自製黑蒜

相信大家對黑蒜已經唔再陌生!
前年(2011年)第一次接觸黑蒜後，
好鍾意佢陣味，
不過Tesco 貨源唔穩定，
幾個月前FB友告知原來黑蒜可以自製，
2星期前終於的起心肝整咗一水......

我結婚前已經用緊依個最多只煮到3杯米既迷你西施飯煲，
飯煲依個家電好少會壞，一直用到而家仍然性能良好!

依個多功能大飯煲係英國婚禮時收到既禮物，
正好比我用來自製黑蒜!
(7年來第一次開箱! 比足面d蒜頭啦!!)

1. 第一次整唔知成唔成功，加上有人同我講話整過失敗咗，
我都唔敢整咁多，先整12粒小試牛刀......

2. 蒜頭連皮放入飯煲，煲底可以墊竹墊~

我無竹墊所以本來用咗鍚紙來墊，
不過有FB友告知唔可以用鍚紙，
但佢唔記得唔可以用鍚紙既原因......

後來另一位FB友告知因為鍚紙加熱會產生毒素~
不過其實鍚紙加熱係唔會產生毒素既，
除非鍚紙遇到酸性物質，
加熱後化學作用先會產生致癌化學物!
但蒜頭係屬鹼性既~

Anyway 我第一次整黑蒜都想成功架嘛!
所以喺未知道點解唔用得鍚紙之前，
為穩陣起見我都攞走咗張鍚紙，
完全無墊野都整到~

3. 蓋好飯煲蓋，將飯煲調至保溫功能，進行14日發酵。

4. 14日蒜頭出煲後，蒜肉應該全黑、軟身及離皮，口感如杏脯，味道酸甜(甜多過酸)，無辛辣蒜味，咁就為之製作成功。

5. 取出所有製作好的黑蒜，放在通風地方風乾5日，就可以放入玻璃樽儲存。


NOTE

- 要用西施飯煲! 防止跳掣;

- 要確保飯煲出蒸氣位無阻塞;

- 發酵期間要避免打開飯煲，溫度突變會影響發酵效果;

- 蒜頭發酵1日後會釋出蒜味，蒜味會持續數天，飯煲最好放在通風位置;

- 有人話要用獨子蒜......

我覺得唔需要用獨子蒜，因為街買到既黑蒜都唔係獨子蒜來!
選新鮮瓣少多汁飽滿既紫皮蒜已經可以~

自家製黑蒜味道同街買既一模一樣!
成品可當零食或作烹煮菜色之用~

黑蒜保留了大蒜原有成份及功效，

經發酵後大大提升大了抗氧化及抗酸化的功能，
又將大蒜的蛋白質轉化成人體必需既氨基酸，
具有防治癌症、防治流感、抗疲勞、降血壓、降血脂、
降血糖、防血栓、降膽固醇、抗衰老、增強免役力、
改善便秘和失眠症狀等功效~