作大 (2011年1月17日)

病足幾日，雖然燒已全退咳又止咗，但頑固既喉嚨痛依然賴死唔走!

連續食咗咁多日止痛藥，食到個人好虛又口淡淡，好鬼辛苦......

以往經驗話我知 - 唔食消炎藥，我既喉嚨痛好難會好!

唔知點解NHS 既GP當d藥好似鑽石咁，唔多鍾意開藥比病人 - 尤其係消炎藥!

多年前一個聖誕假前夕，我喉嚨痛足2星期都唔好，仲有惡化既跡象 - 近喉嚨處既脷頭部份凸起咗幾粒野，每次吞口水都feel 到好似有野黐住喉嚨吞唔到咁......

咁嚴重緊係要去睇醫生啦，點知果個死佬係咁二照照我喉嚨，望咗兩野乜都無問就斷定我係病毒性喉炎，叫我返屋企繼續食止痛藥，一粒藥都唔開比我!

好彩睇完醫生後幾日我放聖誕假返香港，一落機第一時間再去睇醫生，香港既醫生同我講: 2星期都唔好既喉嚨痛係細菌性架嘞，唔食消炎藥唔會好架!!

結果食咗一次藥，喉嚨已經開始消腫!

好心啦~ 唔係病到五顏六色我都唔會去睇醫生啦!

班GP坐喺房度un un 腳睇完症又唔開藥比病人，咁睇來托咩??

今朝起身左邊喉嚨又腫又痛，食咗2粒必理痛頂住檔，見時間尚早，撞吓彩碰吓運氣睇吓book 唔book 到GP......

Book GP好睇彩數架 - 要book 就要吼佢晨早8點開門時打電話，遲少少都可能會fully book!

不過今日我好好彩 - 晏晝2.30就有得睇!

從香港返來只1星期，但超過一半時間都病咗，行李未執污糟衫未洗哂......好想盡快好返!

見今日果位女GP Dr. Lamb 有少少鵪鶉又幾好相與，為咗唔想空手而回，我唯有作大自己喉嚨痛咗3星期! (切勿模仿!! )

 終於大到佢開藥比我嘞!

因為我喉嚨痛，所以全部都係藥水方便我吞嚥~ Dr. Lamb 好細心啊!

 2枝止痛藥水Paracetamol，係我至憎既士多啤梨味!

 第一次見液體既消炎藥......

 杰撻撻但好香香蕉味喎!

老公陪我睇完醫生後，一齊去泗和行買飯食.....

 我要叉燒飯，老公要乾炒牛河~

食完飯拿拿淋食藥，希望會拿拿淋好返啦!