台灣 - 掛包

掛包又稱割包、刈包或虎咬豬，係一種源自福州既台灣地道小食~ 台灣人仲會稱掛包做"台灣漢堡。

 早前去愛丁堡台灣美食節第一次食掛包已經好鍾意!


早幾日見到英國台灣食品網Taipec 貼咗張掛包相，即時唸起掛包既美味......

我決定要自己翻一翻!!!


A. 掛包包皮做法: (依個時候最好唔好叫依個小食做割包......)

1. 中筋麵粉500g、砂糖50g、快速酵母7g、泡打粉5g，暖牛奶或暖水380ml先搞勻成麵糰初型後，加入豬油30g搓成光滑麵糰。

2. 將麵糰分割成每個50至55g重的小份滾圓，用保鮮紙封好放在室溫下發酵30分鐘。

P.S. 依個份量大約可做16至18個掛包~

3. 將每份麵糰用麵粉棒壓成橢圓形麵片。

4. 在半個橢圓形麵片上掃上少許油後對摺。

5. 用保鮮紙封好，靜置20至30分鐘。

6. 將(5)做好的掛包皮放入蒸籠，蒸8至10分鐘即成掛包皮。

P.S. 要待水滾有蒸氣時才放入蒸籠內 + 開始計時~

掛包傳統餡料為鹵五花肉、酸菜、花生粉 + 莞茜!

B. 鹵五花肉做法:

1. 五花腩用胡椒粉、五香粉、糖、生抽和少許老抽醃數小時。

2. 炆鍋內燒熱油爆香薑片、拍扁蒜頭，放入五花腩爆炒至金黃後灒酒。

 3. 加水至蓋過五花腩，放入鹵包1個。

 
4. 再加入醬油膏和冰糖煮至回滾，改以小火炆2小時即成。

C. 酸菜做法:

 1. 酸芥菜隔汁，沖洗後搾乾水。

 
2. 酸菜切碎。

 
3. 燒熱油鑊爆香蒜蓉、乾蔥蓉和紅辣椒，下酸菜用少許糖調味炒香即成。

D. 花生粉做法:

其實市面上可以買到現成花生粉，不過我依邊就要上網先有得賣!

但花生粉亦可自行DIY，香味比現成花生粉更濃呢~

 1. 市售已熟連殼花生適量。
P.S. 亦可自行買生花生仁炒熟! 不過唔建議買市售已去殼既熟花生，因為多數加咗鹽或其他調味料。

 2. 將花生去殼去衣。

 
3. 花生放入碎肉機內打成粉後，加入少許糖再打勻即成。
P.S. DIY花生粉不宜打得太碎，否則會打出油份，成品就會唔夠乾! 若花生粉打過龍已滲出油份，可以將花生粉放入焗爐內以低溫烤乾。

 可一次過做多少少花生粉，放入容器內保存。
P.S. 自製花生粉過一段時候香味會減退，用時可將花生粉略炒一下回復香味!

 將做好的鹵五花肉和酸菜放入蒸好的掛包皮中，再放入新鮮莞茜，最後灑上少許花生粉，即成美味掛包!