2012年12月10日星期一

熱身 (2012年12月9日)


之前話過要忍手,等過年後終極大減價先出擊.......
不過最近出親街都好鬼多人,
個個Xmas shopping
都進行得如火如荼,
感染埋話過要忍手既我!

那麼.......讓我繼續做住少許熱身吧!!


一出街唔夠5分鐘,我已經將佢據為己有!

想買tagine 已經有一段日子,
其實
tagine 喺Glasgow 非常容易買到,TK Maxx 都有大把!

不過奄尖既我首先唔鍾意terracotta!

(但好多tagine 都係terracotta!)
或者係我覺得太貴......唔貴既我又覺得太細;
最"戟手"就係顏色 - 通常都好鮮艷或花喱花碌!
我都認自己諸多要求好鬼煩,
不過我要自己鍾意果樣野,我先會用架嘛........


尋日經過Aldi八卦入去兜個圈,
比我搵到依個半價貨純白28cm
tagine!
無論價錢、顏色或大細都100%完全符合我心水,
大開心 + 大愛!!



雖然早幾個星期因為Mr.T升職,
我已經送咗一條呔比佢~
不過話就話係我送,其實咪又係佢d錢.......


依幾個星期我賣蛋糕賺咗少少錢,
好想用"真正"自己既錢買d野氹吓Mr.T~
本來我今次想送對手套比佢,
不過Mr.T用盡各種藉口阻止我買......
一係話款式怪......羊皮或羊毛手套款式可以有幾怪?

一係話顏色怪......黑色或深啡色有幾怪??

其實講到尾我知道
Mr.T只係鍚我唔想我花錢買野比佢!
不過我同佢講: 咁你自己揀樣野嘞! 我今日一定要送野比你,如果唔係我唔返屋企!!
Mr.T哭笑不得,最終又揀咗條呔!
雖然Mr.T唔想我為佢花錢,不過佢個樣係好冧既~



經過Poundland 入去買野飲,緊係順便兜個圈架啦.......


我覺得依個玻璃tealight holder 好靚啊!


西班牙製造,原料係環保循環再造玻璃~ £1好抵呢!



上星期只行咗Tiger 一陣唔夠喉.......
尋日再去過,發現多咗d新貨,而上星期既舊貨好多都無哂!
睇來佢地生意非常唔錯啊~~~~




一入到去見依個玻璃茶壺得返3隻,即時立咗1隻先!

我想要依種玻璃茶壺已經好耐好耐........大大話話真係有十幾年!
當年初同Mr.T拍拖時去倫敦玩,
喺一間專賣高級茶葉茶具既店見到依種玻璃茶壺,
不過十幾年前好細隻都要£60 - £80! 咁鬼貴真係買唔落手!!

後來喺法國、意大利 + 香港都見過依種茶壺,
不過玻璃薄唔可以寄倉,就算手提都好容易撞爛......
網上買又睇唔到玻璃有無氣泡........
就係咁一恨就恨咗十幾年!

Tiger 依個抵到爛! 我唸應該係平霸全英國 - £7!!!!!
手工仲好好無氣泡邊位又無凹無凸~


仲附有茶葉隔呢!

上星期已經見到依個綑銀邊既2層cake stand,
不過當時心大心細唔知買唔買好,
返到屋企唸吓唸下先決定要買.........
點知今個星期去到竟然一隻都無!


隨口問吓店員仲有無貨,
佢話已經賣哂,遲吓先會再返貨........
點知我排緊隊比茶壺錢時,
佢拍一拍我膊頭話搵到最後一套喎! lucky~





Glasgow German Market 已經開咗幾個星期,
不過無點認真行過........ 

講真頭幾年啱啱有Xmas German Market 時就覺得幾好玩,
不過近年發現 - Xmas German Market 年年大同小異都係果d野,
而且舊年去過Birmingham 既German Market........
同Glasgow 既無乜分別!



本來想買盆花,不過抽住幾袋shopping 好難揀,作罷!



經過依檔燒全豬,
檔主竟然喺玻璃上寫上Justin Bieber 作招徠!
成功引到好多人遊人影相....包括我!!


見佢地有炸豬皮賣,買咗包當零食~




Photobucket

16 則留言:

  1. 呵呵呵。。。又係我呀

    玻璃茶壺同cake stand 都好靚!

    再造玻璃花啲色咁得意既,好似啲煙霧咁喎
    [版主回覆12/11/2012 05:31:24]哇~ 妳真係唔洗瞓果喎!

    真係好鍾意依間叫做Tiger 既新舖頭!

