好味越南菜 - The Hanoi Bike Shop (2015年3月8日)

Glasgow 出街食野越來越國際化，越來越多選擇!
廿年前我初來報到，當時週街來來去去都係咖喱、fish & chips 或意大利餐廳;
之後開始有日本菜...再之後有泰國菜馬拉菜...又有韓國菜......

早幾日Mr.T 從網上得知Glasgow 開咗間越南餐廳，
阿V好興奮耶! 因為阿V好好好好鍾意越南菜~ ❤
剛過去既星期日(3月8日)唸都唔洗唸即刻要去試吓! ^^

餐廰位於大學區...Mr.T 帶路，到咗門口: 吓?? 依度!!?!?! @@
因為門口似一間pub 多過一間餐廳......

推門入到去...第一個感覺並非來自非常有大排檔風格既裝璜，
而係果陣充斥喺heater 暖氣中既強烈魚露味道.......

裝修好有特色好討好~ ^^

樓面不大，坐得都幾舒服~

蘇格蘭咁有大排檔特色，感覺好可愛! 即時加咗分~ ^^


坐定定後睇餐牌，問題來嘞...餐廳裡面清一色洋人來既!
依度既東南亞餐廳，通常打正正宗旗號既，staff 當中唔多唔少緊有d自己人，
e.g. 日本餐廳有日本人; 泰國餐廳有泰國人; 馬拉餐廳有馬拉人...etc.
當中以韓國餐廳最均真! 幾乎清一色係韓國人~

講返Hanoi Bike Shop...成間餐廳一個黑髮黃皮膚既人都無，
難道又係一間"呃鬼佬"餐廳?
鎮定d先睇埋個餐牌...唔~ 餐牌選擇不多，但食物都好越南，
至少無咕嚕雞宮保雞依d騎呢野!
(P.S. 我真係喺倫敦唐人街一間越南餐廳門口既餐牌見過咕嚕雞 + 宮保雞.......)
咁點菜啦，食物始終要食入口先知正唔正宗嘛! 不過我已暗地裡將期望調低......

先點咗2個點心...牛肉蒸餃 + 粟米雞肉炸餃

牛肉蒸餃雖然鹹咗dd，不過非常好味 + 絶對越南!

粟米雞肉炸餃都好味，但相對牛肉蒸餃就普通咗d......


食完依兩客點心，我之前"唔正宗"既顧慮已經少咗一大半! ^^
好多人都話 - 要知道一間越南餐廳水準如何，就一定要食湯粉試湯底，
所以我同Mr.T 都點咗越南河粉....... 

Mr.T 點咗豬腩湯河

而我就點咗牛肉湯河 (依間無生熟牛肉之分!)
因為將枱細，湯河來時我拿拿淋將粟米雞肉炸餃墊底既莞茜撥哂落自己碗牛肉河度，
上菜果位金髮藍眼老闆狀既男士見我咁做好開心，大讚我識食! XDDDD


湯河來到時，見兩碗都咁鬼多芽菜，未食已即時要加分! 芽菜係越南菜其中一個靈魂~
另外仲有一碟莞茜、薄荷葉、金不換 + 辣椒片比客人自己加，讚!
未食肉未食粉，先飲一啖湯底...太淡不過好對越南味!
我估湯底應該係故意既淡，用來迎合一d口味較淡既客人，
因為東南亞菜對好多懶係健康既洋人來講太重口味~
依個對我來講太淡既湯底，經我加咗枱上面果樽魚露後，
即時變成我食過最好味既牛肉湯河...8成似!

阿V覺得煮依個河粉既人，無論佢係黑髮黑眼或金髮藍眼，
佢絶對唔會只係睇完BBC 越南菜食譜就開間越南餐廳，
佢一定係越南人 / 喺越南生活過一段長時間 / 正式學過煮越南菜，
否則佢係一個超級天才!! 依間一定會再幫襯~ ❤

The Hanoi Bike Shop: http://thehanoibikeshop.co.uk