我們的情人節2013

上星期四係一年一度有人重視有人鄙視既情人節，
大家同另一半有無慶祝 / 點樣慶祝呢?
其實我 + Mr.T已經兩年無好好正日慶祝過情人節嘞~
前年2月頭我做過手術，
情人節當日正處於傷口痛兼食龍肉都無味既戒口期;
舊年Mr.T 去咗南下出差，
情人節當日雖然收到Mr.T送比我既花，但全日見唔到Mr.T......

今年既情人節唔係weekend，
我本身唸住情人節正日Mr.T應該唔可以陪我慶祝~
情人節前幾日有晚我 + Mr.T睇緊電視，
啱啱播緊M&S既情人節套餐廣告，
£20有酒有頭盆、主菜 + 甜品ready meal for 2.......

我: Honhon~ 不如今年我煮情人節dinner咯?
(我緊係唔會整M&S ready meal 咁行啦! )

Mr.T: erm........我已經訂咗枱.......

我: 哦.....

對話就此完結，
我無問Mr.T訂咗邊度or 食乜，
因為就算問，佢都唔會講!


情人節當日朝早Mr.T先陪我去醫院覆診，
送我返屋企後佢就如常返工，
但臨返工前叫我晏晝5點零鐘去office 搵佢~

晏晝我仲喺屋企hea 緊未出門口，
Facebook 收到Mr.T傳來一張"V之四季圖"!

係我既Q版四季造型呢! 大愛啊~
(即時用來做咗FB cover! )


我係果種好坦白自己鍾意收花既人來，
一年先一個情人節，我唔覺得浪費!
同時我都係一個好可愛既人，因為雖然我鍾意收花，
不過如果真係無花收我唔會介意，
亦唔會唔開心or 發脾氣~
果日見成個晏晝都無人敲門送花來，
我以為今年無花收.......

點知我一見到Mr.T，
佢即時送我一大束香水百合!

舊年情人節心情唔好(網誌)......
Mr.T打電話問我鍾意鍾意我收到既花，
我答佢: 你估我鍾意你放工返來親手送札花比我，攬住我同我講"happy valentine's day"; 定係鍾意比一個我完全唔識既光頭肥佬嘈醒對箱野比我 + 同我講"please sign here"?Mr.T話佢記得我一年前講過依句悔氣說話，
所以今年特別要親手送花比我~
鼻頭即時有點點酸..........


收過花後Mr.T就帶我去食情人節燭光癲拿~

Mr.T帶咗我去依間叫做La P'tite Folie 既法國餐廳，
一推門入去，我已經即時愛上咗餐廳既氣氛!

點菜後帶強烈法國口音既侍應們送上法包、牛油 + 沙律~

一向出街食飯我都好忽略個餐包，
不過不得不提La P'tite Folie 既法包，
絕對係我食過最最最好食既法包!

外面脆卜卜裡面微溫軟綿綿~~~
搽少許牛油上去會即時半溶化........好食到不得了!
我地坐得好近切法包既枱，見到法包去得好快!
有客人食完一籃仲再要多一籃呢~

有頭盆食嘞!
(依張相完全睇唔出係Mr.T舉高相機自拍! )

Mr.T 頭盆 - 油封兔肉凍

粗切油封兔肉好有咬頭，
味道鹹鮮無論空口或配多士一樣好味!
(下次再去我一定要點依個頭盆!!)

我既頭盆 - 我既煎封帶子配松露薯蓉

帶子肉厚鮮甜，外面煎得金黃脆脆，裡面半熟柔軟，
cooked to perfection!

上主菜嘞~~~~~

Mr.T既唔知咩豬柳

豬柳tender 又juicy，個汁加咗蘋果甜甜地好好味~
正方形既dauphinoise potatoes 無一般dauphinoise 咁多忌廉，反而仲香仲加好食!

我既主菜 - 蟹肉忌廉linguine 配香煎海鱸柳(有兩大塊啊! )

Linguine 雖然有點煮得過稔，不過個蟹肉忌廉汁非常好味!海鱸柳皮煎得香脆，魚肉鮮美.......
意粉既小缺點可以當成缺陷美~

我地到達餐廳時，只有一枱已入座既客人睇緊餐牌，
餐廳氣氛寧靜浪漫~~~

我地入座後不停有客人推門入來，
好快就只剩返一張空枱!
侍應每次上菜都會同客人講聲"bon appetit"，餐廳bon appetit 之聲此起彼落!每枱客人都係一雙一對，氣氛熱鬧得來人人都好sweet sweet 呢~

是晚我特別帶咗V爸爸廿多年前情人節送比V媽媽既禮物!
(網誌: 一份廿年前既情人節禮物)

花好大札，要特別插疏d，等香水百合有位開花! 


今年過一個好好好開心既情人節!
Thank you very much my darling Hon~
I LOVE YOU Mr.T!