2010年2月19日星期五

二人世界年初六‧六六無窮開年飯 - 2010年2月19日


終於的起心肝煮開年飯嘞!

今年又係六六無窮~ 2丁友食係就係多咗d......不過一年一次無所謂啦! 攞個好意頭嘛!! 最多咪食多幾餐囉~~~

今年餐單有......

- 青春常駐花膠湯 (淮山杞子花膠響螺煲雞腳)

- 家肥屋潤大肥雞 (即係白切雞囉! )

- 生財發財金元寶 (生菜髮菜炆鮑魚花膠)

- 嘻哈大笑大蝦碌 (茄汁大蝦碌)

- 同金共富黃金盒 (蠔汁金菇扒魚肉釀豆腐卜)

- 身體健康多食菜 (要講意頭嘛!  瑤柱扒西蘭花)

係咪好豐富呢! 其實煮完一大輪都無乜胃口食.......不過睇見老公咁比面食咗2大碗飯,煮得咁辛苦都係值得既!

喺不久既將來,大家應該會成日見到我煲雞腳湯! 又或者整雞腳餸~ 因為早幾日去中式超買餸時見到急凍雞腳幾靚,買咗一大包返屋企......點知返到屋企發現 - 冰格原來已經有一大包未開既雞腳!!!!_1354.gif image by veronica_tsim

今年自創咗個意頭年菜 - "同金共富黃金盒"~ 唔係"黃金俠"呀!!!!  其實又係因為擺咗個烏龍......

又係果日喺中式超市,見到久違好耐無貨既"七星魚漿"! 太興奮下買咗一包......不過返到屋企先醒起 - V媽媽上星期寄來果箱臘味已經塞滿哂成個硬櫃!!!  無位放包魚漿,唯有食鬼咗佢......

用來釀豆腐卜啦!  不過又要講意頭~ 咁用金菇來扒一扒佢......

就成為咗依個"同金(金菇)共富(炸豆腐)"嘞!  其實依隻七星魚漿麻麻地架咋~ 同香港既鯪魚肉差好遠! 不過好過無啦!! 而且老公好鍾意食味新餸~~~

本來今晚係食瑤柱扒豆苗既! 不過泗和行真係......包豆苗label 話22號先到期,點知洗菜時發現包豆苗裡面果咋好多都係爛哂既!!!! _1651.gif image by veronica_tsim 真係豈有此理!!! 唯有即時叫老公拿拿聲去Asda 買隻西蘭花來頂檔......

今日心情其實麻麻......因為一年前V嫲嫲依個時候入咗醫院~ 今日斬白切雞果陣唸起細個時返去V嫲嫲度拜年,佢又煮雞又煮鴨,但斬雞同鴨佢都會留低隻全脾,未開飯就醒隻雞脾或鴨脾過我......唸起V嫲嫲生前有幾鍚我,一路斬雞一路忍唔住喊咗出來......

食過開年飯,希望大家虎年富富貴貴,豐衣足食 + 開開心心~~~

(過兩日先補返食譜! )



沒有留言:

發佈留言

Related Posts Plugin for WordPress, Blogger...