2013年6月24日星期一

World War Z 3D 地球末日戰 - 2013年6月22日 (附實地拍攝場景)

好耐無講過睇戲......
並非好耐無睇戲; 亦唔係戲太爛所以唔想寫,
只係忙,無時間記低睇咗既戲~

不過依套World War Z幾忙都一定要睇 + 要寫!
因為我同Mr.T等咗套戲2年;
因為戲有部份喺Glasgow City Centre拍攝!!



是日三人行同埋99一齊睇,本來我同Mr.T想試吓睇D-Box,
不過怕99覺得刺激得滯,所以最後都係睇3D!


As usual 唔多講劇情,只講睇後感.......- 劇情發展節奏明快,開場後數分鐘已經進入主題,情節緊湊無廁所位,成套戲都睇到我好肉緊!  photo 29_3_16.gif

- 要讚一下無大咋扮哂野懶高深複雜既理論畫公仔畫出腸地解釋點解會突然有個喪屍virus,到戲完場仍然唔知個
virus點開始 + 喺邊度開始;  photo 29_3_16.gif

- 驚喜好耐無見既David Morse演因私賣軍火比北韓,而被監禁既前CIA agent~
David Morse係一位我好欣賞既演員! 今次佢戲份雖少,不過佢出現短短5分鐘,已成為Brad Pitt之後一連串行動既關鍵;  photo 29_3_16.gif

- 3D效果雖然不多,但有3D效果既部份尚算不俗! 至少有一個鏡頭既3D效果令我、Mr.T + 99一齊彈起!


- 戲雖精彩,但當中仍有不合理之處e.g. 感染
virus後數秒間就會變成undead,照計應該唔會咁容易傳開到世界各地......不過作為一套官能刺激滿分既電影,情節合唔會理已唔太重要,只要唔太離譜就可以嘞......我覺得!

兩年前寫過當時我同Mr.T湊熱鬧去睇filming set (網誌),
兩年後今日等到頸都長戲終於上畫,
當時影落大咋
filming set但仲未曝光既相終於可以出post~

Philadelphia既街景,
其實係喺Glasgow市中心地標George Square拍攝.......









睇緊戲時,見銀幕上出現一個自己行經過無數次非常熟悉既地方,
但鏡頭一轉就跳咗去Ben Franklin Bridge,
感覺有點怪,不過又覺得好過癮!


Hollywood大製作一絲不苟,拍攝WWZ期間,
George Square四周街道,好多喺戲裡面根本唔會留意得到既細節都被改頭換面........










依個位於University of Strathclyde 附近既街道地圖牌,
本來真係一個Glasgow 街道地圖牌
不過當時被工作人員改成Philadelphia街道;

當時
George Square周圍泊滿大量戲中特技車輛.........

依架係開場無耐撞死差佬再大炒車果架垃圾車;
多角度大炒車........






咦......依架butcher車唔係上面炒咗既咩?
其實幾乎每款道具車/特技車都係一式2架一模一樣,
一架完整無缺,另一架甩皮甩骨!



Philadelphia電視新聞採訪車;


Philadelphia特警車;

有d車裡面仲有死屍公仔.........


依架就係炒落Brad Pitt原本渣緊既私家車果架救護車;





私家車被炒,Brad Pitt帶住老婆 + 兩個囡囡用依架RV逃生!


被喪屍襲擊整爛既車窗.......



醒目兼眼利既阿V,喺一架Philadelphia差佬車裡面.........
發現咗一本"Scotland on a plate"!
Filming set 穿崩了!!!!!


睇完依個YouTube,你認到以上果咋車嗎?






Photobucket

17 則留言:

  1. 我琴日都睇左,睇完有3個感覺:緊湊!緊張!唔夠喉!
    我平時吾睇鬼片+血腥恐怖片,呢部電影無咩太多血腥鏡頭但能營造出令觀眾由始投入到終的緊張氛圍,緊張真係一浪接一浪!
    正當我睇完,興高采烈想同其他朋友討論加分享,佢地一係就無興趣,一係就話唔好睇,唉,青菜蘿蔔,各有所好,我唯有自己細細回味啦.正好見到你篇post,唔好意思,借個位比我紓解下想法,謝謝
    [版主回覆06/24/2013 23:41:37]唔洗唔好意思呀! 依篇係講依套戲架嘛~

