2014年2月3日星期一

二人世界送蛇迎馬 (特長! 附食譜)


話咁快又過咗個農曆新年嘞~
其實今年蘇格蘭既農曆新年同往年都係大同小異,
不過我硬係覺得今年喺依個洋人國度,
農曆新年既氣氛濃厚咗喎!


來咗英國咁多年,
今年第一次喺洋人超市見到有利是封賣!


不過除咗利是封之外,
仲竟然有九唔搭八既招財貓!


一年一次過農曆新年,
我又攪點小動作增加屋企新年氣氛......

之前我一直只用米袋無用米缸,無得貼"常滿"......
上星期買咗個方型膠桶做米缸,
貼返張出自Mr.T 既"常滿"揮春,米缸即時cute 哂!
 

今年應該係我個蒸糕bell 響得最多既農曆新年......

雖然6299都返咗香港過年,唔洗整糕比佢地,
不過Mr.T 阿姨想要素蘿蔔糕!

素蘿蔔糕食譜click here~


多咗出來既糕mix,剛好整一底細既葷蘿蔔糕比自己做lunch!

蘿蔔糕食譜click here~


我準備開餐之際先發現...
我d余均益辣椒醬存貨原來已經比我食鬼哂!!!!! (打擊~~~)
唯有用是拉差頂住檔!!


阿姨話想食我未整過既馬蹄糕,
又想要多一底葷既蘿蔔糕比餐館伙計食,
無問題~ 反正我鍾意整,總之有人食就得嘞!

於是我一晚之內又整咗一底桂花馬蹄糕 + 2底蘿蔔糕~
(細果底蘿蔔糕係我 + Mr.T 既!)

晶瑩桂花馬蹄糕食譜click here~


蒸開有條癮! 一不做二不休.......

蒸糕蒸到年廿九先收爐!


一向唔算鍾意傳統年糕,不過今年突然想食! 
反正年糕好快手就整好!!

傳統糖蜜年糕食譜click here~


想整發糕好耐架嘞! 
今年第一次整,蒸緊時有點緊張...
怕d糕唔發就大吉利是啦! 
(整得發糕當然想要好意頭架嘛!!)
好彩d隻隻都發到豬頭咁!! 嘻嘻~~~~
又攞咗幾隻比阿姨~

大紅大紫大發糕食譜click here~


阿姨買咗箱有葉既桔仔,比咗大咋我地,
雖然我屋企無全盒,不過都擺得靚靚增加點新年氣氛!


連續蒸咗幾日糕 + 清潔屋企,
忙咗咁多日,年三十晚休息一下,出街食團年飯~

不過食西餐........(Tudor Hotel)


明明點咗個二人分海鮮頭盆,
點知上菜時...咁細份既!!!!?!?!?!?!


食食吓有位經理狀既男士行埋來話我地知......
原來廚房整錯咗個一人份! 於是補多一份比我~


Mr.T 既chilli burger~ 大份夾好食!


我既Finnon Haddock (薯蓉忌廉汁焗煙黑線鱈)
忌廉汁香濃,煙魚cooked to perfection 生熟剛剛好,非常好味!


另點一份鴨肉春卷兩份分~
(Mr.T 話中國新年應該食返d中國風味既食物喎!)


馬年大年初一一早我有禮物收!

依份其實係我既"副聖誕禮物"來! (正聖誕禮物係把旬刀!!)
Mr.T 早在12月頭網上訂咗,
不過原因不明差不多2個月先由日本來到英國,
仲要我地自己去攞!! 效率真係高到呢........


雖然遲咗咁多先收到,不過我好好好好好大愛!!


從小到大都鍾意宮崎駿既卡通!
除咗卡通本身之外,仲好愛久石讓既配樂~


大年初一全日食齋!


午餐比較簡單少少 - 香菇瓜仔素肉醬扒菜心苗~


今次試依隻...我覺得味道太甜!!


食完午餐就開始預備晚餐!
話哂係大年初一,就算食齋都要豐富d~

先炸好麵筋,用來煮南乳齋! (自製炸麵筋方法click here~)


之後就準備材料整素春卷~
Mr.T 知道我會整春卷,雖然佢唔食齋,
不過佢早響春卷要預埋佢果份!