    回覆刪除
  2. 好有興趣睇下你廚房用具點放置法,因為平均每個禮拜都有買新野,點樣可以放好唔同形狀的用具呢
    [版主回覆12/11/2012 19:19:30]點樣可以放好唔同形狀的用具呢 <//// 只要廚房有位就可以

    回覆刪除
  3. tagine用黎做咩架??個形狀咁怪既?
    [版主回覆12/11/2012 19:18:01]tagine 係北非及地中海一帶常用既煮食用具,塔形蓋另食物中水份產生對流作用,所以煮食時唔需要加水,燜出來既肉會原汁原味 + 好腍~

    回覆刪除
  4. 過Christmas都係英國好氣氛。
    Justin Bieber~~
    [版主回覆12/11/2012 19:18:28]都係架! 話時話我2年無喺英國過聖誕嘞....

    檔主幾攪笑~~~

    回覆刪除
  5. 我都好想知tagine點用..係未炆野呢?
    [版主回覆12/11/2012 19:16:27]係呀~ 爐上或焗爐用都得! tagine 係北非及地中海一帶常用既煮食用具,塔形蓋另食物中水份產生對流作用,所以煮食時唔需要加水,燜出來既肉會原汁原味 + 好腍~

    回覆刪除
  6. 那个“tagine” 怎么用?看到很多地方有买,但不知到要来做什么菜? Mrs T 我昨晚做了一个海面蛋糕(本来今天准备放cream 和水果)可是蛋糕从oven 拿出来后就变的很扁很扁了? 是什么问题?
    [版主回覆12/11/2012 19:15:35]tagine 係北非及地中海一帶常用既煮食用具,塔形蓋另食物中水份產生對流作用,所以煮食時唔需要加水,燜出來既肉會原汁原味 + 好腍~

    (1) 首先妳係咪跟我既食譜整? 妳用幾大蛋糕模? (2) 出爐前妳有無插吓蛋糕中間確定蛋糕已熟透? (3) 妳有無倒扣?

    回覆刪除
  7. You and Mr.T is so sweet!
    [版主回覆12/11/2012 19:10:44]Thanks Alice!

    回覆刪除
  8. 好少人鐘意白色...我見反而粉色好受歡迎
    [版主回覆12/11/2012 19:10:21]我咪鍾意白色囉! 我廚房95%碗碟廚具都係白色,其餘5%黑色佔大部份另加極小量其他顏色或花紋~

    回覆刪除
  9. cake stand 好靚~~~ simple elegant!!!
    [版主回覆12/11/2012 19:06:35]simple elegant </// that's why i like it!

    回覆刪除
  10. 賣炸豬皮?我以為祇是美國人喜歡叫?
    [版主回覆12/11/2012 20:02:52]pork scratching 係英國傳統pub snack 來,間間超市有售

    回覆刪除
  11. 減肥中的WiNniE-->變左陀b中的靚媽^^2012年12月11日 上午2:17

    燒豬同Justin Bieber有咩關係呢???
    [版主回覆12/11/2012 20:07:03]連一個簡單笑話要畫公仔畫出腸咁去解釋的話,就實在太無癮了.....

    回覆刪除
  12. Justin Bieber 唔知好唔好味道
    [版主回覆12/12/2012 17:42:27]我地果日去已經晏晏地嘞,佢地開檔時係整隻乳豬仔咁一路轉一路燒架!
    今年依檔我地只買咗包豬皮,往年食過,新鮮熱辣好好味架!!

    回覆刪除
  13. 我都好鐘意個個tea pot
    [版主回覆12/12/2012 17:39:40]下次來Glasgow 行街時,不妨去Tiger 逛逛~

    回覆刪除
  14. 炸豬皮 是不是即食 口感同味道怎樣
    [版主回覆12/12/2012 17:38:47]係即食架! 味道似中式燒肉既燒豬皮,但口感就脆得來硬好多~ 不過口痕時係幾好既零食來!

    回覆刪除
  15. tealight holder真係好靚呀..好似d煙咁呀..
    [版主回覆12/14/2012 21:43:41]應該係用咗唔同顏色既循環再造玻璃造成既效果!

    回覆刪除
  16. mrs T 買左2層cake stand,好期待你整個HIGH TEA SET出來啊,HEHE~~~
    [版主回覆12/18/2012 21:23:05]香港好多人都一直將Afternoon tea 叫錯做high tea,high tea 係藍領工人階級既early dinner,根本同cake stand + 飲茶無關! 我都喺blog 中唔止一次講過~
    [C.C回覆12/18/2012 17:42:43]咁我一直都搞錯左,
    [版主回覆12/17/2012 05:02:03]英式下午茶叫做Afternoon tea,high tea 係錯既叫法! 係兩樣完全唔同既野來~

    回覆刪除

Related Posts Plugin for WordPress, Blogger...