老翻元朗B仔雞翼尖

其實...我未食過B仔雞翼尖...連B仔雞翼尖真身既相都未見過，網上搵到各人翻煮既相片...不過見咁多人整，煮法非常簡單，個樣又好似好好味，我又煮埋一份! ^^

英國既超市 + 凍肉舖係無雞中翼、雞翼槌或雞翼尖賣既，要買就買雞全翼!
依一包係我煮雞翼時斬下儲儲埋埋近半年既成果......
(P.S. 新鮮未經煮熟既家禽類斬件後，放冰格保存期為9個月~)

睇過好多個B仔雞翼尖既食譜，全部材料份量都一模一樣! (都係1磅雞翼尖做單位~)
我儲埋依包份量多少少有550g; 平時用來煮餸枝紹興酒咁啱又剩返dd，
所以我自行勺量增加咗各材料份量~

1. 雞翼尖550g 解凍後沖洗一下後汆水。

2. 撈起雞翼尖，用凍水浸15分鐘後瀝乾備用。

3. 細蒜頭3個剁碎; 紅辣椒3條切粒備用。
(P.S. 原食譜1磅雞翼尖用6隻指天椒~ 不過我買唔到指天椒，所以改用依種手掌長既幼紅椒!)

4. 鍋中倒入紹興酒7湯匙加熱。(啱啱好剩返7湯匙用哂佢! XDD)

5. 紹興酒滾後加入(2)，再加入清水至剛蓋過所有雞翼尖煮滾。

6. 加入(3)一半的蒜蓉和一半的辣椒片、雞粉2.5湯匙和糖3.5湯匙，拌勻大滾後蓋上鍋蓋，轉小火煮30分鐘。

7. 30分鐘後熄火，加入剩下的蒜蓉和辣椒片，再加入越南魚露1湯匙拌勻(泰國魚露太鹹!)，蓋回鍋蓋再焗30分鐘即成。(我深夜煮無即時食，焗到第二朝好入味! ^^)

雖然未食過真身既B仔雞翼尖，唔知道真正味道係點，
不過依個version 都好香噴噴好好味!
至於係咪真係似B仔...咁就唔知嘞......
  美中不足係英國d雞翼比起巴西雞翼實在細太多太多......
雞翼尖就細上加細，儲咗幾個月食埋都唔夠攝牙罅!! 下次整雞翼可以啖啖肉~