頭先上forum 睇到一個member 講關於佢爸爸媽媽既事~ 有感而發......唔知係咪時代唔同? 我對上一輩既女性可以忍受老公對自己精神上、肢體上虐待既能耐 + 當婚姻出現問題時既處理手法，覺得好不可思議!
我唸起V媽媽曾經同我講過一個關於佢好朋友既故事......
A係V媽媽一位幾十年既好朋友~ A既背景係上一個generation 生長喺典型貧困既公屋家庭，對下有一個細佬。A童年時代，A爸爸喺出面玩女人，在外遇到唔如意既事，返到屋企會打老婆仔女來發洩; 要錢時完全唔理會屋企有冇飯開，將屋企所有錢 + 可以典當既野攞走; 後來仲揼低老婆仔女一個人搬走咗! A兩姐弟完全係由A媽媽一手一腳獨力養大果隻......
A既父母一直冇離婚.....直至多年後有一日，A爸爸返咗來! A媽媽並冇趕走佢，不過由依一刻開始，雖然大家生活喺同一間屋裡面，但生活上完全各不相干! e.g. A爸爸瞓廳; 各自分開煮食; A爸爸 + A媽媽完全唔同對方講話，生活作息都如陌路人一樣........
試過A放工買咗宵夜，返到屋企順口問A爸爸食唔食，A媽媽望都唔望A爸爸，只直接同A講: 妳唔洗對佢咁好架! 唔洗理佢架!!! 由得佢啦~~
曾經有一次A半晚返到屋企，屋裡面冇開燈，A見到自己爸爸一個人呆坐喺梳化，A問佢: 你喺度做乜呀? A爸爸一臉落寞地答A: "冇乜野......"，A從來冇忘記過以前發生過既事，所以一直都好憎自己爸爸~ 當時係A爸爸返咗屋企咁耐以來，A第一次有一種心疼既感覺......
之後冇耐A爸爸証實患上末期癌症，喺A爸爸最後一段住院既日子裡面，有一日A媽媽突然煮咗飯餸攞去醫院比佢食! 不過依然一句說話都冇同A爸爸講過，只等A爸爸食完野，收拾好就離開醫院，日日如是......A去醫院探A爸爸時，A爸爸同A講: 今日妳阿媽來醫院探我，佢仲煮野比我食~ 我好開心!
A爸爸臨終前將一本紅簿仔交比A，同A講: 裡面有20萬，我儲咗好耐，我走咗之後，妳將錢交比妳阿媽......
到A爸爸走咗之後，A照佢既說話將紅簿仔交比A媽媽，但A媽媽完全冇接過紅簿仔，只冷冷地講咗句: 得啦~ 你地攞畢錢去辦事囉!
A媽媽一直如常生活，甚至冇流過一滴眼淚，對A爸爸身後事完全不聞不問，葬禮當天，亦如常返工冇出席到......連A都覺得自己媽媽好狠心~~
依件往事有一個好傷感既結局......我一直喺度唸 - 如果佢地既關係當中冇"愛"既存在，點解A媽媽會喺A爸爸最後一段日子裡面照顧佢呢? 如果仍然愛既話，點解A媽媽咁多年來都可以做到咁狠心??
我覺得A媽媽既做法，當中其實並唔存在對或錯! 我地始終唔係當事人，唔知道當日A媽媽有幾難受~ A爸爸後來既懺悔贖罪，對A媽媽來講，未必可以彌補到佢當日所受到既傷害......
a係咪攪錯,做得絶係a爸就真。
回覆刪除a爸拿晒屋企d錢去威, 唔理家人死活, 到自己有病就返黎負累a媽, 返之a媽比人返黎住, 最後還照顧"人家", 人致義儘。
a咁都要怪啊媽做得絶,思維好有問題。 權利與義務, a爸為家庭附出過d咩,邊有權要求返黎, 還要得到照顧?!
[版主回覆08/03/2009 05:12:00]我睇法有少少唔同.....
