2010年12月28日
是晚好開心同2位blog 友Fian + cycheung 見面!
(徇佢地要求要打格仔!
)所謂"三個女人一個墟"，雖然我地大家都係初次見面，不過平時喺blog 度吹水，見面時好似有講唔完既話題
，完全唔會覺得陌生~地點係太子既百利火鍋海鮮酒家，雖然天氣唔凍，不過我好鍾意打邊爐，是晚我地烚吓烚吓!
而家個個人都怕寄生蟲，已經越來越少地方有得食嘞~
依味我好細個時成日食架，已經多年無食過，真係好開心今次返香港食得到!
依餐飯由7.30pm 百利爆哂棚食到人地打烊咁滯，不經不覺已經11點幾!
離開百利後cycheung 先行搭地鐵返屋企，其實已經好近我屋企~ 不過我 + Fian 竟然企咗喺條街度繼續八!
因為第二日係小妹牛一~ 唔經唔覺同Fian 八到零晨12點，已返咗英國既老公打電話來祝我生日快樂......
同老公匆匆講咗兩句收線，我話返到屋企再打返比老公~
返到屋企我即時打返電話比老公......
老公: 妳而家先返到屋企呀? 原來已經點幾鐘!
女人八卦既能力真係非同小可!!
Fian + cycheung~ 好開心終於可以同妳地見面!
仲有多謝妳地請我食飯呢~ 依餐係我第一餐生日飯啊!
下次我再返香港時，一定要再約啊~
P.S. 本來是次飯局出席既仲有blog 友笨啦啦，不過笨笨當晚臨時要加班，希望下次可以見到妳啦笨笨~~~
牛爽...未食過喎...你知吾知係咩部位呀?
回覆刪除下次返黎過黎找我啦.....我有好多美食想帶你去食架.....
[版主回覆02/18/2011 22:42:00]牛爽我都係第一次食咋! 我都唔清楚係咩部位，之前上網查過好似係近牛腩既部份~ 滾幾耐都唔會靭，滾到熟鬼哂都係爽既，真係好鬼正!!!!
其實我今次返來都好想過來搵妳架! 好鬼掛住鍋蟹粥 + 大細靚囡呢~ 不過真係就唔到時間，下次返去第一時間過去澳門搵妳!
我都好鍾意食雞子 o架!!
回覆刪除[版主回覆02/18/2011 22:39:00]係呀~ 雞子真係好香好好食! 不過有好多人覺得好核突唔敢食呢.......
雞子係咩味架? 咁你暑假會唔會再返香港? 中國情人節快樂啊v女
回覆刪除[版主回覆02/18/2011 22:36:00]雞子味道係難形容喎! 熟咗咬爆外膜，裡面軟軟滑滑有少少似燉蛋咁既質地，好香好creamy~ 雞子好補架! 不過有d人會覺得好核突唔鍾意食.......
暑假應該唔會返香港~ 不過Mr.T 4月中要返香港搞少少野，我唸緊跟唔跟埋佢返去?
Thank you caramel! 原來今日元宵呀? 我都祝妳中國情人節快樂啊!
係呀~我次次都同個blog友傾到天昏地暗架~同佢好似識o左好耐o既real friend咁...話想要D咩食D咩都會陪我去搵到為止...真係friend過好多成日見個D頭朋友~
回覆刪除[版主回覆02/18/2011 22:28:00]其實都可以理解既~ 好多人寫網誌都係寫一d自己既興趣，喺blog 裡面有相同興趣既人認識後，自然會特別投契好傾啦!
下次你返香港我約你...
回覆刪除[版主回覆02/18/2011 21:56:00]好呀~ 一言為定啊! 見妳成日都去食好野，要帶我去試吓啊!!
真想不到我們是有咁好傾, 傾到大家也不願走呀 , 下次回來要再八過呀 .
回覆刪除[版主回覆02/18/2011 21:55:00]真係好搞笑! 無唸過夜媽媽企喺條街度都可以傾到個幾鐘頭!! 如果cycheung 一齊八就不得了嘞!
等我下次返來再見啊~
真係咁啱嘅, 我都好鍾意去百利打邊爐和食雞子呀!!
