Everything happens for a reason!

逢星期六朝早Mr.T 會返office 3粒鐘，好多時我都會跟埋佢去愛丁堡，
依3粒鐘我就去食個早餐行吓街等佢，3粒鐘話咁快就過~

因為各種原因e.g. 我太夜瞓起唔到身...天氣太差...我已經好多個星期六無去愛丁堡!
好掛住愛丁堡d shop!! 剛過去既星期六一早見到大大個藍天，即時精神哂彈起身去梳洗~

下個月又話聖誕，間間店都推緊Christmas shopping...無逛一排既店，果然多咗好多新貨! 不過聖誕前後都會有勁減價，暫時仍要手下留情!

短短3粒鐘兼忍手下，收穫都唔錯啊! ^^

雖然明知遲吓有大減價，但有d野已經等咗太耐，係時候出手...就好似依個日式鑄鐵鍋!
星期六因為Mr.T office 有少少手尾攪遲咗接我，我想逛既店又逛哂，
於是我入咗一間平時絕少逛既阿婆百貨公司打發時間......
竟然比我遇見依個已經想要好多年既日式鑄鐵鍋!

08年我整過壽喜燒Sukiyaki (食譜click here~)
當時我已經好想買一個日式鑄鐵鍋! 不過店完全無見過，網上又賣得超貴，
最後放棄退而求其次買咗相中依個鋁合金不沾淺鍋~

往後幾年返親香港行上海街都見到依種日式鐵鑄鍋，三番四次都想買一個帶返來，
奈何鑄鐵實在太重秤好浪費行李磅數啊~ 寄返來郵費亦好重皮...點都係超貴! 
我買野從來唔會焗住比一個自己認為唔值既價錢，我寧願唔要既啫!!
所以基本上我一早已經完全放棄咗依個日式鑄鐵鍋，
估唔到因為Mr.T 遲到比我有緣搵到佢! ^^

依個鍋係該店聖誕禮物區推廣其中一件貨品，正常情況聖誕前後都有機會勁減價!
之但係.......
(1) 依個鍋既外型、size + 手工100% 符合哂我要求;
(2) 價錢好平 - 係我見過同size 同質量之中最平既!
(3) 貨架上只有4個......

就以上3點，以阿V多年格價敗家經驗去分析...等到減價好大機會賣鬼哂!
若當年08年我搵到咁平既價錢，我會即時買，而家更加唸都唔洗唸即時立一隻啦!! ^^

不過洋人似乎唔係好清楚依個煲其實係用來做乜........

裡面仲有薑粉 + 乾辣椒碎各一包........

重甸甸鑄鐵無花假! 實在好難相信咁平既價錢可以買到一個手工好既鑄鐵鍋~
由於個煲無塗層，搵日得閒要幫佢開煲呢!

舊年年尾買咗個sausage maker 到而家仲未開光!
之前買過腸衣呆喺雪櫃呆到過哂期..........

買返盒唔洗放雪櫃既腸衣~ 一定要快d開光!!

朱古力筆減價，買枝用得最多既dark chocolate~

好耐之前網上見到依樽香草花海鹽，好想要~
不過網上買delivery charge 仲貴過樽鹽!

終於比我遇到現貨，好開心~ 顏色好靚呢! ❤

應節用品.........

依套聖誕蛋糕裝飾有必於一般"Merry Christmas"，而係"Ho Ho Ho"好特別啊! ^^

雪花曲奇模

依本書教用朱古力來裝飾蛋糕，裡面既技巧好有用呢! ^^

香港廣生茶行出品既茉莉花茶茶葉 (我貪佢個茶葉罐有特色!)

£1店又有好野!

花花矽膠朱古力模...花花形狀似高級朱古力呢~

早排跟Mr.T 南下出trip 時買過一枝設計完全一模一樣既蛋糕裝飾筆(網誌)，
用過後的確係好好用! 真係估唔到£1店都有得賣~ 
坦白講£1店依枝手工的確無果枝咁好，但質料大同小異，而且價錢只係1/4! ^^

價廉物美既忌廉抹刀...鍾意佢夠硬身~


 
之前買過既有框隔渣袋，用來磨豆漿整豆腐花一流! 買多一隻~

英國d翻糖喱士矽膠模貴到黐孖筋! 細細塊郁吓都要10幾20鎊!! @@
上網買3塊大既連郵費...£8有找~ ^^

仲有我至愛既鴨鴨~~~~ ❤

好平既Wilton 朱古力叉

Wilton 翻糖印專用顏色

Toy Story 4色食用色素顏色筆

之前唔小心整爛咗個用來做手作仔既手動鑽，去過好多art shop 都搵唔返，
唯有上網搵...發現手動鑽價錢同電動鑽差唔多! 咁緊係買個電動架啦!!

成套好迷你~

好pro 好齊全!

買時只單純唸住用來鑽孔，收到先發現依套野仲有好多功能!
一時間成咋鑽咀...都唔知有乜功能!!?!?! 要時間慢慢摸索一下.......

雖然我叫做識織野...但只係獨沽一味織頸巾~ =P 希望可以挑戰冷帽成功啦!

依個就快變古董但全新既衣車，係Mr.T N年前送比我，我一次都未用過...因為唔識用!
我同自己講: 今個冬天我一定要學識點用! 最少要有一件見得人既製成品!!

所以我買咗包布碎........

一包有4款...雖然係花花，但都唔係好靚...勝在好鬼平，車衰咗都唔會心痛嘛!
等我學識技術又精咗先買靚布~ ^^

6隻鼠鼠...去pet shop 去得越來越密...... XDDDD