2016年3月24日星期四

準爸爸Mr.T

24w (託賴個肚仲係白白滑滑無老虎紋! ^^)

成日聽人講大肚婆既情緒除咗受荷爾蒙影響之外,
另一個最大關鍵就係大肚婆既另一半.......
如果係真的話,我相信身為準爸爸既Mr.T 絶對可以攞distinction! ^^
自從有咗123之後,我發現Mr.T 比以前更加細心~

陀住3位公主真係好容易攰! 尤其係20w 之後......
就算Mr.T 放假,出街一陣食個午餐後,我就會眼瞓想返屋企,連街都唔想行~
不過一覺醒來發現Mr.T 已經清潔好哂6隻鼠鼠既籠 + 洗哂廚房d碗;
一入浴室聞到一陣濃烈既檸檬Cif 味道 - 浴缸浴簾都比佢洗到乾乾淨淨!
我覺得好感動...雖然佢一次過用咗我大半枝全新啱啱開封既Cif...... LOL


早前有人叫我要將鼠鼠送比人!
(P.S. 唔係V爸爸V媽媽,亦唔係我6299,更加唔係Mr.T!)
我一早已問過醫生,醫生話無問題,我養得佢地就唔會因為有咗BB而唔要佢地,
一定唔會將佢地送比人! 
不過Mr.T 話鼠籠太重嚴禁我清理,以後由佢來負責清潔~ ^^


12w 前好誇張幾乎晚晚半夜都餓醒要起身煮宵夜! =_="
12w 後正常返好多,但間中都會半夜突然發神經想食野......
例如半夜2am 想食sausage supper,Mr.T 永無托手踭,即刻出去買比我~ ^^


我每日例行公事: 鐵丸、葉酸、baby aspirin + Clexane 薄血針
baby aspirin + 薄血針都係防止血栓 + 確保血液循環,
好多多胞胎孕婦都要用依2隻藥,
阿V由細到大都超級怕打針! 而家每日要自己拮自己一針,
已經拮足幾個月,連我都好佩服自己!


其實我真係超憎依枝薄血針!!!!!!! 針又粗,而且要全枝針直插入皮膚,
無論你幾小心幾細心手勢幾好...都一定會痛 + 會瘀! 
有時果針打正喺肌肉,針窿仲會不停流血...不過為咗123係值得既~


阿V本身無乜肚腩,有一排真係打針打到肚兩側都佈滿大片瘀血,
Mr.T 覺得我好慘,於是不停上網幫我尋求可以無咁痛 + 無咁瘀既打針方法,
之前試過好多唔同方法或打針位置都唔太work,不過Mr.T 無放棄到.......

最近佢終於幫我搵到一個so far 最好既打針方法...一個字 - 慢!
插入去要慢...按針要更加慢...抆返枝針出來都要慢...總之慢~ 慢~ 慢~
(好重要! 要講3次!!) 我個肚大片瘀血終於散得七七八八! ^^


20w 後個肚大得好快! 123開始頂到上胃....... 


開始有胃酸倒流,而且情況越來越嚴重!
有一晚半夜4點幾突然火燒心燒醒咗,Mr.T 即刻彈起身出去買胃藥比我,
仲做埋"男丁格爾"餵我食藥,雖然好辛苦,但見佢咁緊張我個心好甜~


個肚越來越重,重到我每日背脊都好痛......
第二日Mr.T 即刻帶我去Mothercare 買托腹帶~


每日Mr.T 放工返來,第一句就會問我: 今日有無唔舒服呀?
然後就會對住我個肚: 妳地有無曳呀?

21w 開始胎動比之前大力咗好多(第一次感覺到係16w!)
間中我用手摸緊個肚都感覺到! Mr.T 知道後都好想感覺下,
所以成日放隻手喺我個肚上面,不過123好似想整古佢,
依頭明明連續郁咗幾下,但Mr.T 一摸我個肚,佢地又即刻靜哂! XDDD
於是Mr.T 好好笑"恐嚇"佢地: 我一陣去買雪糕食,妳地無份!! LOL
上星期23w Mr.T 終於得償所願,臨瞓前連續感覺到2下胎動,
佢仲開心到鍚咗我個肚2啖~~

感謝Mr.T 依6個月來對我無微不至,讓我盡情撒嬌,仲成日講爛gag 氹我 LOL
唔需要大屋名車,亦唔需要珠寶名牌禮物鮮花......
因為我既好老公已經係我最耀眼既閃光!
我知道Mr.T 將會係一個好爸爸! I love you~








45 則留言:

  1. 好登你開心,努力加油呀!

    回覆刪除
  2. so sweet.....你老公真的很细心

    回覆刪除
  3. 感覺胎動果一刻,真係好開心好回昧啊。阿V,樣樣小心,努力加油呀!

    回覆刪除
  4. Well said, very sweet, very touch.

    回覆刪除
  5. 我就係啱啱生完孖女,我反而26weeks之後開始流好勁鼻血30 分鐘都止唔到,所以有時要自己停食baby asprin, midwife 話係正常冇計,但係如果停唔到要去a&e 燒血管

    回覆刪除
    回覆
    1. 我無妳有既問題,若有既話都係會先打電話問midwife,依d野第一次NHS產檢已清楚解釋哂

      刪除
  6. 好sweet啊!! enjoy your pregnancy~~

    回覆刪除
    回覆
    1. 其實而家懷孕中期,仲辛苦過12w 之前,不過我好享受依種辛苦 :))

      刪除
  7. 唔怪之得見到一大块瘀,爸爸媽媽真偉大,B123妳們好幸福啊!

