開心得太早.....

唉...前晚以為攪掂哂搬Blog，
點知晴天霹靂有位高人告知......
原來我搬完後舊文圖片仍然連結住Yahoo!
我尋日唯有將所有已載入既舊文一口氣del 哂，
所以大家會發現我上一篇所講右邊既分類欄位唔work~

 
尋日一整天我嘗試搵出問題所在.......
最終發現原來又係Yahoo 做既好事!
佢地為舊用戶準備既備份，
由初時可以用Blogtrans 直接轉xml file 既格式，
突然唔知幾時改咗新格式!
同已往Yahoo Blog 作風一樣 - 鬼鬼鼠鼠靜靜雞先斬後奏!!

轉咗新格式後，
有咋偉大既高人花時間寫文提供咗唔同既解決方法~
不過我試過依咋方法...都唔work......
想必定係我Yahoo Blog 時代填表投訴得太多，
佢地臨執笠整鑊杰撻撻既比我歎! (妄想症發作了~~~~)

唔緊要~ 我阿V天性硬頸!
若真係無方法轉到用得既xml file，
大不了最壞打算我咪只載入文字，
從頭upload 圖片，逐篇posts 加返圖片之嘛!
反正我開始喺Yahoo Blog 寫第一篇網誌時，
本身個blog 都係乜都無架啦~
我咪又係逐篇逐篇咁寫出來!
我每日整d...終有一日會整哂，
我依個新竇終有一日會有返哂我Yahoo 既舊posts!!
(而且舊文一早都搬哂去點煮網~)

其實唸深一層我自己都要負d責任.......
佢地一話執笠，我就應該無鞋挽木屐走人!
一日最衰都係我個人念舊 (哈哈~~~)，
係都要hea 到最後一刻先放手~
(不過有邊個會唸到佢地臨執笠都攪到一鑊泡咁先得架?)

上一篇...我話過好掛住Yahoo Blog......
我決定收返依句說話! (大家當我無講過啦!!)
Yahoo Blog 就好似一個"趙完鬆"既賤男一樣，
分手後仲要跣妳一鑊金留低大咋手尾.......