炸麵筋、雲耳、花菇、竹笙、黃芽白、腐竹、金菇乾、毛豆......
每樣材料少少...炆出來一大碟!



開飯嘞!


2月1日大年初二星期六,Mr.T 請假唔洗返工.......

一早起身煎蘿蔔糕、年糕 + 春卷做早餐~


出街shopping,見到馬年 + 2014年第一條彩虹啊!


是日星期六...唔煮飯!
返屋企時途經一間Mr.T 細個時,
99成日帶佢去食下午茶既餐廳 - Mailcoach~
就入去試吓啦!

(相機無電! Mr.T 部手機影出來既相非常唯美......)
點菜時有少少失望 - 因為我頭盆想要煙三文魚...無!
Mr.T 主菜想要mixed grill...都無!!
點菜後老闆攞咗依碟脆卜卜來~


Mr.T 既頭盆 -西蘭花忌廉湯
依碗湯望落平平無奇,不過真係好飲到無朋友!
我飲咗好多啖~


因為無煙三文魚,所以我頭盆改點炸雞......
真係好彩無煙三文魚,
我先有機會食到依個咁好食既炸雞! 
本來我預咗炸粉厚厚雞肉炸到乾爭爭......
但事實係炸皮又薄又鬆脆,
裡面包住又軟又juicy 既竟然係雞胸肉來!!
淨係依兩份頭盆,已經係好好既理由再返來幫襯~


Mr.T 既主菜Butterfly chicken
煎雞胸配蘑菇忌廉汁,我食咗一塊,
覺得雞胸煎得有點過熟,所以有少少乾........


我既Hunter chicken
煙肉包住雞胸肉烤熟,
雞胸內有乾坤 - 有流心芝士餡!
雞胸肉烤得剛剛好,竟然可以好似雞肶咁滑!!
唯獨個汁有點太甜,唔淋汁反而仲加好味~
大年初二充滿驚喜 + 好好味既一餐! 


年初三星期日,
一早起身去IKEA 食早餐兼shopping~

是日好胃口,加多隻紅噹噹士多啤梨撻...
可惜太太太太甜!!!!!


馬年大年初三,我同好多..."毛公仔"合照! XDDD


飲飲食食買買...咁又過咗一個農曆年~
今個年無煮團年飯.......

不過我已經為聽日初五既開年飯作好準備嘞!






8 則留言:

  1. ::ny2396 恭喜發財! 身體健康! 萬事勝意!
    新年見到lucky rainbow, 馬年一定行大運呢~
    我都好鍾意龍貓音樂座呀! 好靚呀~

    回覆刪除
    回覆
    1. Thank you Carman! 大家咁話,最緊要都係身體健康~
      我好鍾意彩虹架! 一見到彩虹心情都特別靚!

      刪除
  2. 喂~ 恭喜發財~!!!!祝你地 馬年行好運,身體健康,事事如意,心想事成~
    仲有你地既鼠鼠, 魚魚~~都健康呀~影多點得意相俾我地看呀~~!!!
    鼠鼠過年既造型照好得意呀!!!

    個素春卷應該大人細路都想食~~ 我要試一試~~希望引到我個囡食吓vegetable~

    回覆刪除
    回覆
    1. Thank you Emily! 大家咁話~ 最緊要身體健康!!
      日日都幫佢地影相,好鬼盞鬼~

      春卷我一向只鍾意食素,有肉既唔啱我! 依個連唔鍾意食菜既Mr.T 都話正,不過油炸野唔好食太多啊!

      刪除
  3. 新年快樂*^O^*身體健康*^O^*
    日日都開心

    回覆刪除
    回覆
    1. 恭喜發財! 大家咁話~ 最緊要身體健康 + 日日開心!!

      刪除
  4. 恭祝:MR.T + MRS.T馬年行大運! 身體健康! 萬事勝意!如意吉祥!

    回覆刪除
    回覆
    1. 恭喜發財! 大家咁話~ 我都祝妳一家身體健康 + 日日開心!!

      刪除

Related Posts Plugin for WordPress, Blogger...