二人世界自家韓國燒烤 - 2015年1月11日 (無煙室內燒烤盤開箱文)

我 + Mr.T 都好鍾意食韓國燒烤! ❤ 不過......

- 喺英國有食過正宗好味既韓燒，不過喺London, Birmingham + Manchester;

- 以我所知Glasgow 都有一間有得食韓燒既韓國餐廳，Edinburgh 亦有分店~ 依間韓燒餐廳既前身都係韓國餐廳，我幫襯過，侍應態度差不特止，我仲喺石頭飯裡面好誇張地發現"埋葬"咗一大咋碎頭髮! (係一咋而唔係一條!!) 而家餐廳雖然改咗名，但我懷疑班底係同一班人，所以改名後我一直無幫襯過，亦唔打算幫襯!

大約一年多前，Glasgow 市中心開咗一間中國人開既自助日式燒烤"牛將軍"~
我 + Mr.T 最瘋狂試過一星期幫襯3次! =P

行街周不時都見到依種電燒烤爐，價錢平好tempting...不過問過用過既朋友，佢地都話好勁油煙! 上網research 仲見好多人話用過一次以後唔敢再用........

上星期無意中比我喺Amazon 搵到依種無煙室內燒烤盤，上YouTube 睇過用家示範真係好少煙喎! 見價錢又好平，即時訂一隻試吓!! ^^

雖然無煙燒烤盤註明可以用於明火爐或電爐，但用家都話電爐唔work，效果似暖爐多過燒烤爐...所以最好用依種手提式石油汽爐!

市售依種無煙燒烤盤多數只有左邊燒烤面 + 中間既盛水環......

但我依款多咗個可以循環再用既熱石盤!

將熱石盤放喺盛水環中間，再喺箭咀處倒入清水.......

燒烤面噴少少油 + 開火......可以開始韓燒嘞! ^^
開火後熱石盤裡面既陶粒會慢慢燒紅，紅咗之後改用小火已經好夠熱~

嗱~ 其實唔係真係完全無煙，不過真係少煙! 唔會燒到成間屋煙霧離漫果隻~
咁有無油煙味架? 如果我話無，你都唔好信我啦!
味道一定有，但我燒烤時會開窗; 燒烤後點幾粒鐘香薰蠟燭，味道好會走!!

燒烤盤附有手柄，方便燒烤中途再加入清水!

今次買咗一pack 豬腩肉、一pack 雞胸、幾隻吊筒再加一碟蔬菜，2個人最少可以燒2餐!

肉類我用依種韓燒醃肉醬，價錢平，好味正宗又方便! ^^


食韓國燒烤又點可以無前菜呢!!?!?!

出街食前菜細細碟，幾啖就玩完，到喉唔到肺........

自家煮份量自己話事! ^^

醬煮馬鈴薯...依個啱啱煮起時無咁好食，但雪凍後入哂味超好送飯呢! ❤
韓國醬煮馬鈴薯 Gamjajorim 食譜click here~

韓式小魚乾 Myeolchi Bokkeum食譜click here~

韓國涼拌菠菜 Sigeumchi Namul 食譜click here~

早前醃好既韓式生醃辣魷魚，極速被我一星期之內清哂樽!

製作需時...拿拿淋去買盒大號急凍吊筒.......

今次醃個double 份量! (要等一個月啊~~~~~)
韓國生醃辣魷魚Ojingeojeot 食譜click here~

阿V對依個無煙燒烤盤滿意度滿分! ❤
佢除咗少煙之外，仲係易潔，清洗超容易; 而且存放慳位，唔似電燒烤爐咁阻訂~
阿V強力推介!! 以後唔洗南下都可以隨時喺屋企韓燒啊!! 呵呵~~~~ ^^