回覆刪除[版主回覆02/18/2011 21:54:00]係呀? 咁妳係咪住果頭附近架?
下次妳返香港記得要搵我
回覆刪除[版主回覆02/18/2011 23:29:00]一定會! 最衰今次妳病咗啦......
what is 雞子? Never eat it before? Expensive?
回覆刪除[版主回覆02/19/2011 08:12:00]雞子 are male chicken's testicles!
i always have them when having chinese hotpot~ they taste creamy, very yummy! but dont think they are expensive~
一言為定
回覆刪除[版主回覆02/19/2011 23:55:00]一言為定!
同blog友初次gathering已經咁好傾~ 你地3位一定超級健談喇 haha
回覆刪除我咁大個人都未食過雞子，一黎唔知內裡係點，二黎從來打邊爐都無人叫呢個item，所以都係憑想像佢係一條短短的腸仔 +_+
[版主回覆02/19/2011 23:55:00]無論係第一次，或者之前已見過面，每次同blog 友見面都傾唔停!
雞子即係公雞既睪丸~ 薄膜裡面好creamy 有少少似scrambled egg! 鍾意既人會覺得好香滑，唔鍾意既人會覺得好核突! 有機會妳都試吓吖~
係啦~我病好妳就要返屋企!
回覆刪除不過我會等妳
[版主回覆02/19/2011 23:50:00]一言為定! 下次早d約食飯~
我住響大埔, 我最鐘意經常約朋友周圍去食野 , 尤其最愛打邊爐和食日本菜, 我覺得百利野食新鮮, 只係個洗手間衛生就麻麻地.....下次有機會約埋一齊去吖
回覆刪除[版主回覆02/21/2011 03:30:00]OIC! 通常d生意唔憂做既老字號，都無咁注重細節架嘞! 我無咩所謂，最緊要好食 + 唔會食壞人~ 好似蔡瀾成日幫襯既富記，佢地門面又迫夾，地下又油油滑滑，不過我由細食到大仍然覺得好好味!
好吖~ 下次我返香港約出來一齊去食好野吖!
噢!富記,我知道呀!我like食果度d粥, 十多年前已幫襯啦, yummy
回覆刪除[版主回覆02/22/2011 03:49:00]其實富記唔止十幾年歷史架~ 我仲未出世時，V爸爸V媽媽仲拍緊拖佢地已經成日去幫襯架嘞! 佢地舊店喺上海街架!!
所以我由懂性開始已經食富記食足咁耐，我每次返香港都會幫襯架! Mr.T 都好鍾意食佢地既炒飯呢~
Yes yes!我係十多二十年前跟Uncle & Auntie去富記食 , 不過我唔記得搬左未....係呢?您有無去過神燈呀?
回覆刪除[版主回覆02/23/2011 00:05:00]我唸富記應該搬咗十幾年左右既啫，之前一直喺上海街，加加埋埋最少三十幾年歷史咯~
神燈個名好熟，不過我未去過呀! 係咪好似有焗魚腸食架??
肥牛我啱，雞子我唔啱，下次返黎我地又齊齊去烚下烚下囉
回覆刪除[版主回覆02/23/2011 00:03:00]好呀~ 咪我地次次都係去元氣!
樓下Carmen講起神燈，又令我想當年嘞 細個老豆成日帶我去架，可惜冇咗lu~~~
回覆刪除[版主回覆02/23/2011 00:03:00]神燈個名好熟......係咪有焗魚腸果d少有小菜食架? 我未去過呀.....
係呀，有魚腸食架，都係上海街嗰邊架，可能妳見過都唔定
回覆刪除[版主回覆02/23/2011 07:55:00]其實我唸可能係我睇雜誌見過介紹.......
係呀!係呀!雞蛋焗魚腸呀
回覆刪除[版主回覆02/23/2011 21:20:00]最衰執咗啦! 我最鍾意去試依種出名既地踎小菜館.......
你一講怕寄生蟲﹐果日上網我見到個日本人係魷魚皮度挑左隻出黎~
回覆刪除[版主回覆03/04/2011 23:54:00]吓?????????? 魷魚都有寄生蟲咁恐怖! 死啦~ 魷魚生食好正果喎........