沒有update 的日子2 (附食譜)

8月19日三餸一湯: 西洋菜煲陳腎; 頭抽豬扒; 白飯魚乾煎蛋 & 清炒Spring Greens

已經N年無見過中式超市有西洋菜賣! 相反撞正洋人超市西洋菜半價，買咗3大包返去煲個靚湯!

不過洋人西洋菜始終太太太嫩，煲出來既湯甜就甜嘞，但始終唔夠中超買既西洋菜香......不過都係好飲既~

 好耐無整過豬扒，就整個老公至愛既頭抽豬扒啦!

 早排喺中超買咗包白飯魚乾......
依度有雪藏白飯魚賣，不過之前買過太鬼大包，溶咗雪後一次過根本食唔到哂!!
白飯魚乾就唔同嘞，煮幾多用幾多~
不過今次可能我浸唔夠水......

 煎出來白飯魚仍然有少少硬身! 但就香口過用雪藏白飯魚~

 西洋菜排骨煲陳腎食譜click here~

 頭抽豬扒食譜click here~


8月20日新舊四餸一湯: 枸杞滾豬肝; Peri Peri 雞翼 & 清炒菠菜

 中超一千零一包枸杞，夏天滾湯快靚正!
雖然Mr.T 唔食豬肝，不過佢好鍾意飲依個湯~
我發現依個湯用來做湯飯都好好味架!!

食物櫃裡面太多汁汁醬醬......

 依枝Nando's Peri Peri 青檸莞茜醃汁本身應該用來整燒雞......

 我就用來醃雞翼!
我唸用焗爐焗會乾身d好味d~ 不過因為我懶唔想開焗爐，於是就咁用來炒......
雞翼會出水，用汁來醃好難炒得乾身，最後變咗青檸莞茜汁"炆"雞翼! 

 枸杞滾豬肝湯食譜click here~


8月23日食自己: 蠔豉排骨粥 & 炒麵

是晚Mr.T OT 唔返來食飯......

 反正佢唔鍾意食粥，我就煲咗大煲蠔豉排骨粥食自己~
排骨係之前煲西洋菜湯，無咩肉既硬骨用來煲湯; 
我特別留起軟骨部份醃鹹來煲粥，所以食粥時完全唔需要累骨!

 因為唔記得買芽菜，所以個炒麵係依隻現成野! (唔記得食咗邊隻味......)
基本上依隻麵應該叫做撈麵多過炒麵，只係剝吓個麵撈個汁已經搞掂!

 一人前一粥一麵又搞掂一餐!
煲粥得我一個人食，但我2餐已經KO咗成大煲粥!!


8月24日兩餸一湯: 冬瓜粒湯; 檸檬雞翼 & 清炒白菜仔

其實我一直都好鍾意飲冬瓜粒湯，不過自己完全未煲過~
原因係依度中超賣既冬瓜一早切定好哂 - 全部都好鬼大塊，一定太多食唔哂!!
不過又真係好想飲又好想試吓自己整，所以千揀萬揀揀咗塊叫做細少少......

 其他材料樣樣少少，加加埋埋又變咗一大煲!
個27cm oval 都唔夠大，要出動到用來炆鴨既31cm oval!!

 不過依個湯又真係好正~ 第二朝加d白飯落去變成湯飯做早餐!


早排超市檸檬大減價，沖咗幾杯凍檸茶都仲係未用哂d檸檬......
加上我最近雞翼癮狂起!!

 整咗依個香噴噴又超級好送飯既檸檬雞翼，個汁用來撈飯仲好正呢~

 冬瓜粒湯食譜click here~

 檸檬雞翼食譜click here~


8月26日兩餸無湯: 檸檬雞翼 & 清炒蝦皮蒲瓜

仍然好想食雞翼!!!!!!!!!
雞翼真係好 - 英國雞翼好平，煮法好多變化，而且我覺得好難會整得雞翼難食!
本來今餐買雞翼時唸住整第二個花款......
不過老公好鍾意檸檬雞翼，上一餐食緊時已開到口叫我再整;
加上見超市檸檬仍然大減價緊......

 再加上我自己都好想食，最後都係再整多次檸檬雞翼! 哈哈~~~~
不過我既雞翼癮仍然未止得到!!!!!!!!!!

我曾經講過我有一個唔係好好既習慣 - 當我一排愛上咗一樣食物，
我果排就會不停咁重覆想食依樣食物，直至食到果樣食物厭為止!

近排除咗上咗雞翼癮之外，我仲好鍾意食蒲瓜!!
買咗條蒲瓜，本來係打算再整蝦醬蒲瓜絲煎餅~
不過是晚我煮飯既時候突然好懶唔想撈煎餅粉漿，
但又無預備到其他餸喎......
於是決定求其將個蒲瓜切片來炒!
但又覺得就咁炒好似寡咗少少......

 於是我唸到雪櫃裡面盒蝦皮，就煮成咗依個清炒蝦皮蒲瓜~
毫無計劃煮出來既依一度菜竟然非常好味，蒲瓜既清甜同烘香咗蝦皮既鹹香非常配合!
最奇就係 - 連對瓜菜有仇既Mr.T 都話正!!

Mr.T 尋日出咗trip，來緊依個星期我又要食自己~
我又買咗條蒲瓜......今次用來煎餅定用來炒好呢?

 檸檬雞翼食譜click here~

 清炒蝦皮蒲瓜食譜click here~

>>>>>>>>>>>>>>>>>>>>>>>>>>>>>>>>>

講到依度，我突然醒起咗一樣野 - 我已經好耐炒菜時無落過蒜蓉! 
(以上咁多餐碟菜全部都無蒜蓉!!)
我覺得就咁用少少油清炒，
只用少少雞粉或香菇精調味既蔬菜仲加好味呢~