Reindeer Steak Diane 戴安馴鹿扒

早在聖誕期間見到英國某超市有急凍馴鹿扒賣，
(即係幫聖誕老人拉車d0靚! )
當時已經好想試吓~ 不過賢妻嫌太貴唔捨得買.......

早幾日再去依間超市入鹹豬手，
見到馴鹿扒半價，承機入2盒試吓!

因為未食過更加無煮過，
我怕會有好大陣game味(野味味)，
所以煮前參考咗好多唔同食譜!

芬蘭人好常食用馴鹿肉，常以juniper berries (杜松子)作調味~
我未食過杜松子，不過超市有得賣，
聞起上來有陣較胡椒粒更強既"胡椒味".......

見網上好多人對馴鹿肉食味意見眾說紛云，
有人話好正; 有人話好難食;
有人話似牛肉; 但又有人話好大陣味........
連煮法都好多種，有人調味好重手; 有人調味好輕手........
既然係咁......我最後決定都係用返自己方法去煮!

一直都想整Steak Diane戴安牛扒.......
不過蘇格蘭牛扒一向都好正唔洗調味，
所以整親牛扒都好懶唔整汁~
今次整馴鹿扒怕有羶味，就配個diane sauce啦，
就算真係有羶味都可以靠個汁遮一遮嘛~
大家唔整馴鹿扒的話，都可以照依個食譜來整牛扒架!

1. 馴鹿扒解凍後有d厚，所以我先用肉槌打扁 + 打鬆。

2. 用廚房紙吸乾馴鹿扒水份，以橄欖油、黑胡椒、thyme(百里香)和略略搗爛的杜松子醃最少2小時。


3. Diane Sauce做法:

a. Shallot(火蔥/乾蔥頭)2個切幼絲。(無就用半個紅洋蔥啦!)

b. Chestnut mushroom 2粒(大)，用微濕廚房紙抹乾淨(勿洗!)，切薄片備用。

c. 燒熱橄欖油，下火蔥絲、蘑菇片、蒜蓉和牛油一小塊炒香至軟身。

d. 以海鹽和黑胡椒調味。

e. 灑上李X林喼汁(約1湯匙); 再下Dijon mustard約1湯匙炒香。

f. "隨兩"下拔蘭地酒。(我鍾意酒味濃d，所以我落咗2樽蓋!)

g. 點火讓酒精燒盡至熄火。(要小心! 大約燒幾秒就自動熄火架嘞~ )

h. 下single cream 約200ml拌勻煮滾後試味。(唔夠味就加鹽啦!)

i. 灑上新鮮切碎parsley即成戴安汁。


4. 薯仔批皮切小件，烚熟瀝乾水份壓成薯蓉。


5. 椰菜洗淨切幼絲，放入滾水烚3至5分鐘撈起。


6. (4)加入(5)，再加入牛油和少許single cream拌勻，以海鹽和黑胡椒調味。


7. 燒熱grill pan，將馴鹿扒烤至自己喜歡既生熟程度。

8. (6)的椰菜薯蓉先上碟，上面放上烤好的馴鹿扒(或牛扒)。

9. 淋上煮好的diane sauce即成。(配菜自行攪掂啦!)


馴鹿食後記.........

- 經親身食過後，發現馴鹿扒食味真係好似牛扒，並無任何怪味!
所以大可以省略step 2依個步驟! (煮牛的話更加唔需要step 2!!)
只因我未食前怕死，反正又買咗杜松子.......先至醃一醃佢~

- 脂肪低到幾乎完全無脂肪! 我唸應該算係健康肉類~
依點同馴鹿既生理結構有關......由於要禦寒，
馴鹿既脂肪集中哂喺皮下，肉自然無乜肥!

- 雖然肉無乜脂肪，不過肉一d都唔乾反而異常tender!
我買依隻係馴鹿leg steaks，但口感軟腍程度媲美牛柳~

- 之前已經講過好多次 - 新鮮菇菌唔需要用水洗!
因為佢地會吸水，用濕廚房紙抹乾淨就得~
當然如果你怕可以照洗! 差人唔會拉你既......
但唔好問點解會越炒越水汪汪!!

馴鹿肉同牛肉一樣唔需要煮到全熟! 中間少少粉紅就最perfect~
(有大廚話全熟既馴鹿肉食味會改變! 不過點變我就唔知嘞........)