台灣 - 珍珠奶茶 (附自製黑糖珍珠粉圓 + 燜燒罐煮粉圓方法)

早於阿V來英國之前，台式奶茶店喺香港已經開到成行成市，
不過以前阿V一直只飲茉香綠茶少甜走珍珠......
直至3年前倫敦台灣小食節，我先第一次飲有珍珠既珍珠奶茶~ =P
近幾年Glasgow 珍珠奶茶店越開越多，但大部份都係迎合洋人口味偏勁甜，
最啱阿V口味果間老闆係正宗台灣人，不過逢星期日休息.......
要隨時想飲都有得飲，最好就係自己沖! (廢話!!)


先做珍珠奶茶既靈魂 - 黑糖珍珠粉圓

1. 菱粉(Tapioca Starch)150g，水100ml，黑糖65g

菱粉 Tapioca Starch


2. 菱粉放在大鋼盆中，水加入黑糖煮溶煮滾後，立即沖入菱粉中拌勻。

黑糖水沖入菱粉後溫度一下子會降低，可能會唔夠熱令菱粉糊化不足，
混合物就會呈半固體半液體粉漿狀，依個情況好常見~ 有2個做法......

- 照搓! 雖然混合物半液體，但澱粉遇水後既特性一樣可以搓成小圓球
(好難用文字去形容，依點要自行體驗!)不過要準備大量菱粉作為手粉，
而且要花太長時間先搓好!

- 煮滾一鑊水，將鋼盆坐入滾水裡面隔水加熱混合物，一邊用刮刀拌勻混合物
(所以最好用鋼盆!) 直至混合物糊化足夠可以搓成粉糰為止~

3. 糊化足夠的混合物可以搓勻成質地如泥膠的不黏手粉糰。

4. 將粉糰壓扁切成小塊並搓成珍珠粉圓。
搓粉圓前先預備一碗水 + 一碗菱粉 - 粉圓太乾時加少許水; 若太濕就加少許菱粉~

5. 搓好的珍珠粉圓放在乾淨大碗中，灑入菱粉篩勻防黏，用粉篩篩掉多餘的菱粉，粉圓可以即時煮食，未煮的粉圓攤開放在通風處風乾24小時。

6. 盛入乾淨食物盒，放在冰格裡保存。

自製鮮珍珠粉圓用手指可以捏碎，相對起市面現成乾硬粉圓煮既時間短好多~
(阿V未買過現成珍珠粉圓...因為喺英國我只見過一個牌子.......
包裝騎呢地有齊哂中文、英文、日文 + 韓文，
明明寫住"源自台灣"但就Made in China! 太詭異...唔敢買!!!)

7. 燜燒罐用滾水預熱。

8. 煮滾一煲水 - 水的份量不妨多一點，要足夠讓粉圓在水中自由滾動，而且一定要等水大滾後才放入粉圓。

9. 剛放入珍珠粉圓時，粉圓會沉在煲底，要即時攪拌防沾鍋，待粉圓煮至浮上來後，轉中小火(keep 著水微滾!)繼續煮10分鐘。


10. 10分鐘後撈起粉圓，(7)將熱罐的水倒去，放入粉圓再加入適量滾水，旋緊蓋子燜焗30分鐘。

P.S. 若不用燜燒罐，Step(9)轉中小火繼續煮25至30分鐘，熄火蓋上鍋蓋焗30分鐘。

11. 等待燜珍珠時，以2:1 熱水和黑糖拌勻至完全溶化成黑糖液備用。 

12. 燜好的珍珠粉圓先用篩瀝水，再用凍開水沖至全涼，加入(11)的黑糖液拌勻，黑糖液份量以剛好蓋過所有煮好的珍珠粉圓為標準。

煮好的珍珠粉圓拌入黑糖液，可防止粉圓黏結和增加黑糖香味~ ^^

13. 滾水泡紅茶5至10分鐘後拿掉茶包(不要按壓茶包! 否則茶太濃會苦啊!!)，放至微溫。


14. 一個容量約350ml 的高身杯子，先放入1/3珍珠粉圓(連黑糖液)。


15. 紅茶約300ml，趁微溫加入砂糖1湯匙和奶精2茶匙(coffee-mate)拌勻。

Coffee-mate

16. 將(15)放入shaker 內，加入冰塊3至4粒，搖勻後，倒入(14)即成。

P.S. 以上沖珍珠奶茶方法由一位曾經喺台式奶茶店工作既朋友提供! 
要自行調較砂糖份量去配合自己口味~ ^^

我另外有個懶人屈機沖奶茶法，一樣可以沖到同街買珍珠奶茶一樣~
就係用Lipton 依種即沖奶茶粉!
以即沖奶茶粉1包、coffee-mate 2至3茶匙、砂糖1.5茶匙，熱水300ml 拌勻......
取代Step 15，其他步驟一樣~ ;-)

Mr.T 話依杯自製珍珠奶茶同街買一樣咁好飲呢!
記住珍珠粉圓唔好搓得太大粒啊! 要大飲管吸得到先有風味嘛~ ^^