正正既中餐!
而家先回顧一下1月下旬我煮過乜........

1月21日: 羅馬椰菜花鹹鯷魚意粉 + 煎肉眼扒

只係得椰菜花 + 意粉，對Mr.T 來講將會係酷刑!
所以要加塊格格肉眼扒~
(咁我自己都想食牛扒既.....嘻嘻~~ )

羅馬椰菜花鹹鯷魚意粉食譜click here~

1月24日(午餐): 秋葵火腿蛋炒飯

我覺得依個炒飯好好味!
我覺得Mr.T都會好鍾意~
(佢食過秋葵，不過佢未試過秋葵炒飯!)

所以第二日(1月25日)整比Mr.T 做packed lunch......

不出我所料Mr.T 真係好鍾意呢!

秋葵火腿蛋炒飯食譜click here~

1月25日(午餐): 青瓜煙三文魚忌廉芝士圓鰭魚黑魚子醬三文治

若之前一晚煮碟頭或西餐，
就一定會清哂無得留第二日做lunch，
午餐我要一個人攪掂，通常食得簡單d~
不過我樣樣都想食(為食!)，
最終整咗依個豐富三文治出來!

1月25日(晚餐): Burns Supper Balmoral Chicken

來咗蘇格蘭咁多年，覺得自己心態上變咗混血兒!
即係覺得香港 + 蘇格蘭都一樣係自己既家~
耐無返香港，會好掛住香港;
返香港返得耐，又會掛住蘇格蘭......

從小習慣V婆婆V媽媽都好重視中國傳統節日，
所以就算我來英咁耐，我仍然一樣好重視中國傳統大節~
但連本地既節日我都重視架!

來蘇格蘭咁耐只食過酒店或朋友煮既Burns Supper，
自己從來無試過煮，今年決定試吓煮!
大成功!! Mr.T 仲話係佢食過最好味既Burns Supper 呢~

Balmoral Chicken 食譜click here~

1月26日: 素炒粒粒

是日農曆十五食花齋~
天陰陰 + 凍唔想出街，
反正得我自己一個人食齋，
求其睇吓屋企有咩材料可以用來煮齋菜.....
有豆腐、腰果、菜脯，仲有幾條剩底既秋葵，
全部切粒炒，清清地有益又好味!

素炒粒粒食譜click here~

1月28日(午餐): 芝士煙三文魚洋蔥炒飯

剩飯 + 雪櫃裡面長備既煙三文魚 + 芝士，
第一次用芝士炒飯，
估唔到原來可以咁香噴噴咁好食果喎!

芝士煙三文魚洋蔥炒飯食譜click here~

1月28日(晚餐): 水牛城雞翼 + 老翻Domino's Meltdown Pizza

第一次自己整100%符合自己口味既Buffalo wings!
個人認為用焗既方法比炸好味得多多聲~~~

老翻Domino's 既Meltdown Pizza，
除咗Mr.T買錯咗既芥醬之外，味道幾乎一模一樣!

水牛城雞翼食譜click here~
老翻Domino's Meltdown Pizza 食譜click here~

1月29日: 芝士煙三文魚洋蔥炒飯

前一日我食完lunch 將相貼上FB，
Mr.T睇到張相知道炒飯裡面有芝士，
話佢都好想食!
不過果晚已經準備咗雞翼 + pizza.......

唔緊要! 賢妻第二晚即刻整比佢食!!
(佢鍾意到同我清哂一大鑊炒飯.......)

1月31日(午餐): 胡椒牛柳 + 哈吉斯配薯蓉蕪菁蓉

前一日比電力公司激到生蝦咁跳! (咩事唔想提嘞! )
是日攪掂返佢地既mess，
決定食好d當係好好補償一下!!
可惜依餐係lunch，Mr.T要返工無佢份.......

胡椒牛柳係超市已經整醃好既現成野，
我只需要煎熟就得嘞!
之前仲有haggis 剩低，
心情好~ 手痕攞果心型cooking ring 來玩吓，
造型好靚啊!

1月31日(晚餐): 水牛城雞翼; Domino's Inspired Meltdown Pasta + 雜菜沙律

Buffalo wings 一食條癮一發不可收拾! 食極都唔厭呢~

不過咁多肉....就算無唔舒服，
心理上都覺得太過份唔健康!
所以要加大兜沙律!!

之前食Meltdown pizza 覺得配料用來整pasta 都會好好味，
決定試吓無妨~ 所以特別叫Mr.T買返枝正確既黃芥醬.......
竟然同pasta 都好對味喎!
Mr.T仲讚我好叻識變通呢~

Domino's Inspired Meltdown Pasta 食譜click here~