姬松茸茶樹菇煲雞腳; 冬菇土魷蒸肉餅 & 西芹雞雜炒魚肚
近排少咗update blog，因為我掛住追亦舒小說!
最近發現多咗幾間有中文書借既圖書館......
我本身係亦舒長篇迷~ 上面依咋亦舒有長篇亦有短篇，查實長篇果幾本我自己本身都有哂 + 已經睇過哂，不過全部喺香港娘家無帶過來!
好書唔怕一睇再睇，舊書重溫我仍然睇得津津有味呢~
講返餐飯......
連鹽都唔洗落呢!
有blog 友話佢地用依種魷魚仔乾來蒸肉餅......
話時話我仲未整過土魷蒸肉餅喎!
剁碎土魷加埋冬菇粒，蒸緊時成個廚房香氣四溢呢~~~~
不過喺食物櫃搵到半包之前開咗用剩既爆沙魚肚......
Mr.T 自從喺香港食過V媽媽既炒爆沙魚肚就愛上咗，驚為天人!
(V媽媽見到Mr.T 可以一個人食哂大砵炒魚肚都好驚為天人!!
)有次返6299度食飯，99炆咗大兜豬皮，臨開飯時Mr.T 指住兜豬皮.......
Mr.T: 我知依d係乜野來! 係魚肚裡面果卜卜!!噢賣葛~
我之前一直以為老公識欣賞好野先會鍾意食爆沙魚肚......原來喺佢遲鈍既味覺之中，爆沙魚肚同豬皮根本無分別!!!!
姬松茸茶樹菇煲雞腳食譜click here~ 冬菇土魷蒸肉餅食譜click here~ 西芹雞雜炒魚肚食譜click here~
通常我唸唔到食咩餸, 去妳blog就一定流哂口水 , 食慾大增呀! 多謝妳無施既分享呀!
回覆刪除[版主回覆06/14/2011 18:30:00]唔洗客氣! 其實我好多時都會偷懶唔煮飯架~
以前住英國時我都好鍾意睇亦舒
回覆刪除魚肚真係好好味架!
[版主回覆06/14/2011 18:29:00]我而家都好鍾意睇亦舒架!
魚肚又好味又有益呢!
哈哈，你好鬼衰！笑 Mr. T 味覺遲鈍
回覆刪除[版主回覆06/14/2011 18:27:00]咁佢味覺真係唔掂嘛! 有乜理由會覺得豬皮 + 爆沙魚肚一樣先得架......
咁又係，兩樣口感完全唔同。但佢食過豬皮未先？
回覆刪除[版主回覆06/15/2011 19:09:00]佢緊係食過豬皮! 99 + 我都整過.....佢條友簡直係牛"趙"牡丹!!
我追緊睇深雪呀......亦舒新出嘅外遇....你睇咗未呀?
回覆刪除[版主回覆06/16/2011 04:08:00]深雪初出道時睇過吓，越睇越唔鍾意佢!
無買亦舒好耐嘞! 我依邊無得賣嘛，上面果咋喺圖書館借架!
Me too..... 我都係 亦舒長篇迷呀！！！！哈哈哈哈！！！！我仲有好多係香港屋企等我下次返去pack埋ship過嚟呀！我都係淨睇長篇架渣，短篇無咁好睇嘅。其實我返三月返香港之前，有朋友都寄咗十本比我（新的，近期的）唔知係人大咗；定係因為呢邊生活平淡，所以心境清的，覺得近期的無舊個的咁好睇，無咁touching，同埋的題材好似開始好similiar，有的失望。初期嘅張小嫻都好好架。。。
回覆刪除[版主回覆06/18/2011 03:24:00]一向我都係鍾意睇長篇小說多過短篇，無論咩作者都一樣!
最新既亦舒我無點睇過，不過我都同意亦舒有少少新不如舊既感覺! 所以我始終最愛李碧華~
個人覺得好似李碧華 + 亦舒咁既殿堂級女作家真係買少見少，新果咋無乜邊個真正入流! 張小嫻最好睇既咪得"麵包樹上的女人" + "三個A級的女人"囉~ 我介紹我阿姨睇，佢走去睇"賣海豚的女孩"，睇完走來話鬼我搵佢笨......
我都係超級亦舒迷，我有哂佢既長篇小說，出一本買一本，每本都睇過好多次，有時望住成書櫃都係書好有滿足感架，不過我都覺得佢新既無舊既咁好睇，但係我都會照買，非常忠實既fans...
回覆刪除另外一個台灣作家席絹我都好鍾意架，可惜依家已經好少出書，不過佢d舊書都係百看不厭~
[版主回覆06/23/2011 02:32:00]我睇書比較雜，唔會只買同一作者~ 而且小說依類純消閒書喺我書櫃只佔好少部份!
妳真係好忠實呢~ 咁多亦舒長篇妳最鍾意邊本 / 邊幾本呀? 我最鍾意有圓舞、流金歲月 + 阿修羅 (暫時唸到咁多! 而且全部係舊書呢!! )
台灣作家我好真係好少睇! 唔鍾意台灣人寫作果種文皺皺既風格，我最鍾意既女作家始終都係李碧華! 霸王別姬小說 + 電影同樣精彩!!!
我都係最鍾意圓舞，仲有朝花夕拾，如何說再見~~
回覆刪除我睇書都好雜架，香港台灣日本外國小說漫話都會睇，其他種類既書都唔會放過，有一本書我非常超級鍾意既，The Road Less Travelled by M. Scott Peck，一本關於psychology既書，如果有興趣可以睇下丫~
[版主回覆06/27/2011 18:17:00]多謝推介! speaking of 關於psychology 既書，我個人最有興趣係犯罪心理學~ 其中一本我最鍾意既係Whoever Fights Monsters by Robert K. Ressler & Thomas Schachtman，前者為former FBI，一本真實又好精彩既書!