    回覆刪除
  2. 我琴晚都睇完黎呀!原來你地果邊同香港同步上畫架!
    我都覺得好刺激冇冷塲,好好睇呀!都有少少笑位,差不多尾塲既時候咪講 Brad Pitt 打自己針試藥既,門口出面咪有隻喪屍補住既,隻喪屍啲牙咪響度 up 呀up 下既,呢個位,我地全塲既觀眾響度笑,唔知你地有冇呢?大概係個樣太儍吧!
    哈哈〜連穿崩位都比你留意到既
    [版主回覆06/25/2013 21:20:00]其實唔係...依套係香港上先架! 香港19號上咗啦,英國就同美國都係同一日上(21號),我都有d估唔到......因為荷里活大片通常英美比香港先上架嘛!
    其實都有幾多笑位,好似David Morse話北韓無事因為北韓政府要人民剝哂d牙!

    果張穿崩位既相只係場景時穿崩啫,我影果時佢地已經拍哂主要鏡頭,而且果架警車未必有出場~

    回覆刪除
  3. 死屍係公仔黎架...我成日以為D臨記死得甘定...
    [版主回覆06/26/2013 18:22:31]哈哈~~~~~ 如果佢地去香港拍續集妳咪去應徵囉!
    [小車回覆06/26/2013 08:53:37]喪屍甘好搵架....我好PRO架....唔駛點化妝已經好得....
    [版主回覆06/25/2013 21:15:16]Mr.T有幾位朋友喺依套戲裡面做臨記喪屍,佢地話每人£60(約$720港紙)一日架! 佢地請咁多臨記,條數好襟計.......扮死屍唔洗請人啦,用公仔得啦!

    回覆刪除
  4. D-Box即係4D呀? 我都見朋友話呢套好好睇, 再睇完你介紹仲想睇呢~
    如果TVB既製作咁認真, 就唔駛成日俾人搵到穿崩位喇~ 哈哈! (不過有時睇穿崩位仲好笑)
    [版主回覆06/25/2013 21:13:59]我都唔知係咪即係4D..... 係張椅會郁果種~
    TVB無可能有咁既製作啦,邊有咁多budget? Mr.T有幾位朋友喺依套戲裡面做臨記喪屍,佢地話每人£60(約$720港紙)一日架! 佢地請咁多臨記,條數好襟計......
    哈哈~~~~ 穿崩依張咁啱比我影到啫! 不過果架差佬車都唔知有無出到場?

    回覆刪除
  5. 睇完段片段...好緊張...拍得好緊湊呀.....攪到我都想去睇呀
    [版主回覆06/25/2013 21:10:21]我特登搵依段片...就係依段既鏡頭喺Glasgow 拍!

    回覆刪除
  6. 我想睇 不過驚喪屍好核突啊 ~
    但我又想睇 Brad Pitt 哈 ~
    大製作真係大製作 花 2 年時間啊
    [版主回覆06/25/2013 20:55:40]鍾意Brad Pitt 就啱哂! 依套係佢個人表演咁滯~
    同一般喪屍戲比較,WWZ其實無乜血腥核突鏡頭,比較高層次著重劇情!
    套戲真係拍足2年,等到頸都長......

    回覆刪除
  7. 好似好好睇咁呢...真好...我好耐無去睇戲喇...入戲院都係睇卡通..=_=...
    [版主回覆06/25/2013 20:52:39]我地覺得好好睇呀! 不過要睇吓妳鍾唔鍾意依類戲嘞.....

    回覆刪除
  8. Kanny...yan's Blog2013年6月24日 下午8:44

    I saw this film too, however, I don't know it is talking about Zombies before the film starts. Haha...I saw this because of Brad Pitt. Anyway, I think this film is good and excited.
    [版主回覆06/25/2013 20:51:33]i knew it's about zombies 2 years ago since they started filming it....cos some of Mr.T's friends were the zombie extras in the movie!
    i dont particularly like Brad Pitt, but i think he's a good actor.

    回覆刪除
  9. 好似幾好睇喎! 不過我要等佢出碟先有得睇,因為無人幫我睇女。(除非我同老公分開睇。)
    [版主回覆06/25/2013 20:45:42]始終依類官能刺激既電影,去戲院睇同DVD好有分別.......

