阿V偷懶的日子 (附食譜)

早排一來忙，二來天氣凍到連餸都唔想去買!
所以無乜煮飯 + 整野食，
但不代表我完全無煮啊~
只係少煮 + 煮得簡單快手少少.........

2013年2月27日: 花膠雞腳煲瘦肉; 蠔油花菇炆豬手豬脷; 橙香雞翼; 蒜蓉菠菜

偷懶前煮既最後一餐三餸一湯~
是晚Mr.T miss 咗一班車，
我太肚餓頂唔順先行食自己........

花膠雞腳煲瘦肉(參考食譜)click here~

農曆年初二既開年盆菜，Mr.T竟然不停食煲過湯既豬脷，
所以依餐既目的係試探一下Mr.T係咪真係鍾意咗食豬脷!
本來只想炆豬脷，但冰格剩低一隻豬手順便炆埋佢~
豬手要累骨，預咗Mr.T唔吼......
結果炆咗2大條豬脷，
有人返到來同我全部食哂，
留低哂d花菇 + 豬手!!
不過都好 - 至少prove 咗Mr.T真係鍾意食豬脷，
我以後攞正牌可以整多d!

蠔油花菇炆豬手豬脷食譜click here~

其實本來想整檸檬雞翼，不過唔記得買檸檬，
而家鍾意咗食橙，屋企常備橙，就改用橙來煮啦!

橙香雞翼食譜click here~



依餐三餸一湯之後，我就進入咗"半冬眠"狀態.......

因為天氣凍......少出街買餸，所以煮得比較簡單;
加上早排個胃唔舒服，Mr.T叫我要準時食野，
所以食得比較清淡 + 好多時肚餓等佢唔切我就自己先開飯~

半冬眠期間有時連煮都唔想煮，依個時候就要叫外賣嘞!
英國外賣一般來來去去都係中國野、咖喱、pizza、炸魚薯條.......

最近發現屋企附近有間意大利餐廳竟然有做外賣!
以前都幫襯過依間意大利餐廳，一向都好鍾意，
而家送埋外賣真係正!! 所以最近經常幫襯~

2013年3月21日: 酸辣湯; 上海排骨菜飯

是晚來個簡單"上海之夜".......
醒起原來Mr.T仲未試過我整既酸辣湯!
因為我上次整(第一次)，當時Mr.T仍然喺南下工作，
是晚特別整比佢試吓~

酸辣湯食譜click here~


上海之夜.......不過Mr.T唔鍾意醉雞，
所以整佢最鍾意既豬扒，
我又可以乘機試吓新食譜 - 上海排骨菜飯~

雖然我係第一次整，但真係忍唔住讚自己整得好好味!

美中不足果日Tesco得返一千零一包小棠菜，
得2棵仔仲要唔係好大棵，用哂2棵個菜飯都係唔夠菜......

上海排骨菜飯食譜click here~

Mr.T勁鍾意個酸辣湯! 一大煲只飲剩一碗左右，
第二日揼包烏冬麵落去，好快就有個熱辣辣既好味午餐~

2013年3月27日: 煎格格牛扒

冬眠狀態未完全回復，咁食牛扒就最好! 又快手又好味~

2013年3月29日一人午餐

不過我條牛扒癮一食開就好難止!
連lunch 都要整塊肉眼扒歎吓~

突然想食紅豆沙，坐言起行即時煲返煲!
我煮餸既果皮全部都係V媽媽自製比我既，
平時煲湯用既都有十幾年陳，
今次煲紅豆沙用咗三十年珍品，成煲紅豆沙充滿陳皮香氣~
食完一碗仲即時不停嗝氣，陳皮果然好化氣!!

三張野陳皮紅豆沙食譜click here~

2013年3月30日: 花旗參無花果煲瘦肉; 上海排骨菜飯
自從"上海之夜"之後，
Mr.T成日都話要encore 上海排骨菜飯.....
是晚佢終於得償所願，因為我自己都想再食!

今次用咗無骨豬扒，整夠3塊，每人1塊半，讓Mr.T食到夠!
不過.......
我覺得用返有骨豬扒好味d!

今次小棠菜一包有3棵! 今次個菜飯終於夠菜嘞~


今餐無酸辣湯.......

因為開始覺得熱氣，整返煲花旗參湯啱d!

花旗參無花果煲瘦肉(參考食譜)click here~