Amsterdam Mini Cruise - 北海日落 (2015年9月29日)

邊個話去旅行一定要搭飛機架? 今次我地搭郵輪! ^^
2星期前同Mr.T 搭依隻郵輪去咗Amsterdam，
原本依個short trip 係打算9月9日拍拖週年時去既，
但餐館有位員工臨時有事要入院做手術，所以推到9月尾先出發.......

是日食咗個麥麥早餐就渣車出發去碼頭，天氣超好呢! ^^

大約3小時車程就到咗Newcastle Port of Tyne~

時間尚早仲未有得check in，去附近個垃圾shopping outlet 打咗個轉仍未夠鐘......
再食一份大早餐打發一下時間! =P (依份早餐又大份又好食又平! 抵食~ ^^)

可以board 嘞~~~~~~ 架郵輪好大啊!!!!!!! @@

喺碼頭Check in 時已攞咗房間鎖匙卡，上到郵輪第一時間緊係去房擺低行李啦!
(我好失敗...第一次瞓船...我太興奮竟然唔記得影間房!!!! 哭~~~~~~)

我地搭依隻郵輪叫做King Seaways，約163米長，共510個客房，
載客量1400人 + 600架車~


放底行李喺房，急不及待探索一下郵輪內部........

每層既大堂都差唔多........

置身裡面唔多覺係一架船.........

有個似酒店既reception，有問題可以來依度搵人~

2間小型戲院

有機打，仲有生果機甚至賭場......

有一個講解海洋生態既資料中心......

Apparently 有時乘客可以喺甲板上見到海豚甚至鯨魚，可惜今次我地見唔到......

郵輪上免稅店Sea Shop，會喺郵輪開航後30分鐘開門營業~

仲有多間餐廳、咖啡店、快餐店、酒吧...分佈於各層~

亂跑咗一輪後快到開船時間，同Mr.T 出去甲板等開船......

甲板上見到依d救生艇...令我唸起"太攤力"......(啋~ 大吉利是!!!!)

開船嘞! Bye bye UK~~~~

慢慢駛離碼頭.........

駛出港口........

離岸越來越遠...短短10分鐘就變到一望無際，郵輪四周被海連天天連海包圍住~


一上到船就開始用Central European Time，即比英國快1小時，
所以話咁快又到食晚餐時間嘞! (開心 ❤)

我地訂咗船上既7 Seas Restaurant 食自助餐.........

一出到去見到咋頭盆沙律海鮮...我已經流哂口水無心機影相!
只草草影咗幾張就心急去掃食物 =P (其實頭盆唔止咁少呢~)

連麵包都有咁多不同款任揀! @@ (前面圍成一個大圈圈果個餐包軟綿綿勁好食!!)

第一碟懶靚 LOL 後面果小兜有新鮮蘋果粒既雞肝醬超好味!
可惜我之後掛住食第二d野，忘記咗再食多幾兜.......

熱盆種類都花多眼亂.......

是晚燒肉係燒火腿 + 燒牛肉.......

火腿夠肥唔太鹹好juicy 好好味; 個燒牛肉更加係完美! 結果我食咗10塊..... =P

小朋友section.......

見小朋友section 肉醬意粉個樣好好味，我係大人要食埋一份! (真係幾好味架~)

本來見佢地d甜品蛋糕細細兜幾精緻我都好有興趣.......
不過經過一輪狂風掃落葉10塊燒牛肉再加其他食物，我已經飽到頂上喉嚨! LOL

第一次喺船上食野...唔計天升小輪搭去澳門或長洲果d! XDDDD

剛食飽飽見到窗邊一道金光射入來...原來已經黃昏啊!
阿V一個箭步立野走人直跑上甲板搵靚位，Mr.T 埋單後去甲板同我會合一齊睇日落~

第一次睇"真正"日落，仲喺海度睇........

由個黃昏太陽半天吊...到完全沒入海平線，全個過程只大約15分鐘~ 超靚! ❤


睇完日落飯氣攻心，加上是日早起身渣車南下，
返房沖完涼就早早休息......我較定鬧鐘睇日出! ^^
(不過半夜大浪搖醒咗，去咗飲tea..... =P )

第二朝我其實知醒的! 不過我似乎太早起身...等咗大半個鐘仲未等到日出，
甲板超大風吹到頭都甩，好掛住張暖暖舒服床...最終敵不過睡魔返房再瞓過! LOL

再醒返時已經差唔多到Amsterdam，連早餐都無時間食....... =P