2014年8月14日星期四

隆姐泰國美食館@九龍城 (2014年6月8日)

隆姐泰國美食館

上一次同Mr.T 一齊返香港時,
帶過佢去正宗泰菜餐廳雲集既九龍城食泰國野!
今次Mr.T 主動要求舊地重遊~ Mr.T 話想去返黃珍珍(網誌),
不過是日落狗屎! 到咗九龍城落車後,我唔記得黃珍珍喺邊個方向......
同時發現身處果條街都有好多泰菜餐廳,
喺Mr.T 唔反對既情況下,拿拿淋快手揀一間避雨兼開餐!

揀中"隆姐",因為當日時間尚早,
隔離左右有d餐廳啱啱先開門準備中,有d甚至未開門.......
有d已開咗門,但裡面一個客人都無,反而"隆姐"已八成客滿!
簡單邏輯話我知 - 食物水準應該唔錯~


隆姐泰國美食館
每樣野都好好味,Mr.T 一路食一路話"好正"既泰式拼盆~

依個拼盆發生一件小事,令我覺得 - 有d香港人真係好很麻煩!

事緣我同Mr.T 睇緊餐牌時已決定點依個拼盆,我地正落緊單,
突然我地斜對面一對三張幾既男女食客(比我地早入座 + 已食緊野),
男人不滿地用大聲到全間舖都聽到既聲量,埋怨侍應落錯單,
內容大約係佢地唔係點依個拼盆,佢應該係點邊個邊個........

其實落錯單好小事,經常都會發生,客人有權唔要錯既菜;
又可以叫佢地重新再落過單; 又或者唔想等咪取消囉~
男人態度雖然唔係好惡,但好不滿地不停重覆三幅被!
侍應已道哂歉,但男人只一味喺度嘈,
又唔話比人地知要定唔要個拼盆定再落單......
你要就要,唔要就唔要,你想點都要話比人地知先得架,
男人老狗得個嘈字有Q用咩? 我身為其他客人都覺得佢好很煩!!

終於一個貌似老闆娘既人物出手,同男人道歉叫廚房再整過,
仲話埋單時會收少d,男人竟然多謝都無句,
仲要用個"鼻"指一指身旁一直企喺度捧住個拼盆不知所措既侍應,
用我想大巴大巴星死佢既語氣無禮貌地講咗句: 妳擺低啦!
貌似老闆娘問男人咁仲洗唔洗叫廚房再整過.......

依個時候我地就問同我地落緊單既侍應,
發現比錯男人果個就係我地想點既拼盆~
於是我地提議: 男人唔要就我地要!
結果貌似老闆娘將碟拼盆比咗我地,仲同我地講埋單時收少我地$10~ 
其實佢唔洗收平我地,我地一早都決定點依個拼盆架啦!
唔洗等就有得食! 幾好吖!! 嘻嘻~~~

至於果對男女食客有無重新落單......我唔知呀!
我地掛住食野無留意~ 只要個男人收咗聲,唔好騷擾到我地,我話之佢吖!


隆姐泰國美食館
Mr.T 泰菜必食 - 香濃正宗好味既冬蔭功~


Mr.T 既唔知咩豬肉炒飯,味道唔錯,飯炒得好乾身~


我既香茅豬扒飯...依個好失望! 豬扒好硬,而且個汁.....好難食!!


送既椰汁南瓜西米露,唔太甜幾好味~

後記........
初時以為貌似老闆娘既就係隆姐,不過後來網上睇到蔡瀾既文章,
先知道原本老闆娘隆姐已於幾年前心臟病發去世,現在既老闆娘係隆姐鄉下既親戚~


是日返咗沙田食晚餐~ 食完飯去咗旺角夜遊閒逛........

逛完先返太子娘家宵夜第一回合 - V媽媽靚湯: 豬橫脷粟米煲馬蹄


海景粥品
搭通宵小巴返沙田前再去買外賣宵夜第二回合 - 海景粥品


海景粥品
豬紅碎牛粥


海景粥品
勁多豉油 + 麻醬 + 辣醬既齋腸


海景粥品
依條牛脷酥係Mr.T 既~






13 則留言:

  1. 今時今日香港同97前完全唔同哂!唉

    回覆刪除
    回覆
    1. 真心問 - 其實我上面講果件事同97有咩關係?

      刪除
  2. 回覆
    1. 泰菜喎...唔算地道喎! 不過泰國人經營既泰菜餐館,食物口味正宗~ ;;)

      刪除
  3. 好怕D奄尖聲悶既人架...成日好似鬧完人就攞著數... 跟住小事化大, 好唔鍾意呢D風氣呀!

    回覆刪除
    回覆
    1. 食野要食得開開心心先有癮架嘛! 你喺度嘈,就算埋單計平最多咪又係一百幾十,發咗達咩? 我都好怕依d人...尤其係男人! 我會睇對方唔起~ :-q

      刪除
  4. 睇相覺得個香茅豬係最好食....反而係最難食...有時真係眼見都未為真~~

    回覆刪除
    回覆
    1. 個香茅豬扒真係好唔掂啊! 以我記憶應該係我食過最唔好食......
      不過我唔知係咪泰菜同越菜既香茅豬扒有分別呢?
      一向食開越菜果種係乾炸無汁,泰菜我好少點香茅豬扒...一點就瀨野!!!!

      刪除
  5. Mrs.T你好,

    SeeWide特搜網是一個全新互動生活分享平台,集齊各地遊山玩水好去處及講玩、講食、講扮靚、講生活,讓大家分享不同的生活體驗。

    你的網誌十分切合我們網站主題,內容及相片也很有質素,請問可否讓我們轉載網誌內的相片及內容?(會注明出處及不作改動)

    我們的目的,是盡力網羅優質的相片及內容,建立一個包含豐富生活資訊的玩樂休閒分享平台,讓一眾志同道合的網友可更輕易獲得寶貴的參考資料。現階段,SeeWide 已擁有超過十萬篇生活攻略,瀏覽量亦超過數十萬。

    希望你能成為我們平台的一份子,助我們更有效地集結各樣不同的好玩好食生活資訊!

    另外,我們亦設有「稿費」制度,透過發表文章所累積的本地瀏覽量,即可兌換稿費!

    而我們亦可以你的名義,將稿費捐到香港宣明會,或你指定的慈善機構
    詳情可參閱:http://www.seewide.com/space.php?do=help&essay_id=22#001

    如有任何查詢, 歡迎電郵至: info@seewide.com

    回覆刪除
  6. 併盤同冬陰公湯都好吸引呀...而家帶住個囡..好難去食辣野呢....

    回覆刪除
    回覆
    1. 我地點依鍋冬蔭功係大鍋,另外有細碗d既

      刪除
  7. 隆姐好食過黃珍珍好多,一睇你個BLOG寫去搵黃珍珍,心諗唔係呀? 遊客先去,好彩你後尾係去隆姐.

    回覆刪除
    回覆
    1. 我覺得我地上次去黃珍珍好好食喎! 不過已經係幾年前既事......
      隆姐都好食,尤其個拼盆! :-bd 不過個香茅豬扒飯真係唔得!!

      刪除

Related Posts Plugin for WordPress, Blogger...