5月下旬 + 6月上旬二人世界晚餐 (附食譜)

話咁快2013年咁就過咗一半有多，
眨吓眼已經到咗6月中.........
最近蘇格蘭天氣熱到甩肺，
煮 + 食都想簡單少少~

5月19日(星期日)
99 + 大伯禮拜頭由香港返咗來，
我同Mr.T返去食飯，4個人好多餸好豐富，
有冬菇炆鮑魚排骨、炸雞翼、燒排骨、炒菜心.......
仲有個無影但好好飲既雞湯~

99煮餸習慣大堆頭，大伯 + Mr.T都係食肉獸，
排骨 + 雞翼都清哂，仲有剩低冬菇鮑魚比我地打包帶返屋企!

5月20日三餸一湯: 粉葛赤小豆白扁豆煲瘦肉;
洋蔥黑椒汁鹹豬手; 香煎龍脷柳; 蒜蓉炒菜心

好耐無飲過老火湯，好想飲啖湯，見泗和行粉葛好靚，
買咗2隻細既來煲湯，啖湯勁甜好飲到爆!
而且我發現........用陶瓷刀來切粉葛好鬼正!!粉葛赤小豆白扁豆煲瘦肉食譜click here~

早排買咗兩隻鹹豬手放喺冰格，冰格好快趣又爆棚!
攞咗一隻出來，今次用洋蔥黑椒汁來炆~

洋蔥黑椒汁鹹豬手食譜click here~

我 + Mr.T都好鍾意食比目魚，不過Mr.T嫌煩唔鍾意累骨，
今次買已起咗骨既魚柳來煎~

香煎龍脷柳食譜click here~

5月24日: 茄子豆腐煲; 梅菜紅蘿蔔刀豆炒飯

是日農曆十五食齋日子，所以兩個都係全素~

茄子豆腐煲食譜click here~

梅菜紅蘿蔔刀豆炒飯食食譜click here~

5月25日: 豆瓣醬茄子豆腐煲; 蔥花蛋炒飯

茄子、豆腐 + 冷飯，全部都係前一日食齋既剩餘物資!
天氣熱咗，依3樣野都唔擺得耐，要拿拿淋攪掂埋佢地，
是日唔洗食齋，於是轉一轉煮法換換口味~

仍然係無肉既茄子 + 豆腐，
不過加咗少少刺激既豆瓣醬 + 蔥花，風味完全唔同哂!

5月29日三餸一湯: 蕃茄煎蛋肉碎湯; 柱侯牛腩; 茄子肉碎煲; 清蒸海鱸

天氣熱唔想煲老火湯，但又想飲湯，快手滾個酸酸蕃茄湯!
平時用免治牛肉來滾依個湯，不過買咗免治豬肉來煮茄子煲用唔哂，
用豬肉滾一樣好味!

蕃茄煎蛋肉碎湯(參考食譜)click here~

見Tesco肉檔牛腩幾靚，買咗2塊來炆~
As usual 唔加Mr.T唔食既白蘿蔔，炆起成屋香噴噴!!

柱侯牛腩食譜click here~

茄子係一樣我食開會上癮既蔬菜，仲要撞正超市茄子減價!
本來想整魚香茄子，不過懶唔想拆鹹魚肉，只用蠔油來煮.......

Tesco新鮮海鱸半價，買條返來清蒸~
不過今次我真係多得魚檔果位女士唔少!
買魚時佢問我劏唔劏，咁我緊係話劏啦，
我以為佢幫我打埋鱗.......

點知臨蒸魚前拆開白色膠袋先知佢原來無打鱗，
唯有拿拿淋快手打鱗，就係咁因為心急想快d可以入鑊蒸，
打鱗時唔小心比條魚拮親右手手指公，流咗好多血!
當時Mr.T又未返到屋企，我洗完手沖咗一陣水仍然流緊血，
好痛我又怕會感染食肉菌，嚇到喊住打電話比Mr.T~

本來連飯都唔想繼續煮，想等Mr.T返來帶我去醫院，
不過Mr.T幫我打電話NHS 24問過，
如果手指止咗血 + 無紅腫就唔洗去醫院.......
幸好Mr.T返到屋企時已經止咗血，
不過隻手指公痛到成晚都有郁郁吓既感覺!
最後頂硬上煮埋餐飯~

不過條魚蒸完出來，點解個口歪鬼哂既!!!?!?!
我先發現佢原來除咗無打鱗之外，
連魚腮都無幫我切出來!
無見過人劏魚劏得咁衰!!!!!!!

5月30日: 牛腩瀨粉

前一晚食剩半煲牛腩，
經過隔夜一晚再滾返熱既牛腩更加好味!
用來煮瀨粉一流!! 熱辣辣香噴噴.......正~~~~~
(有剩少少茄子當然食得唔好嘥啦! )

6月3日: 印度咖喱雞; 茴香籽薑黃飯

本想整咖喱羊，但超市得返一盒羊肉丁，唔夠2個人食，
改整咖喱雞，一樣好味道!
不過煮咖喱既代價係.......第二日廚房仍然大陣咖喱味!!!

印度咖喱雞 + 茴香籽薑黃飯(參考食譜)click here~

6月6日: 黑椒汁袋鼠扒 + 雞胸; 火箭菜車厘茄沙律

見超市有急凍袋鼠扒賣，Mr.T話未食過袋鼠肉，
所以買盒整比佢試吓~

我以前喺香港既西餐廳都食過2、3次袋鼠肉，
記憶中我對袋鼠肉印象唔錯!
不過返到屋企上網一睇，
10個著咗10個自己煮過袋鼠肉既人都話有腥味!!
怕死既我於是下咗2個對策:
(1) 整多2隻走地雞胸~ 萬一袋鼠肉太難食入唔到口，都唔怕餓親;
(2) 煎前先落重香草來醃袋鼠肉辟腥氣!

一盒有4件袋鼠肉，溶雪後既樣.........
其實拆袋清洗血水後個樣好好多，望落去同牛肉完全無分別!

袋鼠肉同牛肉一樣可以唔洗全熟，其實我依塊都已經過熟......
唔知係我香草生效定其他人過敏?
我 + Mr.T都唔覺有怪味喎! 似無咩牛味既牛肉咁囉，
我地認為係屬於好食過邊，
不過我地都係鍾意帶少少脂肪香既牛肉眼，
袋鼠肉全無脂肪太瘦了!

6月11日: 碟頭柱侯牛腩飯配灼菜心

喺中超見到牛腩好鬼靚，仲平過鬼超好多!
忍唔住要買一大條~

Mr.T邊食邊含住成口牛腩飯不停話好正好正.........

柱侯牛腩食譜click here~



6月12日
尋日晏晝有醫院appointment，Appointment後同Mr.T食埋飯先返屋企~
是日端午節，不過我由細到大都唔鍾意食粽，
反而想食叉燒飯........

我得償所願既叉燒飯!
好味~ 不過如果叉燒肥少少仲加好!!

Mr.T既椒鹽豬扒飯~
都好味，但如果豬扒乾身d會更加好!

大兜例牌要飲既冬蔭雞湯~
今次稍嫌唔夠酸辣 + 甜咗少少，不過都係好味既!