英國版麥當勞罐形可樂杯 (2009年8月26日)

經過3個星期既麥麥加大餐，我終於都儲齊咗一套英國版罐形麥麥可樂杯嘞! 雖然唔係日日食，但英國既麥麥，一星期食一次對我來講已經太多...........

早幾日先有位英國網友話我知 - 原來英國版麥麥可樂杯唔一定要食加大餐...可以買架!!! 而且每隻只售99p~ (不過今日打過電話問，佢地話唔比再買咯喎....)

不過唔知點解我硬係覺得用錢買，同經過自己"一番努力"儲返來，心理上有d分別 - 食足咁多餐儲返來，好有"苦盡甘來"既滿足感 + 成功感! (yes yes yes~ I'm sad and nerdy.......) 

因為見到有香港網友集齊成套香港版，我先柴娃娃儲套英國版~ 原來正當香港送緊經典型，世界各地既麥麥都同時送緊唔同型既可樂杯......

 除咗英國之外，德國麥麥送緊既一樣係罐形!

 荷蘭版~ 荷蘭網友告知係由一個花、蝴蝶 + 網球拍組成既圖案!

 智利版~ 我覺得同荷蘭版好相似! 但我唔肯定係咪一樣? 因為荷蘭版張相唔夠清楚，而且荷蘭版有6色; 智利版就只得5色......

 法國版~ 我覺得依個法國版有少少似香港版既經典型!

>>>>>>>>>>>>>>>>>>>>>>>>>>>>>>>>>>>>>>>>>>>>>>>
麥當勞遍佈全球，我相信冇咩人會未食過麥麥~ 不過唔好以為麥當勞只係有漢堡包薯條既垃圾食物快餐店冇咩巴閉喎! (英國既麥麥或者係.......)

其實世界各地既麥當勞，都有好多好有地方特色 + 迎合本土口味既食物，只限定國家 / 地區供應~ 唔親身到過依d國家 / 地方，真係有錢都食唔到依d麥麥餐......

亞洲地區

韓國: "Bulgogi Burger" - 韓式豬肉漢堡包; "McBingsoo" - 韓式刨冰;

日本: 創意無限既日本人，連麥當勞都特別多選擇過其他國家! 經常推出新奇口味......

e.g. "Ebi Filet-O" - 蝦柳包; "Ebi-Chiki" - 麥樂蝦、麥樂雞組合; 和風芥醬雙層魚柳包etc~

 "Ebi Filet-O" - 蝦柳包~

印度: 由於宗教關係，印度麥當勞並冇牛肉 + 豬肉食物供應! 店內既肉類食品一般只有雞肉(Halal) + 魚肉，其他大部份食品都係以蔬菜 + 豆類製成既素食，間中亦有羊肉食品(Halal)供應。

- (上) 招牌既雙層牛肉巨無霸，喺印度就由"Chicken Maharaja Mac"取代;

- (下左) "Veg Pizza McPuff" - 材料為豆類 + 芝士既酥皮餅;

- (下右) "McAloo Tikki" - 由薯仔 + 豆類製成既素食漢堡;

印度麥當勞曾經推出過一個叫"McSurprise" 既羊肉漢堡包，配有洋蔥 + 意大利蛋黃醬~

馬來西亞: 雖然有少少格格不入，不過馬來西亞麥當勞最特別之處就係有粥食! i.e. "Bubur Ayam McD" - 雞肉粥 (下); 另有一個只供應過一段短時間既"Bubur Ikan" - 魚粥~~~

菲律賓: 如果只睇相的話，真係好難發現下面依咋食物原來係麥當勞出品!

- (上左) "Longganisa" - 依個有飯既早餐，只限10.30am 前供應;

- (上右) "Crispy Chicken Fillet"超值套餐，有炸雞、飯、醬汁 + 飲品;

- (下左) "McSpaghetti" - 配有香腸、蕃茄醬 + 芝士既麥麥意粉;

- (下右) "McDo" - 配有特別醬汁(類似千島醬)既牛肉漢堡~

泰國: 泰國麥當勞有好多並唔係地道泰國口味既新食品，但都係好有創意 + 望落好好味既idea，值得其他國家既麥麥仿傚!

- (上左) "Double Filet" - 雙層魚柳包~ (我一向都覺得魚柳包係麥當勞最搵笨最唔飽肚既食物! 打孖魚柳應該會好少少!);

- (上右) 新產品淋上芝士醬既薯條 - "Cheesy Fries";
- (下左) "Corn Pie" - 粟米批 (我覺得依個好有potential!!);

- (下右) "Pineapple Pie" - 菠蘿批;

最近佢地仲推出咗"Spinach Pie" - 菠菜批; 而且亦可食到泰國地道口味既"Som Tam" - 麥麥青木瓜沙律!

新加坡 + 台灣: 喺新加坡稱為"McSpicy" 既勁辣雞腿堡，喺台灣同樣有供應! 不過台灣地區就叫做"Spicy Chicken Fillet Burger"~

 "McSpicy" / "Spicy Chicken Fillet Burger" - 勁辣雞腿堡~

此外台灣麥麥亦曾經推出"泡菜芝士漢堡" + 類似MOS Burger 既飯堡~

歐美地區

加拿大: 我大學時曾經聽過lecturer 講過，加拿大龍蝦產量多價格低廉.......所以當地麥當勞有一種叫做" McLobster"既食物供應 - 龍蝦包!!!

不過"McLobster"只限加拿大既Maritime Provinces，而且係季節性供應~

 "McLobster"~

土耳其:

- (下左)"Mega Mac" - 4塊漢堡扒既特級巨無霸 (有d國家叫做"Double Big Mac"~)

- (下右) "McTurco" - 好有土耳其特色既turkish kebab - 羊肉或雞肉燒烤~

挪威: 挪威盛產三文魚，當地曾經供應過一個叫"McLaks"既三文魚包;

澳洲: 甜品"McPavlova" - 打硬咗既蛋白霜餅 (meringue)，淋上熱情果果醬.......(聽到都唔想食!!!)

波蘭: "McKielbasa" ("Kielbasa" = 波蘭香腸~ 所以我估個包似熱狗!)

芬蘭: 顧客可根據自己喜好要求麥麥店員，將餐牌上所供應大部份包類既麵包，換成裸麥麵包(rye bread);

捷克: "McCountry" - 麵包夾住豬肉腸、生菜、蕃茄、洋蔥 + 蛋黃醬;

 德國: 德國麥當勞竟然有啤酒供應!!!


我記得好幾年前香港麥當勞曾經短期供應過飯餐，好可惜當時我無機會一試; 不過N年前中學時代既我，就試過佢地既羅宋湯!

聽聞有好幾個國家仲有周打蜆湯呢.........

香港太多好野食! 所以我而家返親香港都唔會食麥當勞......

 不過睇到香港依個"豬柳蛋扭扭粉"早晨套餐，竟然連麥當勞都令我流哂口水!!!!!

令我不禁問自己一句.........

點解英國連麥當勞都水皮過人?????

References

- http://en.wikipedia.org/wiki/McDonald%27s_products_(international)

- http://trifter.com/practical-travel/budget-travel/mcdonald%e2%80%99s-strange-menu-around-the-world/