阿V彩虹蛋糕

美心有痴Lam賣廣告既"快樂彩虹蛋糕"..........

阿V都有食到Mr.T lam lam 脷既"開心彩虹蛋糕"!
(Special thanks to Mr.T 客串演出~ )


其實彩虹蛋糕並非美心原創，
好多年前我仲未開始玩烘焙時，
已經網上見過好多歐美blogger整過彩虹蛋糕~
所以當我知道美心既彩虹蛋糕比某名媛鬧抄襲時，
真係覺得好好笑!

其實我好抗拒五顏六色既食物，
感覺似玩具多過似食得落口既野........
所以雖然我知道彩虹蛋糕存在多時，
但我一直都無乜意慾去整~
不過最近見美心既快樂彩虹大熱，
我唔抵得又要整返隻阿V開心彩虹!

見好多人話美心彩虹蛋糕好鬼甜 + 好鬼漏，
我一睇.......鬼咩~~~ 層層都有唔同味道既果餡!
士多啤梨 + 芒果 + 柚子蜜 + 奇異果......
仲有勁雄厚既忌廉...唔甜就有鬼咯!!
莫講話我一向怕甜，就算我唔怕，
我都無咁好氣樣樣生果買齊哂但只用果少少!
所以我只齋用忌廉~

我無參考過其他彩虹蛋糕既食譜，
只係照返平時做海綿蛋糕既做法~
但我按比例增加咗各材料份量，
因為彩虹蛋糕比較高身!

我唔知美心版有幾大?
但阿V版直徑15cm，唔計餅面裝飾高9cm ，
應該比美心既細隻.......


1. 預熱焗爐180C。


2. 預備直徑15cm 圓模 + 5張直徑15cm 圓形牛油紙。


3. 蛋黃4個和幼砂糖14g放大碗中，以電動打蛋器打至發白。


4. 另一大碗中放入蛋白4個、鹽2g和少許他他粉，先打至呈啤酒泡。


5. (4)中加入幼砂糖80g，打至接近乾性發泡(開始呈勾狀!)。


6. 將(5)的蛋白糊分3次加進(3)的蛋黃糊中，輕手以刮刀拌勻。


7. 分數次篩入低筋麵粉70g，每次都要以刮刀輕手拌勻至完全無粉粒，才可再加入麵粉。


8. 菜油和牛奶各26g，雲呢拿精油少許拌勻。


9. 將少許(7)的麵糊加入(8)略略拌勻後，倒回(7)內以刮刀輕手完全拌勻。


10. 將(9)分成5等份，分別放在5個碗中。

11. 每個碗中加入適量食用色素拌勻。


12. (2)的牛油紙墊蛋糕模底，倒入(11)其中一色的麵糊，放入焗爐10分鐘，以竹簽插入蛋糕中央測試，蛋糕片是否熟透，脫模及撕去牛油紙，放在蛋糕架上待全涼。

13. 重覆(12)直至所有顏色蛋糕片完成。(如有2個一樣大小的蛋糕模，可以一次過同時焗2個顏色!)

14. 待所有蛋糕片全涼後，先將紫色蛋糕片噴上酒糖液，抹上打至八分的忌廉，順顏色次序叠上去(綠、黃、橙、紅)，重覆噴酒糖液及抹忌廉步驟。(酒糖液做法~)

15. 叠上紅色蛋糕片後，以長竹籤或鴨針在蛋糕中心直插至底，串連所有蛋糕片固定位置抹上忌廉。

16. 以抹刀抹平忌廉，再以狗牙忌廉刮畫上紋路後可隨意裝飾。

我買咗2種彩色糖來裝飾.......

"Rainbow Drops" (彩色糖爆米花);

依隻彩虹色既Sour Strips 軟糖雖然好鬼酸，
不過真係好襯個蛋糕~

最重要係.......2隻糖都好鬼平!

阿V開心彩虹蛋糕完成嘞!