香煎巨型大鬼蝦

越新鮮既海鮮，以最簡單既方法去烹調，就最能食出海鮮獨特既鮮甜味! ^^

N年前阿V喺巴黎一間百貨公司超市第一次見到依種巨型大蝦，由於長度粗度都有返咁上下，自此我一直叫佢做"BB手臂蝦"~

近年間中見中超海鮮檔有得賣，得知依種巨型蝦有個好盞鬼既名叫做"大鬼蝦"，不過因為價錢都有返咁上下，阿V一直唔捨得買來食......

洋人新年又比我喺海鮮檔見到佢地...新年應該食好d既! 買咗2隻，2隻都足足28cm，承惠£13~

1. 大蝦洗淨，用較剪剪去頭尖部份和蝦腳，切開一半，用牙籤挑去黑腸，用廚房紙抹乾水份備用。

2. 燒熱平底鑊煮溶牛油，放入大蝦(殼向上)，以中火煎1分鐘至殼邊變紅。

3. 反轉大蝦(殼向下)。

4. 用鍚紙蓋著平底鑊繼續以中火煎2分鐘。

5. 盛起上碟，灑上少許*香草花海鹽(或普通海鹽)即成。

依隻香草花海鹽除咗顏色繽紛之外，仲香噴噴充滿花香，用來配煮法簡單既海鮮，無論味道或賣相都一流! ❤