我覺得始終血濃於水，做仔女既無論自己父母有幾咁錯都好，關係冇辦法改變~ 好多時真係會覺得手掌係肉，手背又係肉......好似我見過一d人，老豆爛賭爭人好多錢，但做仔女既無論覺得個老豆點衰，都會盡量幫佢還錢.....我好幸運冇咁既父母，不過若換轉係我既話， 自問都可能會咁做! 因為我覺得父母生咗我出來依個世界，依個恩點都報唔盡~
其實A並冇原諒佢爸爸，更加唔係怪自己媽媽太狠心~ 我比較可以理解A既唸法 - 既然當初佢爸爸做到咁絕，佢媽媽都冇選擇離開; 爸爸返來又唔趕佢走.....既然可以做到咁，人都就來死，點解唔行多一步?
唔好誤會 - 我自己係果種完全唔容許自己老公打我或有外遇既人! 只要做得出一次，我會即時掃佢去大西洋!! 亦唔可以做到A媽媽咁偉大~ 只係若我從仔女角度去睇依件事，睇法會有d唔同!
我會覺得A媽媽若再行多一步原諒A爸爸，除咗可以了咗A爸爸既心願之外，仲可以解開A媽媽多年來既心結! 對A媽媽自己來講係一件好事; 當然~ 一個人做錯事，就算最後知錯改過，唔代表他人一定要接受! 我一早講過 - 我認為A媽媽做法唔存在錯或對， 不過我覺得佢既餘生，永遠都有一部份有"恨"存在......
我極同意abc的看法......A爸冇盡自己角色的任何責任, 最後還厚顏回來幹嗎 ?
回覆刪除[版主回覆08/03/2009 05:24:00]我睇法有少少唔同~ (詳見我回abc既回覆!)
其實我覺得A爸爸後來返屋企，係真正知錯懺悔贖罪! 因為佢冇要求家人原諒，只默默補償過去既錯誤......
我認為真正知錯悔改既人，係唔會要求 / 迫對方原諒自己，只會盡自己能力去補償~ 當然對方有權唔原諒，但真正知錯既人，並唔會因為對方唔原諒自己，而停止懺悔! 依點從A爸爸最後將紅簿仔留比A媽媽可見e.g. 既然A媽媽冇趕佢走，佢大可以唔洗死慳死抵去儲依筆錢......
清官難審家庭事，當時人最難受
回覆刪除[版主回覆08/03/2009 05:25:00]agree~ 我自己認為A爸爸 + A媽媽都係不幸既人.......
離一離題
回覆刪除我想問下你呢 .. 上次你整排包跟住本書整 佢講既根粉同麵粉有咩分別 ???
thanks!!~
[版主回覆08/03/2009 05:26:00]根粉其實 即係高筋麵粉; 即係bread flour~ 專用來整麵包!
夫妻感情差, 做人仔女的就真係最慘, 一個係呀爸一個係呀媽, 都唔知幫邊個好
回覆刪除[版主回覆08/03/2009 05:28:00]家人關係切肉不離皮，當中有太多複雜問題並唔係一句錯或對可以分得清.......
我記得係sina度睇過一篇文, 大約意思係話, 當女不再愛個男, 但個女仍然對男好, 只係因為想重溫當日戀愛時, 女方照顧男方時的溫馨感覺, 至於男方有乜感受, 女方唔會理會..... 又或者, A媽覺得, 係A爸人生最後, 比返少少溫暖佢, 唔係想佢好過, 而係唔想第日A爸走左, 先發覺自己冇做過任何野而難過!
回覆刪除[版主回覆08/03/2009 05:33:00]講真...果個時代個個都有生活重擔，我覺得都冇心思花喺浪漫方面~ 我比較可以理解A做女既感受 - 某程度上我都覺得A媽媽狠心.....但我唔係覺得佢做得啱或錯~ 只係覺得若佢可以行多一步，佢可以解咗自己多年心結! 不過可能佢自己覺得最盡只可以行到依一步........