    回覆刪除
  10. 我星期日都睇左,真係好正!
    [版主回覆06/26/2013 18:21:28]連我99都覺得幾好睇! (我99話幾好睇已經好高分架嘞!!) 哈哈~~~

    回覆刪除
  11. 我同我男朋友星期日睇咗,好刺激。(係139號房拎疫苗果時)真係緊張到爆
    [版主回覆06/26/2013 18:19:43]成套戲由開場已經好緊張刺激! 真係一d冷場都無!!

    回覆刪除
  12. 我都好想睇呢套戲但湊住個女無得睇,唯有等出碟
    [燒肥亞回覆06/28/2013 02:03:11]係啦,我都好擔心佢返學唔知點算。而家唯有間中帶佢出去玩playgroup等佢慣下。
    而家係得佢訓左兩公婆先有二人世界時間。

    d長輩有d好煩,俾低佢睇又話人唔付責任,唔俾佢睇又話收埋個孫。真係好煩
    [版主回覆06/27/2013 19:41:11]黐身成咁....咁第日返學點算呀?
    個零兩個鐘睇場戲食餐飯有幾咁不負責任呀? 洗乜理其他人唸乜?? 見過好多女人生咗小朋友唔打扮,無哂自我,忽略夫婦關係.....到兩公婆有問題時就一味講到自己好偉大將所有時間比哂小朋友云云......當然唔係話照顧小朋友唔偉大,但除咗係媽媽之外,仲要平衡返自己其他身份囉!
    [燒肥亞回覆06/27/2013 02:03:41]唔係架,我其實好想好想放低個女俾四大長老睇然後去二人世界。不過我個女實在係太痴身。叫佢玩下就得,如果唔見我就會不停喊,喊到嘔,要見返我先唔喊。我都真係無哂辦法。可能得16個月仲係細掛。

    不過以我所知就好多人覺得d阿爸阿媽放低個仔女去二人世界係好不負責任架。香港大把呢d人,我都有呢d親戚。
    [版主回覆06/26/2013 18:18:57]其實香港人係咪唔興搵6299或自己爹地媽咪幫手睇小朋友既呢? 真係一有咗小朋友就一刻不離身,個零兩個鐘睇一場戲都唔得?
    我依度d朋友個個生咗3、4件都成日二人世界可以去睇場戲食餐飯.......

    回覆刪除
  13. D細節位真係做到好似係美國街頭一樣...攪到我本身無唸住去戲院睇...宜家有D想去睇添
    [版主回覆06/26/2013 18:15:46]其實除非屋企有個大電視再加勁音響又唔怕嘈到人,否則依類官能刺激既電影,始終都係去戲院睇好好多!

    回覆刪除
  14. 我上個星期六已經睇咗,成套戲真係無廁所位
    [版主回覆06/26/2013 18:10:00]上星期六咪22號囉,我都係22號睇~
    套戲由開場一直都好緊張刺激! 好睇~

    回覆刪除
  15. 我地睇3D,但3D效果唔係咁多囉,最特出就條屍跌埋哩,仲有飛機爆炸時,我個坐位都有震效果
    [版主回覆06/26/2013 18:06:55]其實3D效果唔一定要多架! 3D都要睇吓鏡頭有無需要 + 適唔適合~ 我見好多人叫其他人唔好睇3D又話呃錢又話盛,我覺得見仁見智啦!

    回覆刪除
  16. 我係剛過的星期六睇完套謝,真係拍得好好呢!夠曬緊張刺激!又無悶位...
    [ok回覆07/05/2013 15:19:25]係???咁就期待中啦!
    [版主回覆07/03/2013 04:08:24]好似落實咗拍第二集! 唔知幾時開拍呢?

    回覆刪除
  17. 我都睇左!! 超好睇仲有d意想不到既笑位
    果一隻黑炆炆係實驗室入面成日搵牙撞個玻璃既undead
    同埋BP拎完疫苗飲可樂果到 全場都笑左xd
    [版主回覆07/03/2013 18:28:08]雖然遮咗招牌....不過果罐應該係百事!

    回覆刪除

Related Posts Plugin for WordPress, Blogger...