2015年9月13日星期日

帶眼識人 ‧ 後記


Blog友買霸王衫唔比錢事件後 (網誌),
我無意中搵到對方送衫既女仔朋友FB (下稱L),
於是我pm 咗L,告知L 送衫比佢既人無比錢~
我同L 並唔係FB friends,預咗L 未必睇到個pm,
殊不知2星期後竟然收到L 回覆......









以上只係我同L 一部份對話既節錄,
睇完L 同我講既野之後,我真係覺得好震驚!
我一直以為果個人只係貪心先託我買野唔比錢,

我真係完全無唸過佢仲周圍問人借錢唔還,
而且用既係同一手法 - 永遠都係同人講"聽日過數",
但永遠都係得個講字......
L 其中一位朋友借咗1萬蚊比依個人,
幸好最後搵收數佬追數攞得返d錢!
(唔怪之唔理我依d只爭幾百蚊既魚毛蝦毛啦......)


依個人當初託Mr.T 畫咗3件漫畫t shirt 
(2件送比一個男仔 + 1件送比L)
佢亦曾經同我講過已將衫送咗比男仔 + L ,佢地都勁鍾意d衫.....


不過根據L 所講 - L + 個男仔根本從來都無收過d衫!
個男仔亦從來無向依個人表白過!!


我唔知點解依個人要講咁多大話,
而家睇返轉頭,發現依個人今年根本無同我講過一句真話!

最可笑係我發現依個人最近將Whatsapp 既大頭相換成一句金句 - 
"留三分餘地給別人,就是留三分餘地給自己"
原來依個世界真係有丁蟹 - 錯既永遠係其他人.......

坦白講L 同我講咗依個人咁多野之後,我並無心涼或抵佢死既感覺,
以我所知依個人背景唔係亂七八糟,唔係無讀過書,
唔係無親無故,更加唔係窮到住劏房,為乜野咁後生就要周圍呃神騙鬼,
仲要盜用人家個人資料去財務公司借錢,攪到比收數佬追數?

Miss.N~ 我一d都唔可憐妳同情妳,但我真係覺得好可惜,
生活上有唔如意,並唔係妳去做壞事既合理理由!
路係自己揀既,妳好自為之啦~


睇過上一篇 + 依一篇既你/妳,姑勿論你知唔知道Miss.N 係邊個都好,
又或者你是否抱住食花生既態度,我都希望依件事大家會有個警剔!
依種人世界上唔止得佢一個,莫講網友,有時自己身邊既朋友甚至係親人,
都可能會係依種人! 防人之心不可無~








8 則留言:

  1. 回覆
    1. 對付佢依種人,報警係無用既!
      尤其係借錢比佢時無立借據, 咁報來有咩用?
      佢用L 名義做財仔擔保人,L 去差館都只係可以備案

      刪除
  2. 希望呢生人都遇唔到呢種人

    回覆刪除
    回覆
    1. 其實我相信每一個人或多或少都會遇到依種人,分別只係在於level 唔同
      而家一炮過知道哂依個人所作所為都係好既,都算係一個人生閱歷嘛 LOL

      刪除
  3. 呢d人好得人驚呀~太恐怖...其實講大話好辛苦啫, 自己又要記住同咩人講左d 咩大話喎, 何必呢~!
    希望大家以後都唔好再偶上呢d無謂人 :)

    回覆刪除
    回覆
    1. 佢講大話不知講得幾輕鬆呀! 幾大聲理直氣壯話自己寄咗張票比我呀,其實根本喺度虛張聲勢,不知所謂

      刪除
  4. 可能條友自己患左妄想症。。。乜都老作

    回覆刪除

Related Posts Plugin for WordPress, Blogger...