滬江大飯店...全日食唔厭! (2014年6月25日)

返香港前後一直都有應不同扑友約食飯，不過我並非"約者不拒"，
基本上我只會應已認識咗一段較長日子，平日多溝通，
仲要啱咀形 + 知道對方個樣既扑友約!

返香港一頭半個月，要逐個扑友約食飯，喺安排時間上有d難度......
但我一早已應承咗部份扑友見面，只係未落實時間，
眼見回英日期越來越近，留港日子越來越短，我想留多點時間陪屋企人~
於是我提議 - 不如一次過約一齊食飯!
是日約咗3位美女扑友: Clara, Joey + Gloria 一齊食lunch，
雖然佢地本身互不相識，不過大家都係大方不拘小節又健談既人，
4個女人好快就雞啄唔斷變咗一個extra large 大墟!

是日...又係食上海野!
本來呢係訂咗位食自助餐，不過麻鬼煩阿V一早醒來胃痛......
經過一輪商量後，決定改食上海野，地點係尖沙咀滬江大飯店~

招牌小籠包...一籠4粒啱啱好一人一粒~

醉香乳鴿...之前同V媽媽去八月花食飯，咁啱醉鴿賣哂...是日要補返數!

清炒蝦仁...依個超讚! 必食~ (好食過某名店"XX春"多多聲!!)

紅燒獅子頭...濃油赤醬既獅子頭永遠好送飯!

醋溜魚

仲有...又係我最愛既炒鳝糊!

依一餐食到...嚴格來講應該係"傾到"飯店晏晝落場熄燈，
阿叔禮貌地請我地過枱再傾過...前後足足4粒鐘! XDDDD

多謝哂各位美女既禮物~ ^^


同美女們午餐之際，V媽媽來電問我幾點返屋企，
有位auntie 訂咗位是晚請食飯，喺尖沙咀食上海野......@@
無在意 + 無問起喺邊度食，講真尖沙咀周街都係上海菜館，
點會唸到咁橋又係滬江大飯店架?

不過世事就係咁...偏偏auntie 訂位請食飯咁橋又係滬江大飯店!
就係咁，同美女們午餐後2粒鐘，我再次踏入滬江大飯店.......

其實午餐時真係傾計多過食野...晚餐好多野食仲豐富，今次專心食野!

 

錦繡四色拼盆: 海蜇頭、醬鴨、鎮江肴肉 + 拍黃瓜

醃篤鮮

清炒蝦仁

松子桂魚

小籠包

金粟雞米天穹饅頭

南瓜汁拌鮮露筍 

炆既元蹄就食得多...今次試吓依個炸既元蹄

元蹄夠肥，炸完都唔會乾，好好味~ 不過我都係鍾意有汁既炆元蹄多d!

我從未食過酒釀丸子...酒釀 + 小湯丸...一直覺得應該會幾好味~
終於有機會一試......不過我只食咗一啖........


一日食足兩餐滬江大飯店，兩餐都非常好味!
一間高水準既上海菜館~ ^^