香港買返來既書，法文原著Moi Nojoud, 10 ans, divorcée 中譯本~
書並不厚，我花咗一個早上已經睇完全書~ 睇完之後感覺真係好無奈......
書記述2008年發生喺葉門既一宗童婚事件，年僅10歲既小女孩Nojoud Ali 喺父親排之下，毫無選擇之下下嫁一個30歲既男人，婚後不斷受到丈夫性虐毒打......
小女孩不甘接受殘酷現實，獨自趁機逃走到當地法院要求離婚!
最後喺一位專攻女性權利既女律師Shada Nasser 協助下，成功獲法官宣佈離婚成立，事件暴光得到全世界傳媒關注回教國家童婚問題。
Arranged Marriage + 童婚一直都係伊斯蘭國家千秋萬代既傳統，喺伊斯蘭國家非常普遍!
單單喺葉門就有超過一半女性喺18歲之前已經嫁作人婦，而童婚更成為當地女孩失學既主要原因，全國文盲女性多達70%......
雖然隨住時代進步，世界人權 + 女性權利改善，葉門喺1999年曾經修正當地婚姻法 - 同意父母讓女兒於15歲結婚，但喺女方進入青春期前不得發生關係~
不過傳統再加上落後部落流傳"娶妻九歲，幸福永遠"既觀念
，依條已稍為改善咗既婚姻法根本等同虛設，無人遵守......可見Nojoud 既故事只係存在喺伊斯蘭國家裡面冰山一角，所不同既係Nojoud 有勇氣站出來改變自己命運!
>>>>>>>>>>>>>>>>>>>>>>>>>>>>>>>>>>>>>>>
Nojoud 既故事令我唸返起一件往事......
我來英初期入讀既college，認識咗一對來自巴基斯坦既年輕夫婦同學，佢地係我至今見過所有中東國家人士之中最靚仔靚女既couple
，非常登對且恩愛~佢地當時已有一個好可愛既小男孩，每日見佢地一齊推住BB車返學，將小男孩交比college 附設既託兒所照顧後去上課，活脫脫一個幸福家庭典範!
同佢地熟絡後女方曾經向我道出佢地未來到英國之前，喺自己家鄉所發生既事......
佢 + 丈夫青梅竹馬，長大後相愛~ 但無奈男女雙方家長都唔認同佢地既關係，更各自為佢地安排好arranged marriage (即我國以前果種盲婚啞嫁!)
喺佢地既國家，佢地根本無自主權 - 尤其係女性~
當佢地打算放棄爭取既時候，女方發現自己懷有身孕!! 
生活喺伊斯蘭國家且已有arranged marriage 婚約，唔係處女已經好大鑊，加上懷有婚約以外既男性既BB，罪加一等啦!
可幸男方屋企叫做有d錢，於是男方喺屋企偷咗一筆錢，同女方一齊私奔來到英國尋求庇護.....
女方來到陌生既國家，曾經因為太掛住媽媽，偷偷打過一次電話返屋企，不過女方哥哥恐嚇警告佢 - 妳破壞咗我地屋企既名譽，令我地蒙羞! 若妳有朝一日再踏足家鄉半步，我會親手一槍打死妳!!
事隔多年，我離開college 後已經同依對夫婦失去聯絡~ 不過至今佢地既事我仍然好深刻! 希望佢地喺英國依個自由既國度生活安好，永遠幸福~
>>>>>>>>>>>>>>>>>>>>>>>>>>>>>>>>>>>>>>>
睇完"我十歲，離婚"依本書，加上憶起自己身邊曾經認識過既人既經歷，我真係好慶幸感恩自己出生喺香港 - 一個好多人認為唔完美，但最起碼自由唔封建既地方!
我自己其實係傾向無神論，但我相信世界所有宗教本質都係導人向善~
好多人因為911後加上世界一連串恐怖襲擊事件，將責任歸疚伊斯蘭教可蘭經等等......
記得當年有一d奉伊斯蘭教既同學要喺齋戒月守齋 - 每年守齋期間，從朝早到黃昏都唔可以進食~ 放學時佢地向我地一眾同學訴苦好肚餓，當時我 + 同學好衰咁特登喺佢地面前提麥當勞魚柳包 + 薯條......(
sorry 啊!)當然佢地知我地只係講笑啦! 佢地完全唔介意，只係無奈苦笑!
我想講既係 - 當現今世界好多人認為伊斯蘭教、可蘭經等同恐怖份子，依點我係完全唔認同!
因為我自己親身認識信奉伊斯蘭教既朋友，佢地都係友善可親既人~
>>>>>>>>>>>>>>>>>>>>>>>>>>>>>>>>>>>>>>>
依本絕對唔係一本令人睇得開心既書!
而且仲會一路睇一路為葉門當地荒謬既傳統習俗激鬼氣!!
但我肯定睇完書既人，都會感恩自己生活喺一個自由有人權既國度~
主角10歲小女孩Nojoud 勇敢提出離婚要求，已經喚醒咗世界對伊斯蘭國家童婚問題關注!
雖然要完全脫離封建童婚習俗仍然有一大段距離，但最少Nojoud 既遭遇，對一向習慣啞忍逆來順受既葉門女性來講，起咗好大鼓舞作用!
Nojoud 之後，當地法院陸續接到其他小女孩提出既離婚要求而獲得處理~
想提一提書中篇幅非常少交代既Nojoud 姨母"道拉" - 道拉並非Nojoud 既真姨母，而係Nojoud 爸爸既第二位妻子! (伊斯蘭教行一夫多妻制架嘛~)
道拉雖非Nojoud 母親，但當日Nojoud 向道拉申訴被自己丈夫性虐毒打，係道拉建議Nojoud 去法院提出離婚要求;
而且道拉經濟拮据，仍然為自己"哎吔女"提供去法院既路費......
我真係覺得佢好偉大啊!
雖然一開始睇書既時候已經知道Nojoud 成功擺脫丈夫既魔掌，不過我一向睇書都會好投入，一路睇路好肉緊呢......
不過全書有一點我搲爆頭都唔明白......
沒有留言:
發佈留言