紅燒肉

早排同Mr.T喺愛丁堡一間中國餐館食飯.......

食咗依味"紅燒肉"，回味無窮~
我直覺依味餸好容易整.......
咁就要來個老翻證實一下係咪真係咁易整!

1. 連皮五花腩刮淨豬毛，原條汆水後沖洗乾淨，再用廚房紙吸乾水份。

P.S. 豬毛質地硬到可以用來造牙刷...但依味紅燒肉又一定要連皮炆先好食! 所以豬毛一定要清除乾淨，以免影響口感~

2. 五花腩切塊，以胡椒粉、蒜粉、糖、少許雞粉、生抽和老抽醃5分鐘。


3. 炆鍋下油燒熱，爆香薑片、拍扁蒜頭花椒和八角。


4. 下五花腩肉兜勻爆至金黃，灒紹興酒。


5. 加入滾水至約五花腩的一半，下適量冰糖煮滾。


6. 蓋上鍋蓋，轉小火炆煮30分鐘後熄火。


7. 不要打開鍋蓋焗30分鐘，30分鐘後開蓋略拌，再開火炆15分鐘即成。