二人世界四餸一湯 - 2014年12月12日 (附食譜)

紅蘿蔔菜乾羅漢果煲瘦肉; 蝦醬蒸雞翼; 家常豆腐; 蒜蓉蒸魷魚膏; 清炒春綠

今朝起身已經感覺唔係好凍，一望溫度計見到有10C好開心! ^^
因為上星期曾經試過零下 + 濕雪，依兩樣野加埋等於Mr.T 瀨野，
零下 + 濕雪 + Mr.T 瀨野 = 阿V瀨埋野!!
剛剛好返，溫度又暖返d係好事來既~ ^^

每次Mr.T 感冒，10次著咗9次半都會傳染埋我，而我依9次半必定會喉嚨痛!!
喉嚨痛要飲返d滋潤湯水潤吓喉...咁就煲個紅蘿蔔菜乾羅漢果煲瘦肉啦~

蝦醬蒸雞翼...本身想整炸或煎香口d既方法，不過喉嚨痛就緊係唔好食煎炸野啦! 蒸啦!!
蝦醬蒸雞翼食譜click here~


 
依味喺Cardiff 中菜館食過已決定老翻，雖然我唔記得買青紅椒，但味道已老翻成功!
重點係用咗自家製豆腐，滑滑又充滿豆香，我決定以後都自己整豆腐，唔再買中超果d"白色無味野"!! XDDDD
自製手工豆腐(熟石膏)click here~

家常豆腐食譜click here~

蒜蓉蒸魷魚膏...依味其實係實驗性質既"廢物利用"!

是咁的...12月頭阿V用急凍吊筒學人整韓式生醃魷魚，劏開魷魚後要去除魷魚內臟......
其實依隻急凍吊筒我成日買來食，打邊爐必備~ 所以我知道依種吊筒好多"膏"，
而且我好鍾意食d"膏"，掉咗佢好浪費啊........

我醒起細個時V婆婆 + V媽媽間中喺街市買到大大舊墨魚膏，用鹽醃一晚，第二日加大pat 蒜蓉 + 少少油蒸熟...鮮味鹹香直吞兩大碗飯! (而家唸返起都流口水~~~)
於是我照板煮碗用切出來既魷魚膏醃鹹蒸熟，雖然無墨魚膏咁香，但一樣鹹鮮好好送飯呢!
而且...Mr.T 唔吼，我可以一個人獨享依份兒時既美味回憶!! ^^
(膽固醇嘛! 知嘞知嘞!! 我又唔係日日食........)

清炒春綠...Spring Greens 係英國超市一種好平而且四季都有供應既蔬菜，
口感味道比較接近中國人慣食既蔬菜，我ex 既媽媽叫Spring Greens 做"鬼佬芥蘭"~
一直都唔知Spring Greens 既中文名，而事實上好似無正式中譯名字.......
不過早前無意中見到有人叫Spring Greens 做"春綠"，我以後都叫佢做春綠咯! ^^