二人世界新年飯 (附食譜)

話咁快就過咗農曆新年嘞~雖然今年我無返香港，6299又返咗香港，
得我 + Mr.T兩個人過年，
不過我一早決定要同老公過一個有氣氛既農曆新年，
新年前一星期我已滿腦子"整意" + "煮意"!

雖然腦裡面一早計劃好哂，但新年前一星期突然多咗臨時約會，
打亂哂我計劃既時間表!

打算初二煮鮑參翅肚盆菜，
每次出街時我都提自己: 返到屋企要睇吓冰格仲有無發好咗既海參.....
不過每次一返到屋企我就無咗件事!
最終年廿八先記得check.......係無!!

事不而遲! 火速攞3隻細既海參即時發.......

幸好發咗一日已經double!
Mr.T見到依3條發咗一半既海參就話: 咁似"如來神掌"既.......
佢講緊N年前劉華拍果套"摩登如來神掌"裡面條天蠶蟲呀!!

有驚無險發咗3日總算攪掂，趕得切年初二用來煮盆菜!

原本打算年廿五整既賀年曲奇......拖到年廿九有空檔去整!
但總算趕得及整起過年~



一向都唔煮團年飯，加上咁忙年廿九更加無時間煮飯......

所以叫咗餐好豐富既中式外賣!

大年初一我食齋~
因為第二日初二會煮盆菜，
所以初一齋菜簡單d，
務求可以一餐就食得哂唔洗留!
是日Mr.T自行買ready meal 攪掂~

之前買既素鮑魚........

解凍切片沾豉油wasabi 做刺生~

清炒白菜仔豆腐卜



初二係煮今個農曆新年最重頭既project"開年盆滿砵滿盆菜"既大日子!
一早起身......不過攪吓依樣整吓果樣.......
晏晝先可以正式開始煮依餐開年飯!

先煲返個意頭靚湯 - 發財好市就手大利湯
(蓮藕髮菜蠔豉豬手豬脷湯)
依個湯係V媽媽過時過年必煲!
舊年難得喺香港過農曆年，
不過當時飲緊中藥唔飲得老火湯，同佢緣慳一面~
今年自己煲補返數!!

一邊煲湯...一邊蒸冬菇...炆腩肉...炆鮑魚海參.......
十足十八爪魚上身!! 不過忙得好開心~

一輪功夫後既成果，同Mr.T開開心心食一餐豐富既開年飯，
滋味又滿足! 非常值得~

有網友問我 - 我 + Mr.T係咪2個人一餐食哂個盆菜.......
實在太睇得起我地嘞!
我地雖然係大食，不過我地唔係怪物啊~

Mr.T估計依個盆菜大約可以for 6至8人，
我地食咗4餐先食得哂! 會厭嗎? 又唔會喎!
因為菜式種類多，每樣餸味道都唔同，
仲越滾越和味呢~~~


賀年曲奇食譜click here~
發財好市就手大利湯食譜click here~V記盆滿砵滿鮑參翅肚盆菜食譜click here~