Dumpling Inn 餃子館 (2014年12月14日)

幾個月前經過Sauchiehall Street 見到招牌仲裝修緊，當時唸第日開張時要去試吓! 後來完全忘記咗依件事.......

直至星期日天氣凍冰冰又落雨，雖然Christmas Market 食物好吸引，但咁既天氣真係唔想企喺條街加料西北風配雨水! 依個時候依間店突然浮現我腦中!! (已經幾個月應該開咗張嘞啩!)

星期日中午時份，店裡面一枱客人...都無! Mr.T 仲懷疑未開門......不過其實一d都唔出奇 - d人星期六去夜蒲，中午應該仲係hangover 緊!!

天氣凍要食熱辣辣既野，最好係有湯...我既五香排骨麵~
湯底太淡唔夠味; 排骨份量多食極都有，炆得淋但無咩味，亦食唔出所謂既五香......
麵...佢地叫"手幹麵"，但其實佢地FB 有張相係用電動壓麵機啤出來既......
個麵反而唔錯，唔會太淋彈牙有咬頭，而且份量超多，其實一碗二人分都夠!

Mr.T 既香煎豬扒麵~
味道幾乎同我果碗一模一樣! 湯底 + 豬扒都係唔夠味...兩碗麵既水準只係麻麻~


咁間店叫做"餃子館"，當然要食餃子啦! 佢地既餃子有湯餃、煎餃 + 鍋貼~ 
由於我地點湯麵已經有湯，所以我地唔再點湯餃，點咗煎餃 + 鍋貼.......

雞肉香菇鍋貼~ erm......雞肉食得到，至於香菇以我理解應該係冬菇先啱，但我食到既係蘑菇 + 粟米.......(滴汗~~~~~)

三鮮煎餃~ 三鮮即係豬肉、蝦 + 韭菜，肉餡攪到爛哂，我只食得出豬肉 + 韭菜，唔知係咪真係有蝦?
不過依個值得一讚，皮脆餡亦多，而且一咬會標熱辣辣湯汁，唔理佢有無蝦，依個真係好食!


依餐埋單好平，但食物水準只係不過不失~ 果碟三鮮煎餃成功挽回咗我唔再幫襯既心! 
不過下次再去我唔會點湯麵......
食完依餐我對煎餃定鍋貼覺得好confused!! 
除咗包法 / 形狀唔同之外，究竟有乜野分別??
睇佢地既FB，見到有洋人客人留言話係佢食過最正宗既中菜...我笑了~~~~

https://www.facebook.com/dumplinginn