意大利 - Insalata di Funghi Crudi 意式生蘑菇沙律

我無打錯字 + 大家無睇錯......依個的而且確係"生蘑菇沙律"!
好多人都唔知道其實新鮮蘑菇係可以生食既~

我初來英國時，Pizza Hut沙律吧有原隻生蘑菇供應，
我就係果時知道原來蘑菇可以生食!
不過可能唔係咁受歡迎或者d人接受唔到，
而家已經無再供應~

生蘑菇好唔好食呢?
睇Pizza Hut既情況，應該係見仁見智......
我自己就好鍾意生食蘑菇~
我覺得新鮮蘑菇有濃濃蘑菇獨有既香甜，
同熟食風味截然不同!
不過要注意並唔係所有菇菌都適宜生食，
e.g. 金菇、蠔菇、鮮冬菇就唔適合生食嘞~

先前有幾個有鮮蘑菇既食譜裡面，
我都提過鮮菇菌唔需要用水清洗，用水洗除咗會吸水之外，仲會沖淡菇味 + 流失營養，
而家市售既鮮菇都係室內用專用培土種出來，專用培土同室外田果d泥唔同，
所以用微濕廚房紙抹乾淨就可以~

講返依個意式生蘑菇沙律........
生食蘑菇首先一定要新鮮!
唔新鮮既蘑菇甩皮甩骨灰灰瘀瘀，香氣盡失......
莫講話用來生食，就算用最上乘既配料去煮都唔會好食!


食譜來自英國女名廚Elizabeth David~

1. 新鮮白蘑菇8粒(唔大唔細)用微濕廚房紙抹乾淨，切薄片後上碟。(白蘑菇以白淨、實淨、飽滿為之新鮮!)

2. 新鮮檸檬汁1/2個、蒜泥2茶匙、和檸檬汁同等份量的extra virgin olive oil、小撮新鮮parsley(切碎)、海鹽和黑胡椒適量，一同拌勻。


3. 將(2)淋在(1)上即成，吃時蘑菇片和汁先一同拌勻。

非常簡單易做，清新可口，作為頭盆小食就最啱!