2010年2月11日星期四

孖T翻啅意大利。羅馬2010 - 一償多年心願


第二天 - 2010年2月5日

是日終於可以見到"佢"嘞!!!

預計將要排好耐隊,所以離開酒店後第一件事......

當然係先去醫飽我個黑洞肚啦! (無錯~ 又係Sandhu Caffe'~ )

是日午餐......

日日都要食既雞雜 - 除咗雞肝雞心之外,上面果咋燶燶炒洋蔥好鬼正架!!!

炆牛肉 - 好味但好鬼細碟......

香噴噴既迷迭香薯仔~~~ (燶燶地既部份仲加香呀! )

 茄子pizza - 超好味!!!!!!

 一種我到而家都唔知叫做乜野既菜~

咪睇碟菜炒到一pat 好似好核突咁! 依碟野巴閉到我2年多前一食傾心~~~~  用少量辣椒炒過既菜,味道少少辣得來又帶少少苦,正!!! 雖然我仍然唔知佢叫做咩名,不過每次我一見到佢,一定會認得佢~

>>>>>>>>>>>>>>>>>>>>>>>>>>>>>>>>>>>>>>>>>>>>>>>>>
食飽後我地就出發去見"佢"嘞!

地點: Vatican City 梵蒂岡

 我地去到時非常意外 - 點解無人排隊既???

事關2年多前係咁既!!!!  全部人排隊都係為咗去"佢"果度! (時為2007年6月30日)

當日我地排隊期間發生咗一件好唔開心既事......

有一個來自美國既阿嬸,以為我 + 老公打尖,突然一野好大力拍落我背脊 + 講咗句野 - 好似係問我野,但我當時太火聽唔到佢講乜!_097.gif image by veronica_tsim

我無理個女人~ 但就好火滾講咗一大堆中文粗口向老公投訴! (阿嬸太巨型,我一定唔夠佢揪......)

老公見唔到阿嬸拍我,所以佢即時好嬲問我係邊個! 阿嬸既丈夫比較有文化 - 佢見狀即時好有禮地問老公係咪排錯隊? 阿嬸又即時扮哂野笑哂懶友善咁搭嗲......

查實當日我地排隊期間不知比幾多人打尖,但係我地都無出聲! 一來周圍都係來自世界各地既遊客,各有不同文化,打尖情況無可避免; 二來雖然我地並非天主教徒,但我地尊重梵蒂岡依個神聖既地方!  而且去旅行係為咗開心~

當日係我地喺羅馬既最後一日,傍晚要趕飛西班牙~ 我地排隊超過2粒鐘後,先發現前面仍有足足2條大街既長龍!!!!  

睇情況就算再排多2粒鐘,我地都無可能入到去~  最後我地唯有放棄! 同"佢"緣慳一面......

喺離開梵蒂岡既路上,一來見唔到"佢"令我非常失望 ; 二來比阿嬸醒咗一野,我終於忍唔住喺我既honeymoon 喊咗出來!  老公不停安慰我 - 將來一定帶我返來見"佢"......

當日整個梵蒂岡人頭擁擁......整個聖彼得廣場佈滿遊客......

 排隊參觀聖彼得大教堂(St. Peter's Basilica)既遊客,圍住廣場排長龍!

 當時既盛況....

 同今次差天共地!!!!

點解當時會咁多人呢?  依個謎底終於喺2年多後既今日解開......

 原來每年6月29日,係Celebration of St. Peter & St. Paul!!!!! 所以世界各地修女、修士 + 遊客,都會集中喺依段時間來到羅馬聖城朝聖~

大家如果唔想排長龍,記住避免喺依段時間來參觀嘞!!!

講返今次........

我要見既"佢",其實係位於梵蒂岡裡面既Sistine Chapel (西斯汀教堂)~

 要進入西斯汀教堂,先要購票進入Vatican Museum (梵蒂岡博物館); 位位承惠15 euros~

P.S. Vatican Museum開放時間為:

- 3月中至10月: 星期一至五8.45am - 4.45pm, 星期六8.45am - 1.45pm;

- 11月至3月中: 星期一至六8.45am - 1.45pm;

- 逢星期日休館 ( 記住嘞~ 如果唔係會摸門釘架!)

進入博物館後會見到好多雕塑......

 Laocoön and His Sons~

 Triumphant Perseus~ 大家認唔認得個頭? "哇沙池"果個蛇髮女妖Medusa 呀!!!

 兩邊牆壁 + 天花蓋天覆地佈滿金碧輝煌既壁畫~

 抬起頭望到頸都緊哂......



 當中仲有好多舊時代斬頭 + 行刑既巨型壁畫,望落令人不寒而慄~~~~~

 原來佢地食緊魚 + 乳豬仔喎!

20350832.gif image by veronica_tsim 終於都可以同"佢"見面嘞!!!!!!!!!!

我要見既就係佢 - "Michelangelo's The Creation of Adam" (創造阿當)~

Sistine Chapel 中央部份天頂係描述聖經"創世紀"既壁畫,分別由9幅不同壁畫組成; 而"創造阿當"就係當中最受注目既作品~ 好多postcard 都係以佢為圖架!

其實我並唔係一個懂得欣賞名畫既人~ 只係我有一個情意結......

