韓國 - 部隊鍋 (부대찌개)

1950年代韓戰過後，韓國民間糧食短缺，
當時議政府市、平澤市 + 汶山一帶既居民，
利用附近設立美軍基地內既剩餘物資(罐頭食品)，
加入韓式辣湯、泡菜 + 辣醬調味，
泡製出依個美韓混血火鍋blah blah blah...大概係咁啦!

依大鍋野係無健康可言架嘞...不過喺天寒地凍既蘇格蘭冬天，
偶一為之整一鍋配大碗白飯，熱辣辣又惹味，食完全身暖笠笠~
都唔算太過份吖!

 

材料:

- 罐頭粟米
- 茄汁豆
- 午餐肉(我一定要用SPAM!)
- 煙肉
- 腸仔
- 豆腐
- 韓式辣醬
- 即食麵
- 大蔥
- 金菇
- 黃芽白
- 辣椒
- 洋蔥
- 芝士片
- 清雞湯

泡菜我用依隻 - 台灣製既韓式泡菜~
因為我試過不同牌子韓國入口既泡菜，無論包裝或罐裝都非常腍pat pat...
泡菜要爽脆先好食架嘛! 依隻雖然係台灣野，不過味道口感都好正~

我買唔到韓式年糕...
well~ 其實正確來講我無搵過有無韓式年糕賣，因為我對年糕麻麻地.....
反正屋企有包年糕片，就用佢來代替啦!

至於即食麵，用返韓國既即食麵!

之前喺Birmingham 韓國超市買既淺鍋，啱哂用來整部隊鍋!


1. 年糕片用凍水浸24小時後瀝乾備用。


2. 洋蔥切絲; 大蔥切片; 黃芽白洗淨瀝乾切塊; 金菇洗淨瀝乾，切去根部備用。


3. 午餐肉和腸仔切片; 豆腐切件; 辣椒切片備用。

4. 洋蔥絲放入鍋中先炒一會至軟，熄火放入黃芽白，再放上其他材料。 

5. 倒入清雞湯，蓋上鍋蓋，煮至即食麵腍和芝士溶化後，拌勻即成。

食韓國野，要用返韓國餐具!

將辣湯 + 火鍋料淋喺白飯上面...滋味一流!!