    回覆刪除
    回覆
    1. d瘀而家已經比之前好咗好多好多嘞 :)
      世上每個父母都好偉大,所以真係要鍚 + 孝順爸爸媽媽啊~

      刪除
  8. 唔怪之得見到一大块瘀,爸爸媽媽真偉大,B123妳們好幸福啊!

    回覆刪除
  9. 一見到第一張相仲留言問做咩瘀左~仲以為你之前太瘦拉得太勁,哈哈!!
    但睇落去就知點解, 為人母則強~所以枝針幾惡頂你都頂到~不過你真係好勁, 我見到都怕怕
    我成日都好好奇, 多過一胞胎既胎動係咩感覺~因為我覺得陀住一個感受到既胎動己經好得意, 如果有連續2個或以上既BB係到郁, 一定仲搞笑~
    繼續好好享受孕期

    回覆刪除
    回覆
    1. 而家d瘀已經好返好多好多嘞! 初時唔識打,d藥未出哂就抆枝針出來,攪到要打多枝 XDDD
      原本係打喺肚池側邊架,係個肚越來越大,拉到d針位去哂下面 LOL
      妳咪睇我打咗幾個月好似好堅咁呀,其實我仍然好驚打針,有時難搵位攪成10分鐘至打到枝針呀
      郁得最多最大力就係B1,有2次失驚無神好大力,攪到我自己都有少少嚇親 XDDDD

      刪除
  10. 鼠鼠一直養開無問題既,支持!!

    睇見枝針我都感覺到你係好媽媽,加埋MR T 呢個絕世好爸,你地一家好幸福,會一直睇你地放閃,我都不知不覺好愛你地一家,好期待見到3位V小姐健康可愛地成長!!

    回覆刪除
    回覆
    1. 鼠鼠絶對唔會放棄! 佢地一樣係生命來,就算將來BB出咗世我都會照養,只係唔會一次過養咁多隻 =P

      其實洗唔洗打針都好,每一個懷胎十月既都係好媽媽啊! 小車妳都係呀~ ^^

      刪除
    2. 公主們出世後,你加MR T 都會好忙,到時你地真係未必可以好好照顧鼠鼠,我支持你唔放棄,但萬一真係太辛苦,我亦會理解你所有安排!! ^3^

      刪除
    3. 而家養緊果6隻一定唔會放棄,照顧打理佢地唔難,會一直養到佢地去彩虹橋,如果到時真係攪唔掂的話,一定有朋友可以暫時幫我地睇住先~ ^^

      刪除
  11. Mr.T真係一個好老公同爸爸, 你都好叻呀V! 加油呀!!!支持你~~
    Nicole

    回覆刪除
  12. 見到瘀左咁大撻好痛呀 >__< 記得, 慢⋯慢⋯慢!

    回覆刪除
    回覆
    1. 之前因為怕,越怕就越想速戰速決快手攪掂,結果打到個肚大撻瘀血,而家慢慢來真係痛 + 少咗好多好多,但要keep 住枝針喺裡面耐d囉 =P

      刪除
  13. mr t 真係絕世好老公, 自動做家務, 你地一家 5 口都好幸福呀~
    羡慕 c 人~ 閃閃閃 ^v^

    回覆刪除
    回覆
    1. Thank you ^^
      平時除咗倒垃圾 + 抹窗之外,其他家務我都唔比Mr.T 做,因為我要求高好奄尖,一定要經自己手先安樂 =P 而家一下子佢要做多咁多野,我除咗感動,個心有少少過意唔去呢

      刪除
  14. 你好,我放產假嘅時候,無意中睇到你嘅網頁,唔經唔覺我小朋友已經三歲喇。真心祝福你哋一家幸福快樂!

    回覆刪除
  15. 加油!!
    見到D瘀痕都覺得痛,媽媽永遠是最偉大!
    還有好老公!

    回覆刪除
    回覆
    1. 多謝~ 瘀血已經好返好多嘞! 同之前相差好遠呢~ ^^

      刪除
  16. 見到瘀痕,好感動。一定好痛了。
    加油加油
    期待和3個bb見面。
    不過bb唔好心急,住耐點啊。大隻點先出生好湊D。

    回覆刪除
    回覆
    1. Thank you auntieselina ^^
      之前大撻瘀痕真係會痛,因為裡面積住一大塊瘀血硬硬的,一坐直塊瘀血會頂住大肶
      針又唔可以打已經瘀咗既地方,每日都好難搵位打針,加上果時唔識打,打親都會瘀,結果攪到撻瘀越來越大撻 :P

      刪除
  17. 見到瘀痕,好感動。一定好痛了。
    加油加油
    期待和3個bb見面。
    不過bb唔好心急,住耐點啊。大隻點先出生好湊D。

    回覆刪除
  18. London成日天陰陰,我幅太陽眼鏡好耐無出動。
    估唔到夜晚睇你blog就要拎出黎戴^_____^
    好閃不過好凳你開心!!!!

    見到top圖仲想問你做乜瘀左,原來已經係散瘀中@@
    嘩……真係見到都凳你痛,Mr.T都一定好心痛,你記住有咁慢得咁慢!!

    回覆刪除
    回覆
    1. Thank you 小紀! ^^ 蘇格蘭天氣反而唔錯喎~

      其實d瘀無可能完全散哂架,就算而家打得好,點都會有少少,係依枝針既特點 XDDD 但至少唔會好似之前瘀得咁勁,而家容易搵位落手好多 ^^

      刪除

Related Posts Plugin for WordPress, Blogger...