洋蔥鴨; 車仔咖喱豬皮魚蛋 & 炒菜心
早幾日喺Tesco 見到有雪藏鴨仔賣......
買咗隻返屋企，不過隻鴨仔雪到揼得死人!!!
放喺雪櫃裡面溶雪溶足3日......問老公想食燒鴨定家鄉南乳鴨? 佢話2隻都想食~ 仲問我可唔可以整一半一半.....真係睬佢都傻呀!!!
所以決定2隻都唔整，整咗洋蔥鴨~~~~
上網搵洋蔥鴨食譜時，見依味餸大部份都係來自蘇絲黃! 睇佢個video 一開頭去街市買鴨，店主唔小心斬咗佢隻鴨個頭，
佢即時鬼殺咁嘈想斬返店主個頭咁款........比佢把聲嘈到頭都痛埋!!! 佢未開始煮我已經熄鬼咗個video~~~~ 真係頂依個阿嬸唔順......
廚房大掃除~ 食物櫃大爆棚!!!!!
係時候清緊d櫃裡面既汁呀罐頭呀咁嘞!!
之前整鹵水鴨清咗枝鹵水; 早幾日又清咗枝李錦記醉雞汁.....今次輪到罐頭咖喱汁 + 包爆砂豬皮 - 整咗煲懶人車仔豬皮魚蛋!
本來買咗個木瓜想煲木瓜湯......不過整洋蔥鴨時走油炸鴨好鬼危險恐怖!!! 嚇到偷懶唔想煲湯咯~~~~
洋蔥鴨食譜click here~ 車仔咖喱豬皮魚蛋食譜click here~
係百佳買嗰啲冰鮮鴨又係硬過石頭架
回覆刪除[版主回覆11/11/2009 20:24:00]起碼妳喺香港可以揀買石頭鴨定已溶雪 / 鮮鴨吖........依度最多就係石頭鴨! 偶然先會見到唔洗溶雪果d~~~
我又係頂個不男不女阿嬸唔順,之前係香港睇娛樂台見到佢節目會即轉台,講野誇張到死,仲要把聲拆到好唔舒服! 睇怕未睇完佢個節目會被會嘈到暈,靠自己咪一樣整到隻鴨靚一靚
回覆刪除d豬皮整埋夠邊個食呀?你咪咁鬼懶啦,食飯冇湯真係有d乾喎大佬
“ 精英鴨 ”? 個名好攪笑 ! 不過我唔多食鴨嘅 …………
回覆刪除蘇絲黃係嘈 , 但....我幾鍾意睇 ~
[版主回覆11/11/2009 20:32:00]我 + 老公都反而好鍾意食鴨喎! 不過依度鴨賣得好貴~~~
其實除咗蘇絲黃把聲之外，我仲好唔鍾意佢對其他人既態度! 係~ 依個可能係佢既style，令節目有趣d......不過我睇見比佢鬧既人，我就完全唔覺得有趣!
車仔咖喱豬皮魚蛋我最愛
回覆刪除[版主回覆11/11/2009 20:33:00]車仔餸係香港地道小食，大部份香港人都會鍾意~~~ 我都係車仔fan，不過依度冇得食，所以自己整來慰思鄉病........
我又好想食咖哩豬皮魚蛋呀~ 口水都流晒~
回覆刪除[版主回覆11/12/2009 19:14:00]好快搞掂架咋~ 妳果度應該有依d材料賣? 妳都試吓整啦~~
好好餸喎~~~隻鴨一定好好味!!
回覆刪除[版主回覆11/12/2009 19:13:00]隻鴨真係好好味~ 不過整時麻煩d囉!!!