日本 - 相撲火鍋 Chanko Nabe

顧名思義係日本相撲手食既火鍋! ^^就咁睇相材料同普通火鍋完全無分別......
(事實上都係自己鍾意食乜就落乜，反正我又唔係相撲手! 呵呵~~~)
傳統正宗既相撲火鍋材料主要係蔬菜、豆腐 + 雞肉，
並唔會有四腿著地既肉類e.g. 豬牛，原因係相撲比賽中相撲手雙手著地就輸，
時移世易，而家唔會再拘泥依d舊傳統，所以相撲手火鍋都好常見雞以外既肉類~
而相撲火鍋有一個好重要又好好味既關鍵，少咗佢就會完全失色.......
佢就係 - 雞~~ 肉~~~ 丸~~~~~~~


1. 雞肉丸做法:

a. 雞上肶肉(去皮去脂肪)約350g，用食物處理器攪成免治雞肉。

b. 免治雞肉加入雞蛋(打勻)1/2隻、日本醬油1.5茶匙、味醂、味噌和新鮮磨薑蓉各1茶匙、粟粉2茶匙和蔥花適量，全部材料拌勻，以筷子向同一方向攪約5分鐘至呈黏性糰狀，包好放入雪櫃最少1小時。

2. 鍋中煮滾熱水，下鰹魚露和洋蔥絲半個，以小火滾煮5分鐘做成湯底。
(鰹魚露份量比平時做湯麵既湯底淡一點，因為之後湯中要加入味噌啊!)


3. 熄火放入材料: 紹菜(切塊)、紅蘿蔔片、粟米、豆腐、豆卜、菇菌類(金菇、本菇、蠔菇、杏鮑菇 + 鮮冬菇)、去皮雞上肶肉、打邊爐五花豬肉片、春菊菜~
(自己砌靚佢啦! ^^)

4. 放好材料後，下少許味噌，蓋上鍋蓋再開火，待大滾後再等1至2分鐘即成。

5. 好似平時打邊爐咁，邊食邊加入其他材料~ 用2隻鐵湯匙將(1)做好的免治雞肉做成球狀放入火鍋中。

依粒雞肉丸好食到不得了! 成個火鍋只食雞肉丸唔食其他肉類都無所謂!!

6. 相撲火鍋食到尾聲，可以加入烏冬麵或白飯，再打1隻雞蛋，精華來啊! ^^