想補充些少, 唔係幫邊個問題, 為人仔女父同母都要孝順, a母一個人支持頭家,對d不負責任既人, 理係人情唔理係道理, 冇人可以怪責a母。
回覆刪除如果a父母各自去威, 由a自生自滅, 晚年先回"家", a還會認或孝順其父母嗎? 老同病絶對唔係原諒既理由, 錯就係錯。
[版主回覆08/03/2009 05:44:00]我寫得件事出來，會預咗個個人有唔同睇法，我亦唔會去評每人睇法係錯或對，正如我認為A媽媽既做法並冇錯或對一樣!
依件事當中有好多灰色地帶~ 只係我覺得A爸爸最後返屋企，並唔係純老 / 有病而要搵依靠.......
我自己好相信karma~ 我覺得A爸爸最後要帶住終身悔疚 + 得唔到原佑既結局，已經係佢既karma.......
我就覺得A媽係愛A爸, 俾著我永遠唔會俾佢番屋企, A媽俾得A爸番屋企, 表示都當佢係一份子, 不過A爸都無做過啲乜哄番A媽同埋再為個家負出啲乜, A爸只係無地方住係到痴住傘, A媽真係好偉大好大方, 算係咁架喇, 如果啲仔女仲話佢狠心架話, 我覺得就唔啱喇!
回覆刪除[版主回覆08/03/2009 05:49:00]我反而認為A媽媽已經心死~ 如果係我既話，我一早已經單方面離婚添! 而且A媽媽當日所受既傷害，未必係哄 / 氹就可以得到家人原諒~
其實A並唔係"怪"自己媽媽狠心~ 只係同一件事用仔女既角度同妻子既角度去睇，當中感受會有所不同!
我覺得A媽媽仲係愛A爸爸．．．留下來嘅A媽媽先係最痛苦
回覆刪除[版主回覆08/03/2009 05:52:00]我覺得A媽媽果種係心死~ 但我理解A覺得自己媽媽狠心 - 因為A媽媽最後放低咗一部份，但唔係完全放低~ 所以A覺得有遺憾，而A媽媽既餘生永遠有一部份存在"恨".....
以前嗰一輩真係好多依啲阿爸，後生一走了之，到老咗冇錢，甚至係因為有病就死，就返去搵番啲老婆仔女，我都聽我媽咪講過好多咁既人
回覆刪除其實A媽媽仲比A爸爸返入屋，証明佢都唔係狠心啦，其實一個女人獨力養大啲仔女唔容易，仲要係上一代添，佢可以做到咁，講真唔多唔少都係有啲牽連住A爸爸 (我唔敢講算唔算係"愛")，或者佢係比面啲仔女，始終係A既爸爸
如果我係A，無論A媽媽做咩，我一定會支持佢，因為依個男人返黎，其實對A媽媽黎講，係割多佢一刀 ~~
[版主回覆08/03/2009 05:57:00]做仔女既角度始終同做老婆既角度唔相同! 若我係A媽媽，我根本完全做唔到好似佢咁; 但換轉仔女既角度，就算個老豆幾唔著，死者為大，無論係想自己爸爸臨終時好過，或想媽媽解開多年心結，都可能有唔同程度既期望......
係唔係大家都係女人,也可能已為人母所以代入咗A母度感受而大都唔原諒A父?
回覆刪除身為一个男人無盡責養妻活兒又有外遇係好唔要得,但佢其實佢有兩个身份,男女之間感情誰可分對錯,有外遇係唔好,但邊个知A父母身為夫妻兩人之間的事,誰對又誰錯.
無論如何A是A父的女兒,話順口但叫得个老互食野証明A不是對老豆有很大的恨怨,呢个時侯A母出聲其實會令A好難做,講真A母根本無理个女同A父的感受.
[版主回覆08/03/2009 06:19:00]若以女人角度睇依件事，我根本完全做唔到A媽媽所做既野! 我一早踢咗我老公去大西洋!
但以仔女角度來睇，就完全唔同~ 我始終覺得 - 幾唔好都係一家人! 父母生咗我來依個世上，依個恩大到永遠都報唔盡.....
