Miele 食譜: 原盅蟲草花北菇滑雞蒸飯

一直都有個疑問- 明明味道同冬菇一模一樣，點解一用來蒸雞就叫做"北菇呢?
根據唯靈所講: "北菇原出粵北地區所產的香菇，以冬天收成者為佳，故亦也稱冬菇"~
咁.......即係一樣啦!


金魚街有一間有點心蒸飯食既茶餐廳叫做"民華".......

佢地盅北菇滑雞蒸飯好好食! ❤ 
阿V返到來英國後一直念念不忘~~ 要老翻!


1. 冬菇洗淨浸水，浸軟後搾乾水份切半或切粗絲; 蟲草花適量備用。
(* 蟲草花並不用浸洗! 一來蟲草花是人工培植; 二來浸洗會令蟲草孢子粉大量流失~) 


2. 雞上肶切小塊，加入冬菇、蟲草花和薑絲撈勻。


3. 用胡椒粉、糖、雞粉、生抽、紹酒、麻油和粟粉拌勻醃最少1小時。

4. 白米洗淨過清水，放入蒸飯容器內，因為雞肉會出水份，所以要下比平時煮飯少的水份。
(* 水的份量視乎米的種類和受水性，這點要自行判斷!)

5. 放入蒸爐內，溫度調至100C。

6. 蒸15分鐘至水乾。

7. 在飯上鋪上(1)，放回蒸爐再蒸18分鐘。


8. 煲仔飯豉油: 生抽和珠油(或老抽)各1湯匙、片糖1小角、清水2湯匙、雞粉和豬油各少許，全部材料加熱煮滾即成。
(* 不吃豬油的話可省略~)


9. 飯蒸好後淋上(8)即成。

蒸飯充滿米香，軟硬適中~