西班牙海鮮飯 Seafood Paella

Paella - 西班牙大鍋飯...好多人會將Paella 讀成"派 yeah 拿"...其實係錯既! 正確讀法應該係"派 air 牙"先啱! 要注意啊~ ^^

Paella 喺西班牙語中係指用大平底鍋煮既飯~ 由於西班牙大鍋飯有唔同材料配搭，所以若以海鮮作為材料，就應該講到明Seafood Paella!

西班牙海鮮飯既材料...海鮮方面基本上你鍾意咩野海鮮都可以加落去!
但任你材料點變化都好，萬變不離其中一定要有兩樣材料 - 短粒米(short grain rice) + 番紅花 (saffron)，先有資格稱為Paella~

Paella rice

西班牙飯同意大利飯用既risotto rice 一樣都係短粒米，米粒飽滿圓滾滾，外型有點似日本珍珠米，但色澤無珍珠米咁晶瑩通透~

番紅花其實係花中三枝雌蕊頂端紅色既柱頭，大約要17萬朵鮮番紅花，先可以生產得到1kg 香料，為世界最貴既香料~
番紅花除咗作為香料之外，仲可以用作染色料 + 藥物~ 西班牙大鍋飯鮮艷既顏色就係由番紅花而來架嘞! ^^

1. 預備海鮮。*我用咗龍蝦、大蝦、大魷魚(切圈)、煙帶子(買唔到新鮮帶子! =P )、藍青口 + 蜆~


2. 魚高湯(或清雞湯)2L煮熱，分成兩份，將大約2指頭份量的番紅花放入其中一份高湯中。

3. 平底鍋燒熱橄欖油，下大洋蔥半個(切小丁)、蒜蓉約1湯匙和西班牙香腸chrizo 約4片(optional) 炒至洋蔥變軟。

*煮西班牙大鍋飯最好避免用深鍋來煮，因為Paella rice 係生米入鍋慢熬成飯，寛淺既平底鍋可以讓米粒 + 高湯平均分佈受熱! (我用既係Chasseur 30cm cast iron rondeau pan~)

4. 加入Paprika 辣椒粉1茶匙和Paella 米500g，先略略兜勻一下，再倒入(2)加了番紅花的一份高湯，拌勻所有材料煮滾，以中小火煮約25至30分鐘至高湯收乾飯半熟，期間要不時攪拌材料。


5. 加入餘下一半高湯拌勻煮滾，再加入海鮮(唔需要刻意排得好靚好整齊，隨意放得架嘞! 咁當然你慢慢排靚佢都可以啦~ ^^)，蓋上鍋蓋繼續以中小火煮約15分鐘。

6. 灑上新鮮切碎parsley和放上切開的檸檬即成。


番紅花的代替品.......

市面上有依種西班牙大鍋飯既專用香料........

一盒裡面有5小包(每包3g)，裡面已經包含番紅花 + paprika~ 啱哂嫌麻煩唔想一樽番紅花一樽paprika 既人! ^^