二人世界鹽板燒 (2015年3月22日)

想買喜瑪拉雅山粉紅鹽板好耐嘞! 
不過之前喺英國唔多覺有得賣; 返香港買...塊野咁鬼重浪費行李磅數......
早排終於比我喺愛丁堡一間廚具精品店見到，
但細細塊只夠位燒幾隻蝦仔都要成£50...慳家孤寒賢妻緊係唔捨得啦!!

本來唸住放棄...殊不知有日無意中比我搵到一間英國專賣喜山鹽產品既網上店，
大大塊12" x 8" x 2"竟然只售£18! 仲要免郵 + 超快送貨!! 即刻扑槌!!!
(超級重啊~~~~~~~~)

網上睇到美國有依種專for 鹽板既架，不過喺英國唔多覺有得賣........
其實唔一定要用架既，不過有架就方便 + 安全好多囉!

幸好就快到BBQ季節，比我喺TK Maxx 搵到依種BBQ蔬菜烤盆!
(啱啱先發現係一樣牌子!! @@)

密窿...防止BBQ時蔬菜碌來碌去跌入炭裡面~

用來放我塊鹽板size good fit 到漏油!!! ^^

是晚我預備咗...肉類: 黑椒豬肉丸、雞胸肉、只用香草 + 孜然粉醃過既羊冧肉.......

海鮮類: 三文魚、魷魚、大蝦.......

蔬菜類: 露筍、翠玉瓜、雞肶菇、蟹味菇~

開始燒咯~~~~~ ^^

用鹽板燒烤既好處:
- 燒烤食物唔需要預先醃製調味
- 鹽板存熱效果良好，食物好快熟
- 零油煙 + 唔會燒燶 + 唔會黐底 + 唔會熱氣
- 食物鎖水極度juicy 唔乾水

無論燒烤肉類、海鮮或蔬菜佳宜!

鹽板燒烤尤其適合海鮮! 喜山粉紅鹽味鹹得來帶回甘，同海鮮天然鮮甜味非常配合~


網上見到好多人會用焗爐來加熱鹽板，
不過我睇過一段YouTube 有一位廚師唔建議用焗爐......
原因係鹽板內外都可能有肉眼見唔到 + 皮膚觸摸感覺唔到既水份，
將鹽板放入焗爐內加熱，焗爐內熱力來自四方八面，有可能令鹽板爆炸! (好得人驚啊!!)
當然好多人用焗爐來加熱鹽板都無問題，但唔怕一萬至怕萬一.........
而且視乎鹽板大小，用焗爐來加熱最少要30分鐘至1小時，咁鬼耐等到頸長都未食得......

用明火來直接加熱鹽板，只需先用小火加熱5至15分鐘(視乎大小)，
待鹽板有溫度後轉中火就可以開始燒烤~ 鹽板加熱穩定後溫度可達160C+!

至於清洗方面......食材流出來既汁液會殘留喺鹽板上，
待鹽板室溫完全冷卻後，用一個依種無皂既網絲刷加少許清水擦去殘留物......
(唔好用洗潔精啊!!!!!)

再用凍水沖洗一下後抹乾，放喺通風地方自然風乾，就可以用膠袋包好收藏~


鹽板經煮食 + 清洗後，鹽份會慢慢流失折舊，
視乎鹽板大小，壽命會有長有短，但只要正確使用，最少都會有幾年至十年壽命;

鹽板折舊後可能會分開，只要分裂既鹽塊唔太細塊e.g. 裂開2至3塊，
用holder 拼合仍然可以正常繼續用來燒烤;

到咗某一個point...鹽板會裂 / 碎到唔可以用來燒烤，
(講緊正常 + 正確地使用好耐好耐好耐之後.......)
依個時候千其唔好唸住掉咗佢喎! 到時可以將鹽塊敲碎，
放入鹽磨或直接用金屬磨當調味鹽來用~ 整塊鹽板都可以物盡其用唔會浪費架! ^^