2015年3月13日星期五

減少浪費! 蒜頭、薑和辣椒的存放方法

唔知大家有無遇過以下情況呢?

喺英國超市買蒜頭,有散裝單一個或一pack 幾個,不過散裝蒜頭通常都甩皮甩骨,
蒜瓣乾爭爭無香味兼十次著咗十一次已經標綠芽,賣相食味俱劣! 
相反pack 裝蒜頭就圓碌碌實谷谷好飽滿,搣開蒜味十足又多汁,非常新鮮~ 
所以我一定會買pack 裝蒜頭!

不過一pack 有3至4個,莫講話一pack,煮一餐都未必用得哂1個,
蒜頭並想像中咁耐放,室溫就咁擺喺度,慢慢又會變到乾爭爭無香味有綠芽.......

蒜頭同洋蔥 + 薯仔一樣 - 唔適合放雪櫃~
我以前會將多餘蒜頭用機打成蒜蓉,浸油放入雪櫃保存,
但一來要做多重功夫; 二來阻雪櫃空間; 三來食味始終比新鮮剁蒜蓉差;
四來唔係每個菜式都適合用油浸蒜蓉......實在太多缺點!



除咗蒜頭之外,薑都係另一個曾經令我好頭痕既問題........
薑,我鍾意買一大舊飽滿多汁實谷谷,比較少小塊凸出來既薑! 
我要切薑片時每一刀都可以一刀過切出一大片,
唔洗切細細片鬼鬼鼠鼠湊埋幾塊先夠用...(不過V媽媽竟然鍾意用細細粒.......)

不過切過既薑放喺室溫,切面暴露於空氣之中水份快速流失,切面開始凹陷,
成舊薑好快變到乾爭爭輕飄飄,香味亦會隨水份一齊消失; 
未切既薑擺多陣又會標綠芽......

咁一次過切哂薑片包好放入雪櫃囉...試過! 但完全無哂薑既香味......
亦試過一舊薑切過後用三文治袋包好放雪櫃,仲恐怖...切面發綠毛!!!!!!!
就係咁,曾經有無數乾咗/發咗毛既薑 + 標綠芽無香味蒜頭入咗阿V廚房個垃圾桶!


之前從網上睇到一個可以延長蒜頭 + 薑保存期既方,就即管試吓啦......
試咗已經幾個月,發現依個方法果然好掂! (比我預期掂好多好多好多!!)
依幾個月來,阿V真係無再浪費過一瓣蒜頭一片薑,好開心~

依個方法花費不多,你需要既只係一卷鍚紙!


鍚紙剪成細塊,將整個蒜頭緊緊包住......


薑亦係一樣...就係咁簡單! ^^


用鍚紙包好但仲未用既蒜頭 + 薑,放喺通風陰涼既地方保存 - 我會放入薯仔袋~


至於搣開過既蒜頭 + 切過過既薑,用剩一樣用鍚紙包返,放喺就手既地方~


搣開過既蒜頭包住就算放一排,再用時一樣新鮮多汁!


而切過既薑,就算超過一星期無再用,再打開時切面都唔會凹,唔會發毛亦唔會乾水~



 
依種紅辣椒綠辣椒喺英國超市好常見,有單色或混色,通常一小包3至4隻~
除非用來整醃漬,否則每次頂哂龍只用到1隻,
剩低雪櫃先摷皮後變稔腐爛...最後又係去垃圾桶......


用剩既辣椒,可以用針線穿過辣椒綠色蒂部最粗既部份.......


串成一串掛起等佢地慢慢風乾 ^^
完全風乾變成辣椒乾之後,你可以唔理佢一直掛喺度;
又可以將辣椒乾磨成辣椒片或辣椒粉~


想風乾得快d,當然可以用Food Dehydrator......
不過串住掛起來風乾一來唔洗用電,二來可以當裝飾! XDD








19 則留言:

  1. 我見到士多啤梨乾乾乾~~~!!!! 正!!~~ (錯重點HAHAHAHAHA)

    回覆刪除
    回覆
    1. 係之前風乾比鼠鼠做零食! 無添加比較健康~ ;;) (我都有偷食......)

      刪除
  2. 勁有用!我中意買非常大舊既薑,唔中意碎嬸嬸果d,次次再用時都乾左好多!好浪費!以後可以用呢個方法,thanks!

    回覆刪除
    回覆
    1. 薑太大舊我會搣開來包,用完一塊先再開另一塊~ 始終每次切都要打開鍚紙,水份一樣會流失!
      啱啱知道依個方法時唔知work 唔work,特登做白老鼠試完work 先寫出來 :D

      刪除
  3. 多謝分享!謝謝!
    sammi wong

    回覆刪除
  4. 你的分享好有用,謝謝你!

    回覆刪除
  5. Thank you V嘅分享, 好有用吖!

    回覆刪除
  6. 呢個一定會試,,唔洗等到D蒜頭發晒芽 lu..thx

    回覆刪除
    回覆
    1. 其實發哂芽既蒜頭都唔洗掉咗去,可以用少少水養住,等佢繼續標芽,標到好長可以切段用來炒餸架! L-)

      刪除
    2. 吓! 完來咁都得...又會試

      刪除
    3. 不過要標到好長先夠用來炒喎! XDDD

      刪除
    4. 要標好長....我諗我忍唔到 lu..XDDD

      刪除
  7. 我都唔知原來可以咁保存, 呢個方法我一定會試 !!! good ga
    唔止薑尤其係蒜頭, 一到夏天d 可惡既芽生長速度更加快,我都不知扔左幾多了....

    回覆刪除
    回覆
    1. 其實發哂芽既蒜頭都唔洗掉咗去,可以用少少水養住,等佢繼續標芽,標到好長可以切段用來炒餸架! L-)

      刪除

Related Posts Plugin for WordPress, Blogger...