其實A母做也俾A父返黎,俾你返但完全當佢透明又叫个女唔理佢甘同精神節磨對方&自己無分別,如果A對父親恨怨入骨都唔會叫佢食宵夜拉,雖怨話順口叫,唉成件事損人不刻己,又無理个女感受,A左右做人難...
回覆刪除A父係錯,A母處理方法好亦唔好,予取話A母對A父有愛有情義不如話佢放不下心与的恨怨,我唔係主張A母原琼A父但恨一个人可以摧位一生,不如留返精力努力下面前嘅生活可能會得到幸福.
回覆刪除試想幾許怨偶離婚後不斷在子女面前數落對方不是而做就不少離婚子女不愉訣的童年..........
有一个女兒因父親有外遇而令母親終日以淚洗臉極度怨恨父親,父親因白己一時歪念本想和要妻子從修舊好但女兒不肯原諒父親最後夫妻各行各路,後來母親向親人透露本想原諒丈夫但因女兒強烈反對有作罷,而分手後男人無處可歸最終和本是霧水情緣約第三者一起.
回覆刪除女兒習可選擇不原諒父親,但無權代/左右母親作選擇正如A母可漠視A文但無權左右A,這是不公平的.
回覆刪除予其A母&女兒懷恨過一生不如放下怨恨擁抱明天.
SORRY 我講太多了.
[版主回覆08/03/2009 06:13:00]妳既睇法同我比較相同!
我都認為若A媽媽行多一步，並唔係只得A爸爸有所得著，對A媽媽自己本身都係好既 - 佢可以了結自己多年來心結! 一係就當初一早離開佢，完全各不相干放開懷抱
當然每人處事都有所不同~ 但有時一個人行多一步或行少一步，最後結果可能完全唔相同! 好似依個case一樣，就係爭咗果一步，令到4個人餘生都有遺憾.....(除咗A父母二人之外，A兩姐弟都係~)
我覺得A爸爸已得到佢既karma - 真心知錯但得唔到原佑; 而A媽媽餘生都會帶住恨意~ 成件事來睇好無奈 + 佢地2個都係不幸既人.......
又或者, 當年A爸走左, A媽冇時間去諗, 因為仲有仔女要養育~ 到仔女大了, A爸突然返黎, 當年所有冇時間去諗的感受一起湧現, 所以A媽既恨又怨又有點"始終曾經係夫妻"的諗法, 唔知點去面對, 於是唯有繼續不理A爸, 冷冷淡淡! 到知道A爸不久於人世, 開始有點心軟, 但心中仍有恨存在, 所以只能做到煮飯比佢食, 想再進一步, SORRY, 心中的恨仍在!
回覆刪除[版主回覆08/04/2009 00:12:00]好有咁既可能!
所以與其話佢狠心，其實又可以話佢唔夠狠........
都幾感慨!我諗依家d人唔會選擇比佢番來住,但又相對無言...甘樣其實係到折磨緊雙方!!
回覆刪除同意你既講法 笨笨睇到一半都喊左出黎 maybe有d身同感受啦~ 但係 笨笨而家對自己既格言係 要識得去珍惜我身邊既一切
回覆刪除[版主回覆08/04/2009 00:19:00]雖然我自己唔算得上有宗教信仰，不過我相信佛教道理! 做得夫妻緣定三生，今世欠落既下世要還; 但做父母仔女既，有今生冇來世.......點都好，始終一句 - 珍惜眼前人~
如果a媽真係死心既...佢應該連叫個女唔好理a爸都唔會講...我都相信a媽仲有"恨"...有"恨"不是即係還有"愛"嗎?
回覆刪除[版主回覆08/04/2009 03:40:00]唔和諧關係裡面存在既"愛"，同"恨"一樣咁折磨人......可能每個人準則都唔相同 - 若我仍然愛一個人，我做唔出冷淡到每日對住佢，但又各不相干!
我"燉"A父母既結局覺得好遺憾.....