Piccoli Piatti@The Italian Caffe Merchant City Glasgow (2014年7月20日)

西班牙tapas 應該好多人都食過，不過意大利菜tapas 你又食過未呢?
意菜tapas 叫做"Piccoli Piatti"，意即"small plates"，係意菜既新興食法~
傳統意菜賣相粗豪兼大大份; 而"Piccoli Piatti"就係精緻袖珍版 - 即係細份d! 
所以其實都唔算好特別...不過portion 細咗，可以一次過點多幾款不同菜式!

成日經過位於Merchant City 既The Italian Caffe，一直都想試吓~
不過Mr.T judges a book by its cover...連餐牌都無睇清楚，
就話太似一間普通咖啡店，無興趣試......

我喺香港期間，有晚Mr.T 同99 + 姑仔食飯，
姑仔訂咗The Italian Caffe，Mr.T 食完覺得好食，是日就同我來食lunch!

點咗6個tapas + 一份麵包~ 雖然係細portion，但樣樣有d夾埋份量都唔少架!

仍然微溫既新鮮麵包，搣開一小塊沾上意大利陳醋 + extra virgin 橄欖油，
食吓一口又一口...不知不覺好快就食哂! 油漬橄欖都好好味，美中不足係未去核~

意式香草燒豬肉
豬肉裡面釀有蒜蓉、迷迭香、百里香 + 鼠尾草，配上鼠尾草gravy.....
燒豬肉肥瘦相間，除咗充滿香草精華，仲有豬油烤後獨有既香氣，
聽落好唔健康...但的確異常美味~~~~

牛仔肉混合豬肉造成既大肉丸配蕃茄汁
蕃茄汁味道極好，肉丸煮得入味又juicy!

黑松露番紅花蟹肉意大利飯
熱辣辣兼香香香香香香香香噴噴~~~~~ 依個最好味!!
飯粒al dente，材料配合得天衣無縫，誰都搶唔到誰既風頭，
雖然好細份，不過因為有芝士所以都幾heavy，每人食幾啖就啱啱好嘞~

意式薄燒吞拿魚扒配沙律
依個係我點既! 初時Mr.T 聽到係吞拿魚就皺哂眉頭，
大概喺佢心目中既吞拿魚一定係罐頭果種咁既味道.........
最後依個竟然成為佢是日最鍾意既菜!
吞拿魚扒極新鮮，外面只微微烤過，裡面仍然半生非常juicy~

青口大蝦意粉
食意大利野一定要有pasta 先似樣...我認為!
有點意外咁細portion 都有咁多青口 + 大蝦 (哎吔~ 影唔到d大蝦.....)
青口 + 大蝦都好新鮮甜美，不過意粉無油水 + 淡而無味，
好明顯佢地係將海鮮 + 意粉分開來煮......

烚三文魚柳配青瓜薄片
依個平平無奇，我個人覺得味道太bland...即係唔夠重口味!
最奇怪係Mr.T 竟然會覺得依個唔錯.......

開餐前Mr.T 細心幫我將每道菜擺碟放得靚靚~ 
賣相靚d，視覺味覺可以同時雙重享受! ^^


The Italian Caffe: http://www.theitaliancaffe.co.uk