開箱文: Bella Casa Digital Food Dehydrator (風乾水果乾)

其實好多年前我已經想買食物風乾機!
當年依種機仲未好似而家咁流行，
我喺一個歐洲家電網第一次見，先知道有部咁既機，
牌子已經唔記得，只記得當時賣得好平，
大約£25左右，因為平，當時真係打算即買......
不過因為部機係2腳歐洲插頭，最終無買到!
加上普通焗爐只要調到最低溫50C，
都一樣可以風乾食物，於是買風乾機既念頭擱置咗~

近年開始流行自己風乾食物，風乾機越出越多，
唔同牌子、價錢、款式、大小、功能......花多眼亂~
除此之外，另一樣令我買風乾機念頭重生 - 就係我d鼠鼠嘞!

唔係話可以用焗爐來風乾咩? 無錯~ 係可以用焗爐，不過......
- 普通焗爐最低溫只有50C; 而風乾機就最低35C到最高70C;
- 太高溫風乾食物，會破壞食物酵素 + 營養，風乾機以低溫風乾食物，令食物水份慢慢蒸發，可保留更多酵素 + 營養;
- 風乾食物需要長時間，短至數小時，長至十多小時，風乾機較定時間可風過今夜，風乾完成會自動熄機; 焗爐則要預定時間熄機，而且開過夜感覺唔安全~

市面上風乾機牌子眾多，價錢由幾舊水到幾千銀都有，
對於依類唔係必需又唔會日日用既廚房電器，我唔會買貴既!
只要用得到又安全就可以嘞~

網上搵到依部用家評價唔錯，仲要減到半價有交易(原價£80)，扑槌!

Digital 調較溫度 + 時間 - 35C - 70C; 最長時間48小時~

有5層風乾格，視乎風乾既食物厚薄，調較每層之間高度，高為3cm;

低為1.5cm

第一次我用來風乾士多啤梨 + 香蕉 - 全部切薄片~
以50C風乾6小時，較好溫度 + 時間，
就完全唔洗理佢可以去做自己野，到時候會自動關機!

風乾後成品只得返2小盒........
士多啤梨本身唔大粒又唔夠甜，但風乾後味道濃縮咗 + 充滿果香，非常好食!
反而香蕉就變得太甜! 可能隻蕉本身熟咗.......

Mr.T 同鼠鼠們爭食風乾咗既士多啤梨.......
隔日再來風乾多次，今次唔整香蕉整芒果~

芒果本身有點生，風乾後味道濃縮咗，酸酸甜甜好好味~ ❤
連一向唔鍾意食水果既我，當零口食吓一塊又一塊...就無咗一大半! =P


大部份水果都屬寒涼，對於體質偏寒既人係禁忌!
風乾機抽去生果水份，又可以保留其營養，
咁就算體質偏寒都可以食水果嘞~ ^^

我養既鼠鼠間中亦需要餵蔬果，不過份量唔可以多，
而且要避免一d含多水份既蔬果，否則鼠鼠好容易會肚瀉!
鼠鼠一肚瀉就好大鑊，仲分分鐘致命架!!
用風乾水果餵鼠鼠就放心得多~

5隻小魔怪都好鍾意風乾水果! 鍾意到連平時既零食都唔吼......


Mr. Buttons 懶到瞓喺度食! 唔怪之佢越來越肥咯...... XDDDDD