就等如巴黎既Mona Lisa一樣 - 我從小就知道既歷史悠久藝術品,只要我到過藝術品存在既地方,就會好渴望可以一睹佢地既真身~

我唔係教徒,但當我望到畫果一刻,我覺得好感動~~~_1302.gif image by veronica_tsim 甚至有想喊既衝動......是日我終於一償從小多年既心願嘞!!!!
老公見我傻傻仰頭眼定定望住畫,用手摸摸我個頭......204830318.gif image by veronica_tsim

 
盡頭牆上亦係Michelangelo 既作品 "Last Judgement" (新約啟示錄裡面既"最後的審判")

點解依2張相濛查查既呢?

因為一來果度好暗; 二來依部份係唔比影相既! 我係冒住比人鬧既危險而偷偷地影架!!!  (不過周圍好多人都係咁......)

償完心願後,我地就離開Sistine Chapel~

 梵蒂岡城全景模型~

P.S. 梵蒂岡係全世界最細既國家,由羅馬天主教教廷統治,最高元首為教宗~

是日奇景......

 聖彼得廣場上既聖誕樹,聖誕已過咗成2個月咁滯竟然仲喺度! 而且樹上仍殘留少量裝飾金銀波波!!!  隔離有架長頸鹿車,應該係是日先開始拆除裝飾......

>>>>>>>>>>>>>>>>>>>>>>>>>>>>>>>>>>>>>>>>>>>>>>>>>
本來以為要排全日隊先入到Sistine Chapel,是日行程只安排咗梵蒂岡,點知完全唔洗排! 所以我地離開梵蒂岡後,又去咗shopping......

途中買咗件褸,遲d先著比大家睇!  咁是日shop 咗乜野呢?

 第一站先去依度 - C.U.C.I.N.A

C.U.C.I.N.A 係羅馬一間最出名既廚具店! 旅遊雜誌都有介紹~ 咁我當然要去及及啦! 哈哈~~~~

Cucina 係意大利文"廚房"既意思~

記憶中羅馬市應該有3間C.U.C.I.N.A 分店,我當然無咁得閒去勻哂3間啦! 今次去既依間係位於Piazza Euclide,應該係比較細果間分店......

 店雖小,但裡面既廚具應有盡有,尤其果咋玻璃廚具令我口水長流~~~~~

無理由去幾日旅行搬隻煲返蘇格蘭.......

 所以我好克制地買咗幾樣蘇格蘭無得賣既野: 魚型銻模 (整年糕用~); 圓形Ravioli cutter; 大小心型匙羹~ (好鍾意果兩枝匙羹啊! )

第二站......都係廚具 - Gusto~

 Gusto 係羅馬另一間出名廚具店~ 除咗廚具店(紅箭咀),隔離係店既餐廳部份 (藍箭咀)

Gusto 係意大利文"味道"既意思!

依間分店我都唔知道喺邊? 因為只係搭巴士時咁啱線見到先落車睇吓......

 喺裡面見到一個從未見過咁大既oval Le Creuset - 巨型到放得落一個BB仔!!!

 店內貨品比C.U.C.I.N.A 新潮fusion,唔多啱我心水! 所以只買多個三角形既Ravioli cutter~

第三站係食得落肚既店......

 羅馬街頭好多依種專售賣傳統意大利食品既店~ 火腿、芝士、pasta、橄欖油.....etc.

 是日吸引到我既係窗櫥display 出來各式各樣既Truffle 產品 (松露)! 黑松露、白松露、樽裝原粒松露、松露醬........

 忍唔住買咗樽黑松露醬~ 依樽野好細樽又好鬼貴! 唔知我捨唔捨得食呢???

搵緊下一站另一間廚具店既時候,竟然落起大雨來!!!!

 好彩我早有準備 - 旅行雨褸~

我有2件,但Mr.T 屎都唔肯著.......因為我著住依件野行街時,好多人用好怪異既眼光望住我!

 我對鞋入哂水變到好污糟......老公即時買咗對新鞋比我,之後幾日我先有乾淨鞋著咋!

見落咁大雨,是日shopping 就此作罷~

>>>>>>>>>>>>>>>>>>>>>>>>>>>>>>>>>>>>>>>>>>>>>>>>>
 搭車返去Termini 火車站,食咗餐麻麻地,以咁既質素來講好鬼貴既晚餐!

2日無米落肚吊飯癮......我 + 老公都係食炒risotto (無汁既~ 好似炒飯咁炒!); 蕃汁牛扒 + 唔知咩菜~

>>>>>>>>>>>>>>>>>>>>>>>>>>>>>>>>>>>>>>>>>>>>>>>>>
食完晚餐又去咗超市一趟買飲品......+ 宵夜帶返酒店!

喺超市買咗盒醋漬墨魚仔 (哇~~~~ 依盒野超好食!!! )

 再去Sandhu Caffe' 買咗大條燒立魚!店員開始認得我地嘞,佢仲私人醒咗咋迷迭香薯仔過我! 呵呵~~~~ 

再整多盒膽固醇 - 雞雜~ (依盒野會食上癮架!!! 是日第二次食嘞!)

 不過其實雞心仲好食過雞肝!

返到酒店我又即時開餐! 我一路食一路問老公食唔食......

老公: 妳唔洗再問我嘞~~ 我真係好飽呀!_1282.gif image by veronica_tsim 我都唔明點解妳可以咁快又食得落野......




沒有留言:

發佈留言

Related Posts Plugin for WordPress, Blogger...