孖T翻啅意大利。羅馬2010 - 旅行團唔會帶你去既景點"地下墓穴"

第四天 - 2010年2月7日 (Part 1)

是日原本安排既日間行程有2個 - 先去全羅馬市最大既食物市場; 再去Catacombs di Priscilla (地下墓穴)......

結果我地比本過咗期既AA旅遊書老點咗! 書裡面話食物市場星期日會開; 但當我地去到果頭搵來搵去都搵唔到個市場既時間，老公用手機上網搵資料 - 食物市場原來星期日唔開既!!!!

(老公話返到蘇格蘭時要燒咗本書!!!)

我又唔介意喎~ 反正是日天氣非常咁好!  咪當睇吓街景做吓運動work out 連日來既暴飲暴食囉! 呵呵~~~~~

 喺羅馬街頭垃圾桶竟然見到中文字，真係好鬼有親切感呀!!!  ()

搵唔到食物市場 ，唯有返去Termini 火車站外面搭巴士去Santa Priscilla~ 不過..........

羅馬既巴士唔似得香港巴士咁先進 - 車上無電腦話你知下一站係乜站!  

就係咁...我地傻奸奸搭到總站 - 到咗一個好荒涼，完全無人只得草，仲要有風吹吓吹吓果隻既地方......

果頭好恐怖!!!!!   仲有一個荒廢咗既小型遊樂場......好彩天氣好又日光日白咋，如果唔係真係會嚇屎!!! (驚到連相都無影......)

個巴士司機好衰啊~~~ 我地問佢"Santa Priscilla"，佢唸唸有詞咁噏咗大堆意大利文! 都唔知噏乜!!!!  (不過睇佢個樣好可能係粗口.....) 我地又唔識意大利文，鬧我地都唔識聽啦! 傻傻地架~

不過好彩 - 羅馬既巴士係循環線!  所以我地搭返相同號碼返轉頭就得嘞!   只係今次坐近窗邊 - 每停一個站都逐個巴士站名及吓......有驚無險下終於比我地搵到Priscilla 站! 

雖然搭錯車，不過都幾得意吖! 我唸好少遊客會去過巴士總站果頭!  唔係個個遊客都好似我地咁大懵會搭錯車架嘛!! 哈哈~~~~~

到咗Santa Priscilla 再查清楚資料 - Catacombs 2.30pm 先開門喎!

咁食野先囉......

 是日食pizza 嘞 - Fratelli La Bufala~ (反正附近好似得佢 + 隔離間中國餐館開門......)

依間連鎖餐廳最出名係水牛芝士~

 佢地既pizza 係即叫即整架!

 整完塞入依個大爐~ 記得睇電視見過傳統pizza 爐都差唔多樣，只係依個modern d啫!
一人一個大pizza......

 老公既悶蛋Le Pizze Irpina~ 裡面有Mozzarella, Bufala Cream, Cooked Ham & Mushrooms - 即係蘑菇火腿pizza!

 我依個就正嘞........

 Le Pizze Vesuviana~ 有Cherry Tomatoes, Provola, Black Olives & Anchovies - 車厘茄黑橄欖鹹鯷魚pizza!

老公唔鍾意anchovies~ 所以我自己整pizza 時都未用過anchovies......今次自己一個人食哂成個pizza，anchovies 真係好香好好食呀!!!!!  我要自己試吓依個pizza!!!

 仲有一大碟兩份分既La Mediterranea - 地中海水牛芝士沙律~

哇~~~~~~~~ 好好食呀!!!!!!! 菜新鮮到好似啱啱摘; 側跟果大pat 新鮮basil pesto 香到吖.......連唔鍾意食菜既老公都食咗好多! 不過依碟野好鬼貴 - 菜都要10 euros!

Fratelli La Bufala 地址: Via Priscilla, 89 Roma

食完野Catacombs di Priscilla 差唔多時間開門嘞......

