孖T翻啅意大利。羅馬2010 - 驚險霸王巴士

第五天 - 2010年2月8日

開心既時間過得特別快，是日要同羅馬講拜拜嘞!

是日一早起身到酒店餐廳食完早餐後，我地就返房收拾行李準備check out~ (無錯~ 酒店係包buffet breakfast 既! 不過每朝早去食早餐既時候，我都留咗相機 + 手機喺房叉電.....)

 再見嘞~ 228號房!

(咦~ 228幾鬼好意頭喎!!! )

是日我地係夜機返Glasgow~ 同來既時候一樣 - 要先飛去Amsterdam Schiphol 轉機，所以我地仲有一整個上、下午可以留喺羅馬!

Check out 後我地就攞住行李去搭巴士......

Honeymoon 時我地只搭過地鐵(Metro) + 火車;

 不過因為今次去好多地方附近都無地鐵站，所以我地今次學識咗搭巴士!

羅馬既巴士同英國既好唔同.........

  乘客要喺上巴士之前自行買定車票! 因為巴士上係不設車費錢箱既~

 上到巴士後，會見到車頭 + 車尾各有一部咁既黃色機器......

 上車後要將車票放入機內，好似返工打咭咁作記錄!

車頭不設車費錢箱; 而巴士停站既時候，車頭 + 車尾門都會同時打開 - 乘客可以自由從車頭或車尾上落巴士!

因為羅馬巴士咁既運作方式，依幾日旅行中我地所見大部份巴士乘客，由上車到落車都從未打票 - 即係搭霸王車!!! 甚至連修女都係咁......

車票係巴士 + Metro 都通用既，巴士 + Metro 系統簡單，亦唔會分"Zone"所以無論目的站距離遠近收費都係劃一!

車票大至分為4種:

1. 單程票: 只搭一程巴士或Metro就會作廢，售2 euros;

2. 一天票: 單日無限次乘搭巴士或Metro，午夜12時作廢，售4 euros;

3. 三天票: 由買票當日計起，3天內可無限次乘搭巴士或Metro，第4天零晨12時作廢，11 euros;

4. 七天票: 與三天票類同~ (唔知幾錢! )

我地今次5日行程，由於第1日仲未熟路所以買過一次單程票，之後都係搭的士;

而第2天就買咗三天票~

依張三天票到咗第5日就過咗期嘞~ 但酒店附近並無售票既地方......

所以我 + 老公膽粗粗搏一搏搭咗一程霸王巴士 - 由酒店出City Centre!!!!

出到City Centre 我地先買返張一天票搭Metro 去買souvenir......

一行出地鐵站，竟然見到整條街四面都佈滿差佬!!!

 周圍所有馬路全部封哂 + 泊滿哂警車......

警員仲全部攞哂盾牌!!!

我 + 老公好似其他路人一樣企喺度八卦吓咩事......

我: HonHon~ 佢地係咪發現咗我地搭霸王巴士，所以特登喺度"捕"我地??

 

老公: 唔係~ 其實係因為妳太cute and it's a crime!

不過我地等咗成10分鐘都無事發生，d警員就收隊離開......到而家我地都唔知咩事咁大陣象!

羅馬奇景......

雖然羅馬陽光普照，而且每日都成十幾度 (我地去果5日試過最高18度! )

 不過周街都好常見到依種著哂長fur 既阿嬸阿婆~  
依幾日每日最少見到10個，仲要件件都係堅野!

我 + 老公都覺得好奇怪 - 佢地唔熱既咩??

我攬條頸巾都不停標汗......好似佢地咁既話我咪生哂熱痱!!?!?!

 又經過許願池，同佢say 個goodbye先!

買完souvenir 後，我地搭巴士去食野啦......

上巴士後老公打完車票，因為車上乘客越來越多，老公又拉住行李，於是我地分開咗坐，我坐車尾，而老公就坐車中間~

沿途我一路望窗外既街景......突然有人叫我一聲，我轉過頭來，見到一個著深藍色制服既男士同我講: Ticket please!

我即時嗌坐開咗既老公攞車票比依位查票員睇! 不過......

坐我對面有5個韓國男女，我見有另一個著深藍色制服既女查票員問佢地攞票，不過佢地全部都無車票!!!!

其中一個韓國男勁呀 - 女查票員問緊佢d friend 時，佢全程扮瞓著 ~  女查票員推醒佢啦......佢又扮聽唔明!!  真高招~~~~  (不過扮乜都係比人捉到......)

我對到佢地正一正，聽到女查票員同果5個韓國男女講 - 要佢地全部交出passports，仲要位位罰款50 euros!!!

巴士到達總站後，兩位查票員將韓國人們帶落車，逐個抄低佢地護照既資料.......

箭咀果3個就係查票員! (有一個唔知喺邊度走出來!!?!? )

初時我 + 老公見到咁多人搭霸王車，好懷疑巴士點會賺到錢?  照計佢地應該會蝕到入肉先啱架! 不過果5個韓國人咁比佢地罰一罰就有250 euros 進賑......而家我地終於都知道佢地點賺錢嘞!

我 + 老公好好彩!! 雖然我地朝早果次係迫於無奈搭霸王車，但我地事實上真係搭咗一程霸王車嘛! 好彩果程無人查票啫......

  真係lucky 到離奇!

不過真係試都唔好試!  下次再買唔到票既話，我寧願行路都唔會冒險搭霸王車!!!

喺羅馬食既最後一餐......

 緊係要再來多次Sandhu Caffe' 啦!

是日serve 我地果男仔好鬼孤寒!!!!  依碟雞雜只係平時份量一半左右!!


一定要食既牛肚~

老公必食既薯仔炆牛腩~ 是日炆得特別入味.....


薯仔炆腸仔~ (返到英國就再食唔到依種味道既腸仔嘞.....)

老公無厘頭要既薯條~ (已經有咁鬼多薯仔啦!!! )


臨別秋波既"苦苦菜"~ (因為仲未知佢叫做乜名，所以我私下改咗佢做"苦苦菜"! )

食完野再喺Termini 火車站附近周圍逛吓，我地就搭機場巴士去Fiumicino Airport 返歸嘞......

 到咗機場老公一邊self check in，我一邊喺佢側邊唉聲嘆氣......

 好唔捨得羅馬溫暖既陽光 + 藍天白雲既好天氣，更加唔捨得大件夾抵食既美食......

我: 我唔想返屋企呀!!!!! 我要留喺羅馬!!!!

老公: 妳唔掛住屋企咩? 再唔返去邊個餵魚呀??

我: .............

老公: 如果我唔返去返工，點賺錢再帶妳返來呀?

 我買咗幾個超迷你意粉磁石~ (粉紅色果枝潤唇膏用來做對比架咋! )

 幾細包幾卡哇依~~~~~

 裡面既迷你意粉係真意粉來架!

 意包迷你字母粉超可愛~~~~

 字母粉粒粒都睇得好清楚架!

 仲有個迷你意大利食譜月曆~ 每個月有一道意大利菜......

 背後有意英對照食譜!
(唔知係印錯字定係特登懶得意呢? 佢地將Seafood 寫成Sea Fruits......)

 屋企雪櫃門越來越熱鬧噓冚!