失蹤咗幾日，因為初四(2月6日)傍晚我突然發燒
，Mr.T 即時送咗我去急症室! 其實喺急症室時已經退咗少少燒，我當時仲心唸頂哂龍個零鐘頭就可以返屋企啦......
點知醫生怕我初一既手術傷口會發炎，要我即時留醫，又要抽血化驗又要照X光......折騰咗成晚，搞到半夜3點幾老公先一個人返屋企......
本來以為瞓一晚第二日初五(2月7日)就可以返屋企啦~ 因為我入院時已經開始退燒，點知清晨開始體溫又再次上升返，就係咁醫生唔肯放我走要我留多一晚!
初五係我最難受既一日......朝早8點早餐時間，不過護士話我要見完醫生先可以食野
，所以我無早餐食!等到中午12點半終於有午餐食嘞!!
(洋人無戒口依家野架嘛!)話時話 - 我之前一直以為NHS膳食好差......
雖然我之前都做過智慧齒手術要留醫一晚，不過當時係無野食既! (講真做完智慧齒手術，就算有野食都食唔到啦!) 不過依份燒牛肉味道的確唔錯，
對我來講直情係新年大餐! 所以我清咗隻碟!! 但後面果個蔬菜薏米湯係完全無味既; 隔離果兜一pat 我估係甜品，完全無掂過!
初四晚入院時抽血驗血結果無問題，無發炎跡象~
不過因為初五清晨又再燒返，所以食完燒牛肉又要再抽多1次血化驗!
阿護士姐姐真係好帶挈 - 佢話我太瘦 + 血管太幼好難搵，用條帶勒到我成隻右手完全無哂知覺之後......都仲要插錯位!!
要再抽一次改抽手腕側位置......
從來未試過抽血咁鬼痛!
剛抽完血就到晚餐時間，但我右手痛到不停咁震......
無錯~ 晚餐我揀咗蛋! 今次係特登既，因為我發緊自己脾氣!!
初一做手術時已插過依隻手，傷口仲有少少瘀瘀地，所以唔可以插返同一個位置......
唔知今次個醫生手勢唔好定點? 今次醫生插咗個針筒喺較近手腕既位置，一插落去隻手就猛咁標血! 大家仍然可以見到手指附近既血跡......
而且因為位置近手腕，我稍微屈少少隻左手就feel 到針筒倒插拮肉好鬼痛!
其實我只頭一晚要吊鹽水，但依個針筒就插咗足喺我隻手3日，依3日2夜我完全唔敢郁隻左手，沖涼都只用隻抽血抽到半殘廢既右手單手來沖......
初六醫生想我再留多一晚以防萬一，不過經我苦苦哀求聲淚俱下
，醫生終於喺有條件之下放我一馬比我返屋企 - 最少要有人照顧我24小時，每6小時幫我探熱，如果體溫上升返到38度，就要即時返去醫院!因為要等配藥，所以要等到晏晝探病時間3點老公先可以接我出院......
食完lunch 只12.45pm，老公仲有排都未到，但我已經急急忍住傷口痛執拾行李! 老公來接我時本來帶咗乾淨衫比我換，不過我無換到好似走難咁即時叫佢帶我走 - 我好paranoid 怕醫生會改變主意!
>>>>>>>>>>>>>>>>>>>>>>>>>>>>>>>>>>>>>>>>>>>>
初一手術頭幾日因為傷口痛瞓得好差; 跟住發燒入院果3日2夜就更加唔洗旨意瞓得好 - 護士隔一陣就入來量血壓量體溫; 加上我發燒半夢半醒不停發怪夢......
最好笑果個怪夢係 - 我夢見醫院搞個蒸鯉魚年糕比賽，邊個蒸到條最大最巨型既鯉魚年糕就可以出院~
初六3.33pm 終於返到屋企，老公即時幫我放水沖涼 + 換衫......
沖完涼後我瞓咗手術後以來最舒服最冧既一覺~
醒咗後老公輕輕攬住我，同我一齊睇咗一套佢預先租咗超級好笑既笑片"The Other Guys"! 套戲太好笑，每次我笑時都要揞住傷口就住來笑......
依一刻我真真正正感受到 - 原來幸福真係可以非常簡單!
>>>>>>>>>>>>>>>>>>>>>>>>>>>>>>>>>>>>>>>>>>>>
身體不適既痛苦令我好emotional~ 今年我由年初一喊到年初六，次數加埋足足係我幾年喊既總和!
但依幾日以來最辛苦一定係Mr.T......
每日來回幾次醫院頻頻撲撲，雖然佢每次來探我都笑住講笑話氹我，但我見佢雙眼佈滿紅筋，幾日都無剃過鬚，每次探完我出咗病房門口一步一回頭......我真係覺得好心痛!
尋日初七人日我終於唔喊嘞! 半夜"摘"醒咗，見到身邊既老公瞓得好冧~ 我同自己講 - 一定要爭氣快d好返，好好照顧返老公!
>>>>>>>>>>>>>>>>>>>>>>>>>>>>>>>>>>>>>>>>>>>>
今日初八，傷口周圍瘀血開始散 + 消腫，傷口開始唔痛 + 有少少痕，睇情況會癒合得好好，唔會有疤痕~
雖然新一年病咗咁耐，不過我仍然貪靚......
之前返香港個幾月重咗好鬼多，本來正煩惱點先可以減返磅......
不過手術以來一星期，我已經不費吹灰之力輕咗6磅嘞! 哇哈哈~~
最後在此多謝各位blog 友連日來既慰問~
每一個回應我都有細心讀架!
大家既關心真係令我好感動......
同時真係唔好意思令各位咁擔心我啊!
沒有留言:
發佈留言