 地下墓穴就係位於依間好似鬼屋既Priscilla's House~

 如果唔係門口有個牌，真係覺得依幢野已經荒廢咗......

我曾經去過另一個喺巴黎既地下墓穴 - Catacombes de Paris~ 巴黎既買票後可以喺地下墓穴內自由行走，因為一早已劃定路線，遊客一定唔會迷路~

 不過Catacombs di Priscilla 買票後要留喺售票處等候 - 湊夠佢地認為可以起行既人數，就由工作人員帶遊客進入墓穴，沿途會一路講解地下墓穴既歷史!

Tour 分為英語 + 意語; 視乎當時買票後遊客既需要~

 要入去嘞!!!

 入咗地下嘞!

 墓穴總共有2層，共深約164呎~ 而Tour 只會參觀第一層既墓穴~ 紅箭咀就係下一層嘞!

地下墓穴既產生係由於舊時代地面上既墓地不足，當時既有錢人會捐出土地用作開闢地下墓穴~ 整個羅馬市現知確實既有60個類似既地下墓穴!

Catacombs di Priscilla 就係由一位叫Priscilla 既富有女士捐出來既地方，依個墓穴裡面總共存放咗40,000個2至4世紀既天主教徒~

 一格格好似大書架既地方，就係當時存放屍體既"屍格"! 屍體放入屍格後，會將屍格封好，再喺上面寫上屍體既名字......

上圖左邊較長 + 高既係for 成年人; 右手面細格好多係for 嬰兒.......紅箭咀所指既係一名嬰兒~ 大家可見仍然封口 + 上面有名......象徵裡面仍然保存住嬰屍!

 存放嬰屍既屍格有d只比鞋盒大少少，當時存放喺度既嬰兒仍然好細~  令我有種淒戚既感覺......

 依個位無成年人咁大，但又大過嬰兒，我估應該係小朋友~ "Arsinoe"而家仲喺入面......

雖然大部份既屍體已被搬走，只留低空既屍格.......

 但墓穴裡面大小闊窄既通道四通八達，除咗Tour 會途經既地方有照明系統之外，其他部份都係一遍漆黑!

 如果無工作人員帶領既話，喺裡面真係好易迷路~~~~~

 依間房係當時既人葬禮完結後舉行聚餐既地方!!!

(唔明點解要留喺度食野!?!!  比我就食唔落嘞.....)

 墓穴裡面既天花 + 牆壁上仍然殘留住好多古舊既壁畫，壁畫內容都係聖經既描述~

 大家記唔記得我既"羅馬遊記預告篇"見過依幅畫?  

依幅其實係現今發現到最早既聖母畫像! 時為2世紀~  

 我好勇敢地行哂全程!

Catacombs di Priscilla 地址: Via Salaria, 430 Roma

 記唔記得"預告篇"又見過佢地? 佢地係乜水??

佢地其實係2對來自Las Vegas 既遊客，同我地同一時間一齊參觀墓穴......(唔止我地幾個，仲有其他遊客既~)

點解同佢地合照? 因為......

參觀墓穴既時候，得我 + 老公2個係亞洲人，其中著深色jacket 既Rick 對我地好似好好奇，主動同我地傾計~

不過最主要係......地下墓穴裡面其實係唔比影相既!  但好多人都吼工作人員行開咗偷偷影相，而我就係其中一個偷影既人嘞!! 哈哈~~~~

Rick 喺墓穴裡面同我"擊掌為盟" - 我要將影到既墓穴相email 比佢，大家分享! 大家仲互相交換咗Facebook 呢~

最好笑係 - 影完合照大家分別離開，我 + 老公去咗搭巴士返出Termini 火車站......搭咗幾個站後，Rick 佢地喺比我地遲既車站上車喎! 哈哈~~~~

我 + 老公去旅行時，好多時都會認識到來自世界不同地方既新朋友! 世界咁大，大家同一時間喺某一相同地點遇到，我相信係大家既緣份啊~~~